ನಾವು ಮಾಡಿದ ಕೆಲಸ ನಿವೃತ್ತಿಯ ಸಂದರ್ಭ ತೃಪ್ತಿ ಕೊಡಬೇಕು

Team Udayavani, Dec 14, 2017, 3:42 PM IST

ನೆಹರೂನಗರ: ಔದ್ಯೋಗಿಕ ಅವಧಿಯಲ್ಲಿ ನಾವು ಮಾಡುವ ಕಾರ್ಯ ನಮ್ಮ ನಿವೃತ್ತಿಯ ಸಂದರ್ಭ ತೃಪ್ತಿಕೊಟ್ಟರೆ ನಮ್ಮ ವೃತ್ತಿ ಜೀವನ ಸಾರ್ಥಕವಾಯಿತೆಂದು ಖುಷಿಪಡಬಹುದು ಎಂದು ವಿವೇಕಾನಂದ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಡಾ| ಕೆ.ಎಂ. ಕೃಷ್ಣ ಭಟ್‌ ಹೇಳಿದರು.

ಇಲ್ಲಿನ ವಿವೇಕಾನಂದ ಕಾಲೇಜಿನ ಅರ್ಥಶಾಸ್ತ್ರ ವಿಭಾಗ ಮುಖ್ಯಸ್ಥ ಡಾ| ವಿಘ್ನಶ್ವರ ವರ್ಮುಡಿ ನಿವೃತ್ತಿ ಹೊಂದಿದ ಹಿನ್ನೆಲೆಯಲ್ಲಿ ಕಾಲೇಜಿನ ಆಡಳಿತ ಮಂಡಳಿ, ಅಧ್ಯಾಪಕ ಹಾಗೂ ಅಧ್ಯಾಪಕೇತರ ಸಂಘದ ವತಿಯಿಂದ ಆಯೋಜಿಸಲಾದ ಬೀಳ್ಕೊಡುಗೆ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಂಗಳವಾರ ಮಾತನಾಡಿದರು.

ನಾವು ಕರ್ತವ್ಯ ನಿರ್ವಹಿಸಿದ ವಿಭಾಗ, ಸಂಸ್ಥೆಯನ್ನು ಸಮಾಜಮುಖಿಗೊಳಿಸುವುದರಲ್ಲಿ ನಮ್ಮ ಪಾತ್ರವೇನು ಎನ್ನುವುದು ನಮ್ಮ ಕೊಡುಗೆಯನ್ನು ಮೌಲ್ಯಮಾಪನ ಮಾಡು ವಲ್ಲಿ ಸಹಕಾರಿ. ಪ್ರತಿಯೊಬ್ಬರಿಗೂ ಜೀವನೋತ್ಸಾಹ ಇರಬೇಕು. ಅದಕ್ಕೆ ವಯಸ್ಸಿನ ಹಂಗಿಲ್ಲ. ಉತ್ಸಾಹಿ ವ್ಯಕ್ತಿಗಳಿಂದ ಮಾತ್ರ ಸಂಸ್ಥೆ ಬೆಳೆಯುವುದಕ್ಕೆ ಸಾಧ್ಯ. ಪಂಡಿತರು, ಪಿಎಚ್‌ಡಿ ಪಡೆದವರು ಹಲವರು ಸಿಗಬಹುದು. ಆದರೆ ವಿಷಯದ ಆಳಕ್ಕೆ ಅಧ್ಯಯನದ ಬೇರುಗಳನ್ನಿಳಿಸಿ ಸಾಧನೆ ಮೆರೆಯುವವರು ವಿರಳ. ಅಂತಹ ಸಾಧಕರ ಸಂಖ್ಯೆ ಹೆಚ್ಚಬೇಕು. ಸಾಮಾಜಿಕ ಸಮಸ್ಯೆಗಳಿಗೆ ನಮ್ಮ ಸ್ಪಂದನೆ ಏನೆಂಬುದು ಬಹು ಮುಖ್ಯ ವಿಚಾರ ಎಂದರು.

ನಿವೃತ್ತರ ಕುರಿತು ಕಾಲೇಜಿನ ಆಡಳಿತ ಮಂಡಳಿ ಅಧ್ಯಕ್ಷ ಪಿ. ಶ್ರೀನಿವಾಸ ಪೈ, ಸಂಚಾಲಕ ಎಂ.ಟಿ. ಜಯರಾಮ ಭಟ್‌, ಕೋಶಾಧಿಕಾರಿ ಸೇಡಿಯಾಪು ಜನಾರ್ದನ ಭಟ್‌, ವಿವೇಕಾನಂದ ವಿದ್ಯಾವರ್ಧಕ ಸಂಘದ ನಿರ್ದೇಶಕ ಗುಣಪಾಲ ಜೈನ್‌, ಕಾಲೇಜಿನ ಪ್ರಾಚಾರ್ಯ ಡಾ| ಪೀಟರ್‌ ವಿಲ್ಸನ್‌ ಪ್ರಭಾಕರ್‌, ಪ್ರಾಧ್ಯಾಪಕರಾದ ಡಾ| ಅರುಣ್‌ ಪ್ರಕಾಶ್‌, ಪ್ರೊ| ವೆಂಕಟ್ರಮಣ ಭಟ್‌, ಪ್ರೊ| ಶಂಕರನಾರಾಯಣ ಭಟ್‌, ಡಾ| ಶ್ರೀಶಕುಮಾರ್‌, ಮುರಳೀಧರ, ನಿವೃತ್ತ ಉಪನ್ಯಾಸಕ ಪ್ರೊ| ವಿ.ಬಿ. ಅರ್ತಿಕಜೆ, ಪ್ರೊ| ಡಿ.ಎಸ್‌. ಭಟ್‌ ಅನಿಸಿಕೆಗಳನ್ನು ವ್ಯಕ್ತಪಡಿಸಿದರು.

ವಿವೇಕಾನಂದ ವಿದ್ಯಾವರ್ಧಕ ಸಂಘದ ಮಾಜಿ ಅಧ್ಯಕ್ಷ ಎಸ್‌. ಆರ್‌. ರಂಗಮೂರ್ತಿ, ಕಾಲೇಜಿನ ವಿಶ್ರಾಂತ ಪ್ರಾಚಾರ್ಯರಾದ ಪ್ರೊ| ಎ.ವಿ. ನಾರಾಯಣ, ಡಾ| ಶ್ರೀಧರ ಭಟ್‌ ಬಿ., ವಿಶ್ರಾಂತ ಪ್ರಾಧ್ಯಾಪಕರಾದ ಪ್ರೊ| ಎಂ.ಯು. ಪ್ರಭಾಕರ್‌, ಡಾ| ಎನ್‌. ಪರಮೇಶ್ವರ ಭಟ್‌, ವಿವೇಕಾನಂದ ಪಾಲಿಟೆಕ್ನಿಕ್‌ ಕಾಲೇಜಿನ ಪ್ರಾಚಾರ್ಯ ಗೋಪಿನಾಥ್‌ ಶೆಟ್ಟಿ ಉಪಸ್ಥಿತರಿದ್ದರು.

ಇಂಗ್ಲಿಷ್‌ ಉಪನ್ಯಾಸಕಿ ಅಂಬಿಕಾ ಅವರು ಪ್ರಾರ್ಥಿಸಿದರು. ಅಧ್ಯಾಪಕ ಸಂಘದ ಅಧ್ಯಕ್ಷ ಪ್ರೊ| ಕೃಷ್ಣ ಕಾರಂತ್‌ ಅವರು ಸ್ವಾಗತಿಸಿದರು. ವಾಣಿಜ್ಯ ಉಪನ್ಯಾಸಕಿ ರವಿಕಲಾ ವಂದಿಸಿದರು. ಕಂಪ್ಯೂಟರ್‌ ಸೈನ್ಸ್‌ ಉಪನ್ಯಾಸಕಿ ಹರಿಣಿ ಪುತ್ತೂರಾಯ ಕಾರ್ಯ ಕ್ರಮ ನಿರ್ವಹಿಸಿದರು.

ವಿಚಾರ ವಿನಿಮಯ ಮುಖ್ಯ
ಸಮ್ಮಾನ ಸ್ವೀಕರಿಸಿ ಮಾತನಾಡಿದ ಡಾ| ವಿಘ್ನೇಶ್ವರ ವರ್ಮುಡಿ, ಇಂದಿನ ಉಪನ್ಯಾಸಕರಲ್ಲಿ ಹಾಸ್ಯ ಪ್ರವೃತ್ತಿ ಕಡಿಮೆಯಾಗುತ್ತಿದೆ. ಪರಸ್ಪರ ಚರ್ಚಿಸುವ, ವಿಚಾರ ವಿನಿಮಯ ಮಾಡಿಕೊಳ್ಳುವ ಅಭ್ಯಾಸವೂ ವಿರಳಗೊಳ್ಳುತ್ತಿದೆ. ವಿಭಾಗದಲ್ಲಿ ಒಳ್ಳೆಯ ವಾತಾವರಣ ರೂಪಿಸುವುದು ಮುಖ್ಯ. ತನ್ಮೂಲಕ ಶುದ್ಧ ಮನಸ್ಸಿನಿಂದ ತರಗತಿಗೆ ಹೋಗಬಹುದು ಮತ್ತು ಒಳ್ಳೆಯ ರೀತಿಯಲ್ಲಿ ಪಾಠ ಪ್ರವಚನ ನಡೆಸಬಹುದು ಎಂದು ಸಲಹೆ ಇತ್ತರು.