ಕುಖ್ಯಾತ ರೌಡಿ ಗೌರೀಶ್‌ಗೆ ಗುಂಡೇಟು, ಸೆರೆ

Team Udayavani, May 10, 2019, 6:15 AM IST

ಮಂಗಳೂರು: ಕುಖ್ಯಾತ ರೌಡಿ ಗೌರೀಶನನ್ನು ಬಂಧಿಸಲು ತೆರಳಿದ್ದ ಪೊಲೀರ ಮೇಲೆ ಆತ ದಾಳಿ ನಡೆಸಲು ಯತ್ನಿಸಿದಾಗ ಪೊಲೀಸರು ಆತ್ಮರಕ್ಷಣೆಗಾಗಿ ಗುಂಡು ಹಾರಿಸಿದ ಘಟನೆ ಗುರುವಾರ ರಾತ್ರಿ ಜಪ್ಪಿನ ಮೊಗರಿನಲ್ಲಿ ನಡೆದಿದೆ. ಪರಿಣಾಮ ಗೌರೀಶ್‌ ಗಾಯಗೊಂಡಿದ್ದು, ಆತನನ್ನು ಪೊಲೀಸರು ಬಂಧಿಸಿದ್ದಾರೆ.

ಜನರನ್ನು ಬೆದರಿಸಿ ಹಣ ಸುಲಿಗೆ ಮಾಡುತ್ತಿದ್ದ ಬಗ್ಗೆ ದೂರುಗಳು ಬಂದ ಹಿನ್ನೆಲೆಯಲ್ಲಿ ಪೊಲೀಸರು ಗುರುವಾರ ರಾತ್ರಿ ಗೌರೀಶನನ್ನು ಬಂಧಿಸಲು ತೆರಳಿದ್ದರು. ಆತ ಜಪ್ಪಿನ ಮೊಗರು ಬಳಿಯಲ್ಲಿ ಇದ್ದಾನೆ ಎಂಬ ಮಾಹಿತಿ ಪಡೆದು ಅಲ್ಲಿಗೆ ತೆರಳಿ ಬಂಧಿಸಲೆತ್ನಿಸಿದಾಗ ಗೌರೀಶ ಚೂರಿಯಿಂದ ಪೊಲೀಸರ ಮೇಲೆ ದಾಳಿ ನಡೆಸಲು ಯತ್ನಿಸಿದ್ದಾನೆ. ಆಗ ಪೊಲೀಸರು ತಮ್ಮ ರಕ್ಷಣೆಗಾಗಿ ಗುಂಡು ಹಾರಿಸಿದ್ದಾರೆ. ಇದರಿಂದ ಗೌರೀಶನ ಕಾಲಿಗೆ ಗಾಯವಾಗಿದೆ.

ಗೌರೀಶನು ಕುಖ್ಯಾತ ರೌಡಿಯೋರ್ವನ ಸಹಚರನಾಗಿದ್ದು, ಆತನ ಮೇಲೆ ಮೂರು ಕೊಲೆ ಪ್ರಕರಣ ಸಹಿತ 6 ಪ್ರಕರಣಗಳಿವೆ. ಶ್ರೀನಿವಾಸ ಬಜಾಲ್‌ ಮತ್ತು ವಿಕ್ಕಿ ಬೋಳೂರು ಕೊಲೆ ಪ್ರಕರಣಗಳಲ್ಲಿ ಈತ ಆರೋಪಿಯಾಗಿದ್ದ. ಇತ್ತೀಚೆಗಷ್ಟೆ ಜೈಲಿನಿಂದ ಬಿಡುಗಡೆಗೊಂಡಿದ್ದ ಈತ ಜಾಮೀನು ಷರತ್ತಿನಂತೆ ಬುಧವಾರ ಕಂಕನಾಡಿ ಪೊಲೀಸ್‌ ಠಾಣೆಗೆ ಹಾಜರಾಗಿದ್ದ. ಸಿಸಿಬಿ ಪೊಲೀಸರು ಮತ್ತು ಕಂಕನಾಡಿ ನಗರ ಠಾಣೆ ಪೊಲೀಸರು ಕಾರ್ಯಾಚರಣೆ ನಡೆಸಿದ್ದು, ಹೆಚ್ಚಿನ ಮಾಹಿತಿ ಲಭ್ಯವಿಲ್ಲ.