ಸ್ಕೇಟಿಂಗ್‌:ಹೊಡೆದಾಡಿದ ವೀಡಿಯೋ ವೈರಲ್‌

Team Udayavani, Nov 30, 2017, 10:09 AM IST

ಮಂಗಳೂರು: ನಗರದ ಹೊಗೆಬೈಲ್‌ನಲ್ಲಿರುವ ನೂತನ ಫ್ರಾನ್ಸಿಸ್‌ ಡೋರಿಸ್‌ ಸ್ಕೇಟ್ ಸಿಟಿಯಲ್ಲಿ ಸ್ಕೇಟಿಂಗ್‌ ಕ್ಲಬ್ ಆಯೋಜಿಸಿದ್ದ ರಾಜ್ಯಮಟ್ಟದ 33ನೇ ಸ್ಕೇಟಿಂಗ್‌ ಚಾಂಪಿಯನ್‌ ಶಿಪ್‌ನಲ್ಲಿ ಇಬ್ಬರು ಸ್ಕೇಟಿಂಗ್‌ ಪಟುಗಳು ಸ್ಕೇಟಿಂಗ್‌ ರಿಂಕ್‌ನಲ್ಲೇ ಹೊಡೆದಾಡಿಕೊಂಡಿರುವ ಪ್ರಕರಣ ಪೊಲೀಸ್‌ ಠಾಣೆಯ ಮೆಟ್ಟಲೇರಿದ್ದು, ದೂರು ಹಾಗೂ ಪ್ರತಿ ದೂರು ದಾಖಲಾಗಿವೆ.ಅಲ್ಲದೆ ಈ ದೃಶ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.  16 ವರ್ಷಕ್ಕಿಂತ ಮೇಲ್ಪಟ್ಟ ವಿಭಾಗದ ಫೈನಲ… ಪಂದ್ಯ ನಡೆಯುತ್ತಿದ್ದಾಗ ಬೆಂಗಳೂರಿನವರಾದ ರಾಘವೇಂದ್ರ ಮತ್ತು ಅಂಕಿತ್‌ ನಡುವೆ ಹೊಡೆದಾಟ ನಡೆದಿದೆ.   ಸ್ಕೇಟರ್‌ಗಳು ಫಿನಿಶ್‌ ಲೈನ್‌ ದಾಟುವ ಮೊದಲೇ ಡಿಕ್ಕಿ ಹೊಡೆದು ನೆಲಕ್ಕೆ ಬಿದ್ದಿದ್ದರು. ಆಗ ರಾಘವೇಂದ್ರ ಇನ್ನೋರ್ವ ಸ್ಕೇಟಿಂಗ್‌ ಪಟು ಅಂಕಿತ್‌ಗೆ  ಕೈಯಿಂದ ಹಿಗ್ಗಾ ಮುಗ್ಗ ಥಳಿಸಲು ಆರಂಭಿಸಿದ್ದು, ತತ್‌‌ಕ್ಷಣ ಅಲ್ಲಿದ್ದ ರೆಫ್ರಿಗಳು ಓಡಿ ಬಂದು ಹೊಡೆದಾಟವನ್ನು ಬಿಡಿಸಿದ್ದರು. ಸ್ಕೇಟಿಂಗ್‌ ಪಟುಗಳ ಈ ಹಲ್ಲೆ ಘಟನೆಯ ವೀಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ… ಆಗಿದೆ. ಈ ಸ್ಪರ್ಧಿಗಳು ಹೊಡೆದಾಡಿಕೊಂಡಿರುವುದು ಇದೇ ಮೊದಲಲ್ಲ; ಕಳೆದ ವರ್ಷ ಕೂಡಾ ಪರಸ್ಪರ ಹೊಡದಾಡಿ ಕೊಂಡಿದ್ದರು. ಪೂರ್ವ ದ್ವೇಷದಿಂದ ಇಲ್ಲಿ ಹೊಡೆದಾಟ ಪುನರಾವರ್ತನೆಯಾಗಿದೆ ಎಂದು ಹೇಳಲಾಗುತ್ತಿದೆ.

ಈ ಬಗ್ಗೆ ಅಂಕಿತ್‌ ಮತ್ತು ರಾಘವೇಂದ್ರ  ಉರ್ವ ಪೊಲೀಸ್‌ ಠಾಣೆಗೆ ದೂರು ಸಲ್ಲಿದ್ದಾರೆ. ಪೊಲೀಸರು ದೂರು ಮತ್ತು ಪ್ರತಿ ದೂರು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.  “ಸ್ಪರ್ಧೆ ಎಂದಾಗ ಸಣ್ಣ ಪುಟ್ಟ ಜಗಳಗಳು ಸಾಮಾನ್ಯ. ಈ  ಘಟನೆಯ ಬಗ್ಗೆ ಆಯೋಜಕರಿಂದ ಅಸೋಸಿಯೇಶನಿಗೆ ದೂರು ಬಂದಿದೆ. ರವಿವಾರ ನಡೆಯುವ ಸಭೆಯಲ್ಲಿ ಈ ವಿಷಯ ಪ್ರಸ್ತಾಪವಾಗಲಿದೆ’ ಎಂದು ಕರ್ನಾಟಕ ರೋಲರ್‌ ಸ್ಕೇಟಿಂಗ್‌ ಅಸೋಸಿಯೇಶನ್‌ನ ಪ್ರಧಾನ ಕಾರ್ಯದರ್ಶಿ ಭರತ್‌ ಕುಮಾರ್‌ ತಿಳಿಸಿದ್ದಾರೆ.