ತಲಪಾಡಿ: ಟೋಲ್‌ಗೆ ಬಸ್‌ ಅಡ್ಡ ಇಟ್ಟು ಪ್ರತಿಭಟನೆ

Team Udayavani, Jun 8, 2017, 1:55 PM IST

ಉಳ್ಳಾಲ: ತಲಪಾಡಿ ಟೋಲ್‌ ಗೇಟ್‌ನಲ್ಲಿ ಸಿಟಿ ಬಸ್‌ಗಳಿಂದ ಟೋಲ್‌ ಸಂಗ್ರಹಿಸುವ ವಿಚಾರದಲ್ಲಿ ಟೋಲ್‌ ಸಿಬಂದಿ ಮತ್ತು ಬಸ್‌ ಸಿಬಂದಿ ನಡುವೆ ಮಾತಿನ ಚಕಮಕಿ ನಡೆದು ಸುಮಾರು ಒಂದು ಗಂಟೆ ಟೋಲ್‌ಗೆ ಅಡ್ಡಲಾಗಿ ಬಸ್‌ಗಳನ್ನಿಟ್ಟು ಪ್ರತಿಭಟನೆ ನಡೆಸಿದ ಘಟನೆ ಬುಧವಾರ ಸಂಭವಿಸಿದೆ.

ಈ ಸಂದರ್ಭದಲ್ಲಿ ಉಳ್ಳಾಲ ಪೊಲೀಸರು ಮಧ್ಯೆ ಪ್ರವೇಶಿಸಿ ಸಮಸ್ಯೆಯನ್ನು ಬಗೆಹರಿಸಿದರು. ಕಳೆದ ಜನವರಿ ತಿಂಗಳಿಂದ ತಲಪಾಡಿಯಲ್ಲಿ ಟೋಲ್‌ ಸಂಗ್ರಹ ಮಾಡುತ್ತಿದ್ದು, ಸ್ಥಳೀಯ ವಾಹನಗಳಿಗೆ ಮತ್ತು ತಲಪಾಡಿಯಿಂದ ಮಂಗಳೂರಿಗೆ ಸಂಚರಿಸುವ ವಾಹನಗಳಿಗೆ ಟೋಲ್‌ನಿಂದ ವಿನಾಯಿತಿ ನೀಡಲಾಗಿತ್ತು. ಈ ಕುರಿತು ಜಿಲ್ಲಾಧಿಕಾರಿ, ಹೆದ್ದಾರಿ ಪ್ರಾಧಿಕಾರ ಮತ್ತು ಟೋಲ್‌ ಸಂಗ್ರಹ ಮಾಡುವ ನವಯುಗ ಕಂಪೆನಿಯೊಂದಿಗೆ ಮಾತುಕತೆ ನಡೆಸಿ ಸ್ಥಳೀಯ ವಾಹನಗಳಿಗೆ ಮತ್ತು ಸಿಟಿ ಬಸ್‌ಗಳಿಂದ ಸುಂಕ ವಸೂಲಾತಿ ಮಾಡದಂತೆ ಜಿಲ್ಲಾಧಿಕಾರಿ ಆದೇಶ ಹೊರಡಿಸಿದ್ದರು.

ಆದರೆ ಬುಧವಾರ ಟೋಲ್‌ ಪ್ಲಾಝಾಕ್ಕೆ ಬಂದಿದ್ದ ಹೊಸ ಪ್ರಬಂಧಕ ಶಿವ ಅವರು ಖಾಸಗಿ ಸಿಟಿ ಬಸ್‌ಗಳಿಂದ ಟೋಲ್‌ ಸಂಗ್ರಹ ಮಾಡುವಂತೆ ಟೋಲ್‌ ಸಂಗ್ರಹ ನಡೆಸುತ್ತಿದ್ದ ಸಿಬಂದಿಗೆ ಆದೇಶಿಸಿದ್ದು, ಮಧ್ಯಾಹ್ನದ ವೇಳೆ ಟೋಲ್‌ ನೀಡುವಂತೆ ಬಸ್‌  ಚಾಲಕರಿಗೆ ತಿಳಿಸಿದಾಗ ಬಸ್‌ ಸಿಬಂದಿ ಪ್ರತಿಭಟಿಸಿದರು.ಸುಮಾರು ಒಂದು ಗಂಟೆ ಟೋಲ್‌ ವಿಚಾರದಲ್ಲಿ ಮಾತಿನ ಚಕಮಕಿ ನಡೆದು ಪ್ರತಿಭಟನೆ ನಡೆಸಿದರು. ಘಟನೆಯಿಂದ ಪ್ರಯಾಣಿಕರು ಪರದಾಡುವಂತಾಯಿತು. 

ಈ ಸಂದರ್ಭದಲ್ಲಿ ಮಧ್ಯೆ ಪ್ರವೇಶಿಸಿದ ಉಳ್ಳಾಲ ಪೊಲೀಸರು ಟೋಲ್‌ಗೇಟ್‌ನ ಮುಖ್ಯ ಸ್ಥರನ್ನು ತರಾಟೆಗೆ ತೆಗೆದುಕೊಂಡರು. ಟೋಲ್‌ ವಿಚಾರದಲ್ಲಿ ಮುಂದೆ ಆದೇಶ ಬರುವವರೆಗೂ ಪಡೆಯದಂತೆ ತಿಳಿಸಿದ ಹಿನ್ನೆಲೆಯಲ್ಲಿ ಬಸ್‌ ಸಿಬಂದಿ ಪ್ರತಿಭಟನೆಯನ್ನು ಹಿಂಪಡೆದುಕೊಂಡರು.