ಬೇಂಗಮಲೆ ಕಾಡಿನ ರಸ್ತೆ ಬದಿ ದುರ್ನಾತ!

Team Udayavani, Apr 25, 2019, 5:50 AM IST

ಬೆಳ್ಳಾರೆ-ಸೋಣಂಗೇರಿ ರಸ್ತೆಯ ಬೆಂಗಮಲೆ ಕಾಡಿನ ಬಳಿ ತ್ಯಾಜ್ಯ ರಾಶಿ ಬಿದ್ದಿರುವುದು.

ಸುಳ್ಯ: ಐವರ್ನಾಡು ಗ್ರಾ.ಪಂ. ವ್ಯಾಪ್ತಿಗೆ ಒಳಪಟ್ಟಿರುವ ಬೆಳ್ಳಾರೆ- ಸೋಣಂಗೇರಿ ರಸ್ತೆಯ ಬೆಂಗಮಲೆ ಕಾಡಿನ ಎರಡೂ ಬದಿಗಳಲ್ಲಿ ತ್ಯಾಜ್ಯ ರಾಶಿ ಬಿದ್ದು, ಪಾದಚಾರಿಗಳು, ವಾಹನ ಸವಾರರು ಮೂಗು ಮುಚ್ಚಿಕೊಂಡು ಸಂಚರಿಸುತ್ತಿದ್ದಾರೆ.

ಕಳೆದ ಹಲವು ವರ್ಷಗಳಿಂದ ಈ ಸಮಸ್ಯೆ ಇದ್ದು, ಕಿಡಿಗೇಡಿಗಳು ಕೋಳಿತ್ಯಾಜ್ಯ, ಕಸದ ರಾಶಿ, ಖಾಲಿ ಪ್ಲಾಸ್ಟಿಕ್‌ ಬಾಟಲಿಗಳನ್ನು ಎಸೆದ ಪರಿಣಾಮ ದುರ್ನಾತ ಹಬ್ಬಿದೆ. ಸ್ಥಳೀಯಾಡಳಿತ ಹಲವು ಬಾರಿ ಎಚ್ಚರಿಕೆ ನೀಡಿದ್ದರೂ, ಫಲ ಕಂಡಿಲ್ಲ. ಸಂಘ ಸಂಸ್ಥೆಗಳ ಸ್ವತ್ಛತಾ ಕಾರ್ಯ ನಡೆಸುವ ಬೆನ್ನಲ್ಲೇ ಕಿಡಿಗೇಡಿಗಳು ತ್ಯಾಜ್ಯ ಎಸೆದು ಮತ್ತೆ ಗಲೀಜು ಉಂಟು ಮಾಡುತ್ತಿದ್ದಾರೆ.

ಕೆಲ ದಿನಗಳ ಹಿಂದೆ ಸ್ವತ್ಛ ಪರಿಸರದ ಅಂಗವಾಗಿ ಐವರ್ನಾಡು ಗ್ರಾಮದ ನಾಗರಿಕರು ಗ್ರಾ.ಪಂಚಾಯತ್‌ ವತಿಯಿಂದ ಸ್ವಚ್ಛತಾ ಕಾರ್ಯಕ್ರಮದಲ್ಲಿ ನೂರಾರು ಜನರು ಭಾಗವಹಿಸಿ ಇಡೀ ಬೇಂಗಮಲೆ ರಸ್ತೆ ಬದಿಯನ್ನು ಶುಚಿಗೊಳಿಸಿದ್ದರು. ಇಂತಹ ಹತ್ತಾರು ಸ್ವತ್ಛತಾ ಕಾರ್ಯ ಇಲ್ಲಿ ನಡೆದಿದೆ. ಆದರೆ ಮತ್ತೆ-ಮತ್ತೆ ತ್ಯಾಜ್ಯ ಎಸೆಯಲಾಗುತ್ತಿದೆ.

ನಡು ರಸ್ತೆಯಲ್ಲೇ ಕೋಳಿ ತ್ಯಾಜ್ಯ
ಆಹಾರ ತಿಂದುಂಡ ಪ್ಲಾಸ್ಟಿಕ್‌ ಪರಿಕರಗಳ ಜತೆಗೆ ಕೋಳಿ ತ್ಯಾಜ್ಯವನ್ನು ನಡು ರಸ್ತೆಯಲ್ಲೇ ಎಸೆದಿದ್ದಾರೆ. ಹೀಗಾಗಿ ಹಲವು ಮೀಟರ್‌ ದೂರ ವಾಸನೆ ಹಬ್ಬಿದೆ. ಸ್ಥಳೀಯಾಡಳಿತ ಸಿಸಿ ಕೆಮರಾ ಅಳವಡಿಸಿ ಕಿಡಿಗೇಡಿಗಳನ್ನು ಪತ್ತೆ ಹಚ್ಚುವಂತೆ ಸ್ಥಳೀಯರು ಆಗ್ರಹಿಸಿದ್ದಾರೆ.