ಟಿಕೆಟ್‌ ರಹಿತ ಪ್ರಯಾಣ: ಸಿಕ್ಕಿಬಿದ್ದು  ದಂಡ ತೆತ್ತ ರೈಲ್ವೇ ಹೋರಾಟಗಾರ

Team Udayavani, Aug 6, 2018, 2:46 PM IST

ಮಂಗಳೂರು: ರೈಲ್ವೇ ಹೋರಾಟಗಾರ ಹಾಗೂ ರೈಲ್ವೇ ಅಭಿವೃದ್ಧಿ ಸಮಿತಿಯ ಮಾಜಿ ಸದಸ್ಯರೊಬ್ಬರು ಪ್ಯಾಸೆಂಜರ್‌ ರೈಲಿನಲ್ಲಿ ಟಿಕೆಟ್‌ ಇಲ್ಲದೆ ಪ್ರಯಾಣಿಸಿ ಟಿಕೆಟ್‌ ತಪಾಸಣಾ ಅಧಿಕಾರಿಗಳ ಕೈಗೆ ಸಿಕ್ಕಿಬಿದ್ದು ದಂಡ ಪಾವತಿಸಿದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಕಬಕ ಪುತ್ತೂರಿನಿಂದ ಮಂಗಳೂರಿಗೆ ಬರುತ್ತಿದ್ದ ರೈಲಿನಲ್ಲಿ ಮಾರ್ಗ ಮಧ್ಯೆ ಅಧಿಕಾರಿಗಳು ತಪಾಸಣೆ ನಡೆಸಿದ್ದರು. ಆಗ ಈ ರೈಲ್ವೇ ಹೋರಾಟಗಾರರ ಬಳಿ ಟಿಕೆಟ್‌ ಇರಲಿಲ್ಲ ಎನ್ನಲಾಗಿದೆ. ತಾನು ರೈಲ್ವೇ ಅಭಿವೃದ್ಧಿ ಸಮಿತಿಯ ಮಾಜಿ ಸದಸ್ಯ ಎಂದು ಪರಿಚಯಿಸಿದರೂ ಟಿಕೆಟ್‌ ಅಥವಾ ಪಾಸ್‌ ಇಲ್ಲದೆ ಪ್ರಯಾಣಿಸಲು ಅವಕಾಶ ಇಲ್ಲ ಎಂದು ಹೇಳಿ ದಂಡ ವಿಧಿಸಿದ್ದಾರೆ. ರೈಲ್ವೇ ಹೋರಾಟಗಾರರು ರೈಲ್ವೇ ಉನ್ನತ ಅಧಿಕಾರಿಗಳನ್ನು ಸಂಪರ್ಕಿಸಲು ಯತ್ನಿಸಿ ದರೂ ದಂಡದಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗಿಲ್ಲ. 

ಘಟನೆ ಜು. 14ರಂದು ನಡೆದಿದ್ದು ತಡವಾಗಿ ಬೆಳಕಿಗೆ ಬಂದಿದೆ. ಕಬಕ ಪುತ್ತೂರಿನಿಂದ ಮಂಗಳೂರು ಸೆಂಟ್ರಲ್‌ಗೆ ಪ್ಯಾಸೆಂಜರ್‌ ರೈಲಿನಲ್ಲಿ ಪ್ರಯಾಣ ದರ 15 ರೂ. ಆಗಿದ್ದು, ಟಿಕೆಟ್‌ ರಹಿತ ಪ್ರಯಾಣಕ್ಕೆ 250 ರೂ. ದಂಡ ಶುಲ್ಕ ಸೇರಿಸಿ ಒಟ್ಟು 265 ರೂ. ಪಾವತಿಸಿ ಸಹಿ ಮಾಡಿದ್ದಾರೆ ಎಂದು ಮಂಗಳೂರು ಸೆಂಟ್ರಲ್‌ ರೈಲು ನಿಲ್ದಾಣದ ಅಧಿಕಾರಿಗಳು ತಿಳಿಸಿದ್ದಾರೆ.