ಕಾಮಗಾರಿ ಮುಗಿದ ತತ್‌ಕ್ಷಣ ಹಣ ಬಿಡುಗಡೆಗೆ ಗ್ರಾಮಸ್ಥರ ಆಗ್ರಹ

Team Udayavani, Jul 11, 2017, 3:35 AM IST

ನಿಡ್ಪಳ್ಳಿ:  ಮಹಾತ್ಮಾ ಗಾಂಧಿ ರಾಷ್ಟ್ರೀಯ ಉದ್ಯೋಗ ಖಾತರಿ ಯೋಜನೆಯಲ್ಲಿ ಕಾಮಗಾರಿ ಮಾಡಿದ ತತ್‌ಕ್ಷಣ ಪರಿಶೀಲನೆ ನಡೆಸಿ ಅರ್ಹಫಲಾನು ಭವಿಗೆ ಹಣ ಬಿಡುಗಡೆ ಮಾಡುವಂತೆ ಮೇಲಧಿಕಾರಿಗೆ  ಪತ್ರ ಬರೆ ಯುವಂತೆ ಒತ್ತಾಯಿಸಿದ ಪ್ರಸಂಗ ಪಾಣಾಜೆ ಗ್ರಾಮ ಪಂಚಾಯತ್‌ 2017-18ನೇ ಸಾಲಿನ ಪ್ರಥಮ ಹಂತದ ಸಾಮಾಜಿಕ ಪರಿಶೊಧನಾ ಗ್ರಾಮ ಸಭೆ ಯಲ್ಲಿ  ನಡೆಯಿತು.

ಈ ಬಗ್ಗೆ  ದ.ಕ. ಹಾಲು ಒಕ್ಕೂಟದ ನಿರ್ದೇಶಕ ನಾರಾಯಣ ಪ್ರಕಾಶ್‌ ವಿಷಯ ಪ್ರಸ್ತಾಪಿಸಿದಾಗ ಧ್ವನಿಗೂಡಿಸಿದ ಪಂಚಾಯತ್‌ ಸದಸ್ಯ ಶಾಹುಲ್‌ ಹಮೀದ್‌ ಹಾಗೂ ಇತರರು,  ಬಡ ಜನರ ಮೇಲೆ ಅ ಧಿಕಾರಿಗಳು ಅನುಕಂಪ ತೋರಿಸಲಿ.  ಸಾಲ ಮಾಡಿ ಸಾಮಗ್ರಿ ತಂದರೆ,  ಕ್ಲಪ್ತ ಸಮಯದಲ್ಲಿ  ಬಿಲ್ಲು  ಪಾವತಿ ಮಾಡದಿದ್ದರೆ ಬೈಗುಳ ತಿನ್ನುವ ಸನ್ನಿವೇಶ ಎದುರಾಗುತ್ತದೆ ಎಂದರು. 

ಅಲ್ಲದೆ ಕಾಮಗಾರಿ ಪರಿಶೀಲನೆ ನಡೆಸಿದ ಇಂಜಿನಿಯರ್‌ಗಳ ಬಗ್ಗೆಯೂ ಗ್ರಾಮಸ್ಥರು ಅಸಮಾಧಾನ ವ್ಯಕ್ತ ಪಡಿಸಿದರು. ಸಭೆಯ ನೊಡೆಲ್‌ ಅಧಿಕಾರಿ  ಪುತ್ತೂರು ಸಹಾಯಕ ಕೃಷಿ ಅಧಿಕಾರಿ ನಯೀಂ ಹುಸೇನ್‌  ಅವರು ಮಾತನಾಡಿ, ಉದ್ಯೋಗ ಖಾತರಿ ಯೋಜನೆಯಲ್ಲಿ  ಹೆಚ್ಚಿನ ಗ್ರಾಮಸ್ಥರು ಸೇರಿ ತಮ್ಮ ಅಭಿವೃದ್ಧಿ  ಯೊಂದಿಗೆ ಗ್ರಾಮದ ಅಭಿವೃದ್ಧಿಯನ್ನು ಮಾಡಿ ಯಾವುದೇ ಸಮಸ್ಯೆ ಬಾರದ ರೀತಿಯಲ್ಲಿ ಸಹಕರಿಸಬೇಕು ಎಂದು ಮಾರ್ಗದರ್ಶನ ನೀಡಿದರು.

ಅಧ್ಯಕ್ಷ ನಾರಾಯಣ ಪೂಜಾರಿ, ತಾಲೂಕು ಸಂಯೋಜಕ ಚಂದ್ರಶೇಖರ, ಸಾಮಾಜಿಕ ಲೆಕ್ಕ ಪರಿಶೋಧಕರಾದ ಜಾನಕಿ ಸಿ. ಗೌಡ, ಭಾಸ್ಕರ ಕೆ, ರಮೇಶ್‌ ಪೂಜಾರಿ,  ಸಿಂಡಿಕೇಟ್‌ ಬ್ಯಾಂಕ್‌ ಮ್ಯಾನೇಜರ್‌ ಹರಿದಾಸ್‌ ಪೈ, ಪಂಚಾಯತ್‌ ಸದಸ್ಯರು, ಫಲಾನುಭವಿಗಳು ಪಾಲ್ಗೊಂಡರು. ಪಿ.ಡಿ.ಒ. ಸುರೇಂದ್ರ ರೈ ಸ್ವಾಗತಿಸಿ, ವಂದಿಸಿದರು.