ಪಿಲಿಕುಳಕ್ಕೆ ಬಂದ ವಿಶೇಷ ಅತಿಥಿಗಳು !

Team Udayavani, Jul 15, 2017, 10:27 AM IST

ಮಂಗಳೂರು: ಪಿಲಿಕುಳ ಜೈವಿಕ ಉದ್ಯಾನವನಕ್ಕೆ ರಾಜಸ್ಥಾನದ ಉದಯಪುರ ಮೃಗಾಲಯದ ಅತಿಥಿಗಳು ಆಗಮಿಸಿದ್ದಾರೆ. 6ರ ಹರೆಯದ ಗಂಡು ಸಿಂಹ ಹಾಗೂ ಡಾಲ್ಮೇಷಿ ಯನ್‌ ಪೆಲಿಕನ್‌ ಮತ್ತು ವಿವಿಧ ಜಾತಿಯ ಪಕ್ಷಿಗಳನ್ನು ಪಿಲಿಕುಳಕ್ಕೆ ತರಲಾಗಿದೆ.

ಪ್ರಾಣಿ ವಿನಿಮಯ ಯೋಜನೆಯನ್ವಯ ಪಿಲಿಕುಳದಿಂದ 8 ವರ್ಷದ ಗಂಡು ಹುಲಿ “ಕುಮಾರ’ ಹಾಗೂ 6 ವರ್ಷದ ಆಪ್ರೋ ಏಶಿಯನ್‌ ಹೆಣ್ಣು ಸಿಂಹವನ್ನು ಉದಯಪುರ ಮೃಗಾಲಯಕ್ಕೆ ಕಳುಹಿಸಲಾಗಿದೆ. ಪಿಲಿಕುಳದಿಂದ ಹೈದರಾಬಾದ್‌, ಸೂರತ್‌ ಹಾಗೂ ಬನ್ನೇರುಘಟ್ಟ ಮೃಗಾಲಯಗಳಿಗೆ ಈ ಹಿಂದೆಯೇ ಹುಲಿಗಳನ್ನು ಕಳುಹಿಸಿಕೊಡಲಾಗಿತ್ತು. ಸದ್ಯ ಪಿಲಿಕುಳದಲ್ಲಿ 11 ಹುಲಿಗಳಿದ್ದು, 1 ಜತೆ ಬಿಳಿ ಹುಲಿ ಹಾಗೂ ಇತರ ಪ್ರಾಣಿಗಳನ್ನು ಭಾರತದ ವಿವಿಧ ಮೃಗಾಲಯಗಳಿಂದ ತರಿಸುವ ಪ್ರಕ್ರಿಯೆ ನಡೆಯುತ್ತಿದೆ ಎಂದು ಉದ್ಯಾನವನದ ನಿರ್ದೇಶಕ ಎಚ್‌.ಜೆ. ಭಂಡಾರಿ ತಿಳಿಸಿದ್ದಾರೆ.