“ಬಯಲು ರಂಗಮಂದಿರಕ್ಕೆ ನೀಲನಕ್ಷೆ ಸಿದ್ಧ’

Team Udayavani, Mar 19, 2017, 2:05 PM IST

ಬೆಳ್ತಂಗಡಿ : ಉಜಿರೆ ಯಲ್ಲಿ ನೃತ್ಯ, ಸಂಗೀತ, ನಾಟಕ, ಯಕ್ಷಗಾನ, ಸಾಂಸ್ಕೃತಿಕ ಕಲಾ ಕಾರ್ಯಕ್ರಮಗಳಿಗಾಗಿ ಉಜಿರೆಯ ಈಜು ಕೊಳದ ಬಳಿ ಬಯಲು ರಂಗಮಂದಿರ ನಿರ್ಮಿಸಲು ನೀಲ ನಕ್ಷೆ ಸಿದ್ದಗೊಂಡಿದ್ದು ಕಲಾಭಿಮಾನಿಗಳ ಬಹುಕಾಲದ ಕನಸು ನನಸಾಗುವ ದಿನ ಸನ್ನಿಹಿತವಾಗಿದೆ. ಶೀಘ್ರ ಶಿಲಾನ್ಯಾಸ ನಡೆಯಲಿದೆ ಎಂದು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಅವರು ಹೇಳಿದರು.

ಅವರು ಉಜಿರೆ ಶ್ರೀ ಧ. ಮಂ. ಅನುದಾನಿತ ಸೆಕೆಂಡರಿ ಶಾಲೆಯಲ್ಲಿ ಬೆಳ್ತಂಗಡಿ ತಾಲೂಕಿನ ಸಾಂಸ್ಕೃತಿಕ ಸಂಘಟನೆ ಸಮೂಹ ಉಜಿರೆಯ ರಜತ ವರ್ಷ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು.

ನಾಟಕ ಕಲೆ ಇನ್ನೂ ಜೀವಂತವಾಗಿದ್ದು ಆಧುನಿಕ ತಂತ್ರಜ್ಞಾನ, ಸೌಲಭ್ಯಗಳೊಂದಿಗೆ  ನಾವೀನ್ಯತೆದ ಪ್ರಯೋಗಗಳನ್ನು ಕಾಣುತ್ತಿದ್ದೇವೆ. ನಮ್ಮ ಜೀವನಶೈಲಿ, ನೋಡುವ ದೃಷ್ಟಿಕೋನ ಬದಲಾಗಿದ್ದರೂ ಆಧುನಿಕ ತಂತ್ರಜ್ಞಾನದ ಪರಿವರ್ತನೆಯ ಪ್ರಯೋಗಗಳಿಂದ ರಂಗಕಲೆಯನ್ನು ಉಳಿಸಿ ಬೆಳೆಸಬೇಕಾಗಿದೆ ಎಂದವರು ಹೇಳಿದರು.

ಸಮೂಹದ ಅಧ್ಯಕ್ಷೆ ಹೇಮಾವತಿ ವಿ. ಹೆಗ್ಗಡೆಯವರು ಮಾತನಾಡಿ, ಬೆಳ್ತಂಗಡಿ ತಾಲೂಕಿನ ಜನತೆಗೆ ಒಳ್ಳೆಯ ಸಾಂಸ್ಕೃತಿಕ ಸಂಘಟನೆ ಬೇಕೆಂಬ ಸದುದ್ದೇಶದಿಂದ ಸಮೂಹವನ್ನು ಆರಂಭಿಸಿದ್ದೇವೆ. ಸಮಾನ ಮನಸ್ಕ ಸದಸ್ಯರಲ್ಲಿ ಹೆಚ್ಚು ಚಟುವಟಿಕೆಯ ಉತ್ಸಾಹ ಹಾಗೂ ಬದ್ಧತೆ ಬೇಕು. ಕಲೆ, ಸಾಹಿತ್ಯಗಳಲ್ಲಿ ಮಕ್ಕಳು ದೂರ ಸರಿಯುತ್ತಿದ್ದು ಅವರಲ್ಲಿ ಆ ಬಗ್ಗೆ ಆಸಕ್ತಿ ತೋರಿಸಬೇಕಾಗಿದೆ. ಮನುಷ್ಯನಿಗೆ ಸಂತೋಷ, ಉಲ್ಲಾಸ, ಆರೋಗ್ಯದ ಸ್ವಾಸ್ಥ್ಯ ಸಂರಕ್ಷಣೆಗೆ ನಾಟಕಗಳಲ್ಲಿ ಮೌಲ್ಯ ತುಂಬುವ ಕೆಲಸವಾಗಬೇಕು ಎಂದು ಹೇಳಿದರು.
 
ಎಸ್‌ಡಿಎಂ  ಶಿಕ್ಷಣ ಸಂಸ್ಥೆಗಳ ಉಪಾಧ್ಯಕ್ಷ ಪ್ರೊ| ಎಸ್‌. ಪ್ರಭಾಕರ್‌ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಮುಖ್ಯ ಅತಿಥಿಯಾಗಿ ಉಜಿರೆ ಶ್ರೀ ಜನಾರ್ದನ ದೇವಸ್ಥಾನದ ಆಡಳಿತ ಮೊಕ್ತೇಸರ ವಿಜಯರಾಘವ ಪಡ್ವೆಟ್ನಾಯ ಭಾಗವಹಿಸಿದ್ದರು.

ಸಮೂಹದ ಸದಸ್ಯ ಯು. ಎಚ್‌. ಖಾಲಿದ್‌ ಅವರು ಬಭುÅವಾಹನ ಏಕಪಾತ್ರಾಭಿನಯ ಹಾಗೂ ಸಮೂಹದ ಸದಸ್ಯರಿಂದ ಪ್ರಸನ್ನ ನಿರ್ದೇಶನದಲ್ಲಿ “ಏನ್‌ ಹುಚ್ಚಾರೀ’ ಹಾಸ್ಯಮಯ ನಾಟಕ ಪ್ರದರ್ಶಿಸಲ್ಪಟ್ಟಿತು. ನಿರ್ದೇಶಕ ಪ್ರಸನ್ನ ಹೆಗ್ಗೊàಡು ಅವರನ್ನು ಸಂಸ್ಥೆ ವತಿಯಿಂದ ಡಾ| ಹೆಗ್ಗಡೆಯವರು ಸಮ್ಮಾನಿಸಿ ಗೌರವಿಸಿದರು.

ಸಮೂಹದ ಕಾರ್ಯದರ್ಶಿ ಪ್ರೊ| ಟಿ. ಕೃಷ್ಣಮೂರ್ತಿ ಸ್ವಾಗತಿಸಿ, ಪ್ರಸ್ತಾವಿಸಿದರು. ಡಾ| ಶ್ರೀಧರ ಭಟ್‌ ನಿರೂಪಿಸಿದರು. ಬಿ.ಎ. ಕುಮಾರ ಹೆಗ್ಡೆ ವಂದಿಸಿದರು.