ಸಂಪರ್ಕ ಬೆಸೆದ ಶೌರ್ಯಶ್ರೀ ವಿಪತ್ತು ನಿರ್ವಹಣ ಘಟಕ

Team Udayavani, Jul 17, 2022, 12:22 PM IST

ಸುಬ್ರಹ್ಮಣ್ಯ: ಹೊಳೆ ದಾಟಲು ಇದ್ದ ಏಕೈಕ ಸಾಂಪ್ರದಾಯಿಕ ಮರದ ಪಾಲ ಕೆಲವು ದಿನಗಳ ಹಿಂದೆ ಸುರಿದ ಭಾರೀ ಮಳೆಗೆ ನೀರುಪಾಲಾಗಿ ಉಪ್ಪುಕಳ ಹೊಳೆಯ ಒಂದು ಭಾಗದ ಮನೆ ಮಂದಿ ಹೊರ ಜಗತ್ತಿನ ಸಂಪರ್ಕ ಕಳೆದುಕೊಂಡಿದ್ದರು. ಶೌರ್ಯ ಶ್ರೀ ವಿಪತ್ತು ನಿರ್ವಹಣ ಘಟಕದ ನೇತೃತ್ವದಲ್ಲಿ ಐದಾರು ದಿನದಲ್ಲಿ ಮತ್ತೆ ಸಂಪರ್ಕ ಸೇತು ವ್ಯವಸ್ಥೆ ಕಲ್ಪಿಸಲಾಗಿದೆ.

ಹರಿಹರ ಪಲ್ಲತ್ತಡ್ಕ ಗ್ರಾ.ಪಂ. ವ್ಯಾಪ್ತಿಯ ಬಾಳುಗೋಡು ಗ್ರಾಮದ ಉಪ್ಪುಕಳದಲ್ಲಿ ಇಂತಹ ಸ್ಥಿತಿ ನಿರ್ಮಾಣವಾಗಿದ್ದುದು.

ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಶೌರ್ಯ ಶ್ರೀ ವಿಪತ್ತು ನಿರ್ವಹಣ ಸುಬ್ರಹ್ಮಣ್ಯ ವಲಯ ಈ ಬಗ್ಗೆ ಮಾಹಿತಿ ಪಡೆದು ಸಂಪರ್ಕ ಸೇತುವೆ ನಿರ್ಮಿಸಲು ಮುಂದಾದರು. ಅವರಿಗೆ ಗ್ರಾ.ಪಂ. ಅಧ್ಯಕ್ಷ ಜಯಂತ್‌ ಅಗತ್ಯ ನೆರವು ನೀಡಿದರು. ಸ್ಥಳೀಯರ ಸಹಕಾರದಲ್ಲಿ ವಿಪತ್ತು ನಿರ್ವಹಣ ತಂಡ ಸುರಿಯುತ್ತಿದ್ದ ಭಾರೀ ಮಳೆಯನ್ನೂ ಲೆಕ್ಕಿಸದೆ ಸಂಪರ್ಕ ಕಲ್ಪಿಸಲು ದುಡಿದಿದ್ದಾರೆ. ಪಾಲ ಮುರಿದು ನೀರು ಪಾಲಾಗಿದ್ದ ಭಾಗಕ್ಕೆ ಮರ, ಬಳ್ಳಿ ಮೂಲಕ ಪಾಲ ನಿರ್ಮಿಸಿದ್ದಾರೆ. ಹೊಳೆಯಲ್ಲಿ ಭಾರೀ ನೀರು ಹರಿಯುತ್ತಿದ್ದ ಕಾರಣ ಹೊಳೆ ದಾಟಲು ಅಸಾಧ್ಯವಾಗಿತ್ತು. ಈ ವೇಳೆ ಹಗ್ಗವನ್ನೂ ಬಳಸಿ ಕಠಿನ ಪರಿಸ್ಥಿತಿಯಲ್ಲಿ ಪಾಲವನ್ನು ನಿರ್ಮಿಸುವಲ್ಲಿ ತಂಡ ಸಫ‌ಲವಾಗಿದೆ.

12 ಕುಟುಂಬ

ಉಪ್ಪುಕಳ ಹೊಳೆ ದಾಟಿ ಆ ಭಾಗದಲ್ಲಿ 12 ಕುಟುಂಬಗಳಿವೆ. ಒಬ್ಬರು ಅಂಗವಿಕಲ ಸಹಿತ ಸುಮಾರು 49 ಜನರಿದ್ದಾರೆ. ಮೊಬೈಲ್‌ ನೆಟ್‌ವರ್ಕ್‌ ಸಮಸ್ಯೆ ಸಹಿತ ಪಾಲ ಇಲ್ಲದೆ ಸುಮಾರು 5 ದಿನ ಆ ಭಾಗದ ಜನರು ಹೊರ ಜಗತ್ತಿನ ಸಂಪರ್ಕ ಕಳೆದುಕೊಂಡಿದ್ದರು.

ಧರ್ಮಸ್ಥಳ ಯೋಜನೆಯ ಮೇಲ್ವಿಚಾರಕರು, ಘಟಕದ ಸದಸ್ಯರಾದ ಸತೀಶ್‌ ಟಿ.ಎನ್‌., ಬಾಲಸುಬ್ರಹ್ಮಣ್ಯ, ಲಕ್ಷ್ಮಣ ನವಗ್ರಾಮ, ಕುಶಾಲಪ್ಪ ಜಾಲು ಮನೆ, ಮುತ್ತಪ್ಪ ಕಟ್ಟ, ಶ್ರೀನಿವಾಸ ಕಟ್ಟ, ಹೃತಿಕ್‌ ಕಟ್ಟ, ಚಂದ್ರಶೇಖರ ಕೋನಡ್ಕ, ಅಶೋಕ, ಹರ್ಷ ಅಟ್ನೂರುಮಜಲು, ಯಶವಂತ ಸೇರಿ ಸ್ಥಳೀಯರು ಪಾಲ ನಿರ್ಮಾಣಕ್ಕೆ ಸಹಕಾರ ನೀಡಿದ್ದಾರೆ. ವಿಪತ್ತು ನಿರ್ವಹಣ ಘಟಕ ಈ ಪ್ರದೇಶದಲ್ಲಿ ಇನ್ನೂ ಹಲವಾರು ಸಮಾಜಿಕ ಕೆಲಸ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದೆ.

ಸಚಿವರ ಭರವಸೆ

ಉಪ್ಪುಕಳ ಸೇತುವೆ ಕೊಚ್ಚಿಹೋದ ಭಾಗಕ್ಕೆ ಸಚಿವ ಅಂಗಾರ ಭೇಟಿ ನೀಡಿ ಪರಿಶೀಲಸಿ ಸೇತುವೆಗೆ ಬೇಕಾದ ಅಗತ್ಯ ಕ್ರಮ ವಹಿಸುವುದಾಗಿ ಭರವಸೆ ನೀಡಿದ್ದಾರೆ. ಇದರಿಂದ ಈ ಭಾಗದ ಜನರಲ್ಲಿ ಹೊಸ ಆಶಾಭಾವನೆ ಗರಿಗೆದರಿದೆ.