ನೆಲ್ಯಾಡಿ: ಟ್ಯಾಂಕರ್‌ ಢಿಕ್ಕಿ; ಬೈಕ್‌ ಸವಾರ ಸಾವು

Team Udayavani, Nov 24, 2018, 9:55 AM IST

ನೆಲ್ಯಾಡಿ : ನೆಲ್ಯಾಡಿಯ ಆರ್ಲದಲ್ಲಿ ಶುಕ್ರವಾರ ಸಂಜೆ ಎಲ್‌ಪಿಜಿ ಟ್ಯಾಂಕರ್‌ ಬೈಕ್‌ಗೆ ಢಿಕ್ಕಿಯಾಗಿ ಸವಾರ ಕೋಲ್ಪೆ ನಿವಾಸಿ, ಗೋಳಿತ್ತೂಟ್ಟು ಪೇಟೆಯ ಟೈಲರ್‌ ಜಗದೀಶ್‌ ಪೂಜಾರಿ (44) ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಮಂಗಳೂರಿನಿಂದ ಗ್ಯಾಸ್‌ ತುಂಬಿಸಿಕೊಂಡು ಬೆಂಗಳೂರು ಕಡೆಗೆ ತೆರಳುತ್ತಿದ್ದ ಬುಲೆಟ್‌ ಟ್ಯಾಂಕರ್‌ ಗೋಳಿತ್ತೂಟ್ಟು – ನೆಲ್ಯಾಡಿ ನಡುವಣ ಆರ್ಲದಲ್ಲಿ ಬೈಕ್‌ಗೆ ಢಿಕ್ಕಿ ಹೊಡೆದು ಪಲ್ಟಿಯಾಯಿತು. ಬೈಕ್‌ ಸವಾರ ಟ್ಯಾಂಕರ್‌ನ ಅಡಿಗೆ ಬಿದ್ದಿದ್ದು ದೇಹ ಛಿದ್ರವಾಗಿದೆ. ಟ್ಯಾಂಕರ್‌ ಹೆದ್ದಾರಿಗೆ ಅಡ್ಡ ಬಿದ್ದ ಹಿನ್ನೆಲೆಯಲ್ಲಿ ಸ್ವಲ್ಪ ಸಮಯ ಸಂಚಾರ ಅಸ್ತವ್ಯಸ್ತವಾಯಿತು. ಜಗದೀಶ್‌ ಪೂಜಾರಿ ಅವರು ಪತ್ನಿ, ಓರ್ವ ಪುತ್ರಿ, ಇಬ್ಬರು ಪುತ್ರರನ್ನು ಅಗಲಿದ್ದಾರೆ.

ಕುಟುಂಬದ ಆಧಾರ ಸ್ತಂಭ
ಜಗದೀಶ್‌ ಪೂಜಾರಿ ಕುಟುಂಬ ನಿರ್ವಹಣೆಗೆ ಟೈಲರಿಂಗ್‌ ವೃತ್ತಿ ನಡೆಸುತ್ತಿ ದ್ದರು. ನೆಲ್ಯಾಡಿ ಪೇಟೆಯಿಂದ, ಬೆಳ್ಳಾರೆಯಿಂದ ವಸ್ತ್ರ ತಂದು ಗೋಳಿತೊಟ್ಟಿನ ತನ್ನ ಮನೆಯಲ್ಲಿ ಹೊಲಿದು ಕೊಡುತ್ತಿದ್ದರು. ಶುಕ್ರವಾರ ನೆಲ್ಯಾಡಿಯಿಂದ ತನ್ನ ಮನೆಗೆ ಬೈಕ್‌ನಲ್ಲಿ ತೆರಳುತ್ತಿದ್ದಾಗ ಅವಘಡ ಸಂಭವಿಸಿತು. ಇದರಿಂದಾಗಿ ಕುಟುಂಬದ ಆಧಾರಸ್ತಂಭವೇ ಕುಸಿದಂತಾಗಿದೆ.

3  ದಿನಗಳಲ್ಲಿ  2ನೇ ಟ್ಯಾಂಕರ್‌ ಪಲ್ಟಿ
ಮಂಗಳೂರಿನ ನಂತೂರಿನಲ್ಲಿ ಗ್ಯಾಸ್‌ ಟ್ಯಾಂಕರ್‌ ಪಲ್ಟಿಯಾದ ಘಟನೆ ನಡೆದು ಎರಡು ದಿನ ಕಳೆಯುವಷ್ಟರಲ್ಲಿ ನೆಲ್ಯಾಡಿ ಸಮೀಪದ ಗೋಳಿತ್ತೂಟ್ಟು ಎಂಬಲ್ಲಿ ಇನ್ನೊಂದು ಟ್ಯಾಂಕರ್‌ ಪಲ್ಟಿಯಾಗಿದೆ. 2013ರಲ್ಲಿ ಪೆರ್ನೆಯಲ್ಲಿ ಗ್ಯಾಸ್‌ ಟ್ಯಾಂಕರ್‌ ಪಲ್ಟಿಯಾಗಿ 8 ಮಂದಿ ಮೃತಪಟ್ಟ ಬಳಿಕ ಜಿಲ್ಲಾಡಳಿತ ಅನಿಲ ಸಾಗಾಟಕ್ಕೆ 10 ಮಾರ್ಗಸೂಚಿ ಸಿದ್ಧಪಡಿಸಿತ್ತು. ಆದರೆ ಇದನ್ನು ಕಟ್ಟುನಿಟ್ಟಾಗಿ ಪಾಲಿಸದೇ ಇರುವುದು ಇಂತಹ ಅವಘಡಕ್ಕೆ ಕಾರಣವೆಂದು ಹೇಳಬಹುದು.