ಮಾನಸಿಕ ಖನ್ನತೆ: ಮನೆಯಲ್ಲೇ ನೇಣು ಬಿಗಿದು ವ್ಯಕ್ತಿ ಆತ್ಮಹತ್ಯೆ

Team Udayavani, Dec 15, 2022, 12:35 AM IST

ಉಳ್ಳಾಲ : ಕೊಣಾಜೆ ಅಸೈಗೋಳಿಯಲ್ಲಿ ವಾಸವಾಗಿದ್ದ ಯುವಕನೊಬ್ಬ ಮನೆಯಲ್ಲೇ ನೇಣು ಬಿಗಿದು ಆತ್ಮಹತ್ಯೆಗೈದಿದ್ದಾನೆ. ಆತ ಮಾನಸಿಕ ಖನ್ನತೆಯಿಂದ ಬಳಲುತ್ತಿದ್ದು, ಆತ್ಮಹತ್ಯೆಗೆ ಇದೇ ಕಾರಣ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಅಸೈಗೋಳಿ ನಿವಾಸಿ ಜಯರಾಮ್‌ ಶೆಟ್ಟಿ ಅವರ ಪುತ್ರ ಅಭಿಲಾಷ್‌ (35) ಆತ್ಮಹತ್ಯೆಗೆ ಶರಣಾದವರು. ಬೆಳಗ್ಗೆ ಎಂದಿನಂತೆ ವಾಕಿಂಗ್‌ಗೆ ತೆರಳಿ ಮನೆಗೆ ಬಂದಿದ್ದ ಇವರು ಕೋಣೆಯಲ್ಲಿ ಸೀರೆಯಿಂದ ನೇಣು ಬಿಗಿದು ಆತ್ಮಹತ್ಯೆಗೈದಿದ್ದಾನೆ. ಘಟನೆಯ ಸಂದರ್ಭ ತಾಯಿ ಮದುವೆಗೆಂದು ತೆರಳಿದ್ದು, ತಂದೆ ಮನೆಯ ಹೊರಗೆ ಕುಳಿತಿದ್ದರು. ಪುತ್ರ ಹೊರಗೆ ಬಾರದೆ ಇದ್ದಾಗ ಸಂಶಯಗೊಂಡು ಕರೆದಿದ್ದು, ಯವುದೇ ಉತ್ತರ ಬರದೇ ಇದ್ದಾಗ ಘಟನೆ ಬೆಳಕಿಗೆ ಬಂದಿದೆ.

ಮೆಡಿಕಲ್‌ ಪ್ರತಿನಿಧಿ ಆಗಿ ಬೆಂಗಳೂರಿನಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಅಭಿಲಾಷ್‌ ತಂದೆಗೆ ಅಪಘಾತವಾದ ಬಳಿಕ ಅಸೈಗೋಳಿಗೆ ಬಂದಿದ್ದು ಮನೆಯಲ್ಲಿಯೇ ಕಾರ್ಯನಿರ್ವಹಿಸುತ್ತಿದ್ದರು. ಪ್ರತೀ ವರ್ಷ ಶಬರಿಮಲೆಗೆ ತೆರಳಲು ಮಾಲಾಧಾರಣೆ ಮಾಡುತ್ತಿದ್ದ ಇವರು ಈ ಬಾರಿ ಮಾಲಾಧಾರಣೆಯನ್ನು ಮಾಡಿಲ್ಲ. ಕಳೆದ ಕೆಲವು ದಿನಗಳಿಂದ ಸ್ನೇಹಿತರೊಂದಿಗೂ ಬೆರೆಯದೆ ಏಕಾಂಗಿಯಾಗಿದ್ದ ಅಭಿಲಾಷ್‌ ಮಾನಸಿಕ ಖನ್ನತೆಯಿಂದ ಬಳಲುತ್ತಿದ್ದರು ಎನ್ನಲಾಗಿದೆ.

ಆರ್ಥಿಕವಾಗಿ ಯಾವುದೇ ಸಮಸ್ಯೆ ಇಲ್ಲದ ಅಭಿಲಾಷ್‌ ಮದುವೆಯಾಗಲು ತಯಾರಿ ನಡೆಸಿದ್ದರು. ಸ್ನೇಹಿತರೊಂದಿಗೆ ಉದ್ಯಮಿಯಾಗುವ ಕನಸು ಹಂಚಿಕೊಂಡಿದ್ದರು. ಮಾನಸಿಕ ಖನ್ನತೆಗೆ ಕಾರಣ ಏನು ಎಂಬುದು ತಿಳಿದು ಬಂದಿಲ್ಲ.
ಕೊಣಾಜೆ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.