Mangaluru -Madgaon ರೈಲು: ವಂದೇ ಭಾರತ್‌ ಪರೀಕ್ಷಾರ್ಥ ಸಂಚಾರ

120 ಕಿ.ಮೀ. ಗರಿಷ್ಠ ವೇಗ

Team Udayavani, Dec 26, 2023, 11:22 PM IST

Mangaluru -Madgaon ರೈಲು: ವಂದೇ ಭಾರತ್‌ ಪರೀಕ್ಷಾರ್ಥ ಸಂಚಾರ

ಮಂಗಳೂರು: ಇದೇ ವರ್ಷಾಂತ್ಯ ಡಿ. 30ರಂದು ಆರಂಭಗೊಳ್ಳಲಿರುವ ಮಂಗಳೂರು-ಮಡಗಾಂವ್‌ ನೂತನ ವಂದೇಭಾರತ್‌ ರೈಲು ಮಂಗಳೂರು ಸೆಂಟ್ರಲ್‌ ರೈಲು ನಿಲ್ದಾಣದಿಂದ ಮಡಗಾಂವ್‌ ವರೆಗೆ ಮಂಗಳವಾರ ಪರಿಶೀಲನಾರ್ಥ ಸಂಚಾರ ನಡೆಸಿತು.

ಮಂಗಳೂರಿನಿಂದ ಬೆಳಗ್ಗೆ 8.30ಕ್ಕೆ ಹೊರಟ ರೈಲು ಸುಮಾರು 3.40 ಗಂಟೆ ಪ್ರಯಾಣಿಸಿ ಮಧ್ಯಾಹ್ನ 12.10ರ ಸುಮಾರಿಗೆ ಮಡಗಾಂವ್‌ ತಲುಪಿದೆ. 12.55ಕ್ಕೆ ಮಡಗಾಂವ್‌ನಿಂದ ರೈಲು ಹೊರಟಿದ್ದು 4.35ಕ್ಕೆ ಮಂಗಳೂರು ಸೆಂಟ್ರಲ್‌ ತಲುಪಿತು. ಮಧ್ಯೆ ಕಾರವಾರ ಮತ್ತು ಉಡುಪಿಯಲ್ಲಿ ನಿಲುಗಡೆ ನೀಡಲಾಗಿದೆ.

ಪರಿಶೀಲನಾ ಸಂಚಾರದ ವೇಳೆ ಮಾರ್ಗದ ಸುರಕ್ಷೆ, ತಗಲುವ ಸಮಯ, ಇರಬಹುದಾದ ಸವಾಲು ಇತ್ಯಾದಿಗಳನ್ನು ವೀಕ್ಷಿಸಲಾಗುತ್ತದೆ ಎಂದು ರೈಲ್ವೇ ಮೂಲಗಳು ತಿಳಿಸಿವೆ. ಮುಖ್ಯ ವಾಗಿ ಮಂಗಳೂರು- ಮಡಗಾಂವ್‌ ಮಾರ್ಗವು ಗಂಟೆಗೆ 120 ಕಿ.ಮೀ. ವೇಗಕ್ಕೆ ನಿರ್ಮಾಣಗೊಂಡಿದೆ. ವಂದೇ ಭಾರತ್‌ ರೈಲನ್ನು 120 ಕಿ.ಮೀ. ಗರಿಷ್ಠ ವೇಗದಲ್ಲಿ ಚಲಾಯಿಸಿ ಪರೀಕ್ಷೆ ನಡೆಸಲಾಗಿದೆ.

ಸಂಸದ ನಳಿನ್‌ ವೀಕ್ಷಣೆ
ಮಂಗಳೂರಿನಿಂದ ಬೆಳಗ್ಗೆ ಹೊರಡುವ ವೇಳೆ ಸಂಸದ ನಳಿನ್‌ ಕುಮಾರ್‌ ಕಟೀಲು, ಶಾಸಕ ವೇದವ್ಯಾಸ ಕಾಮತ್‌ ಮತ್ತಿತರರು ಆಗಮಿಸಿ, ರೈಲನ್ನು ವೀಕ್ಷಿಸಿದರು.

ಈ ವೇಳೆ ನಳಿನ್‌ ಮಾತನಾಡಿ, ಮಂಗಳೂರಿನಿಂದ ಕೋಯಿಕ್ಕೋಡ್‌ಗೆ ಇನ್ನೊಂದು ವಂದೇಭಾರತ್‌ ರೈಲು ಆರಂಭಿಸುವ ಪ್ರಸ್ತಾವವಿದ್ದು ಮುಂದಿನ ಬಾರಿ ಆರಂಭವಾಗುವ ನಿರೀಕ್ಷೆ ಇದೆ. ಹಳಿ ವಿದ್ಯುದೀಕರಣ ಪೂರ್ಣಗೊಂಡರೆ ಮಂಗಳೂರು-ಬೆಂಗಳೂರು ಮಧ್ಯೆಯೂ ಆರಂಭವಾಗಬಹುದು ಎಂದರು.

ಮಂಗಳೂರು ಸೆಂಟ್ರಲ್‌ನ ನೂತನ ಪ್ಲಾಟ್‌ಫಾರಂ 4 ಮತ್ತು 5ರ ಕಾಮಗಾರಿ ಪೂರ್ಣಗೊಂಡಿದ್ದು ಮುಂಬರುವ ಜ. 15ರಂದು ಉದ್ಘಾಟನೆಗೊಳ್ಳಲಿದೆ ಎಂದೂ ನಳಿನ್‌ ತಿಳಿಸಿದರು.

ಮಂಗಳೂರಿನಲ್ಲಿ ತಂಗಲಿದೆ ವಂದೇ ಭಾರತ್‌
ಡಿ. 30ರಂದು ಇತರ ಐದು ವಂದೇಭಾರತ್‌ ರೈಲುಗಳ ಜತೆ ಮಂಗಳೂರು-ಮಡಗಾಂವ್‌ ವಂದೇಭಾರತ್‌ ರೈಲಿಗೆ ಚಾಲನೆ ಸಿಗಲಿದೆ. ಬಳಿಕ ರೈಲು ಪ್ರತೀ ರಾತ್ರಿ ಮಂಗಳೂರು ಸೆಂಟ್ರಲ್‌ ನಿಲ್ದಾಣದಲ್ಲಿ ಸುಧಾರಣೆಗೊಂಡಿರುವ ಪಿಟ್‌ಲೈನಿನಲ್ಲಿ ತಂಗಲಿದೆ.

ರೈಲಿನ ತಾತ್ಕಾಲಿಕ ವೇಳಾಪಟ್ಟಿಯ ಪ್ರಕಾರ ಸೆಂಟ್ರಲ್‌ನಿಂದ ಬೆಳಗ್ಗೆ 8.30ಕ್ಕೆ ಹೊರಟು ಮಧ್ಯಾಹ್ನ 1.05ಕ್ಕೆ ಮಡಗಾಂವ್‌ ತಲಪುವುದು. ಮಡಗಾಂವ್‌ನಿಂದ 6.10ಕ್ಕೆ ಹೊರಟು ರಾತ್ರಿ 10.45ಕ್ಕೆ ಮಂಗಳೂರು ಸೆಂಟ್ರಲ್‌ ತಲುಪುವುದು. ಡಿ. 30ರಂದು ರೈಲಿಗೆ ಚಾಲನೆ ನೀಡಿದ ಬಳಿಕವಷ್ಟೇ ಅಂತಿಮ ವೇಳಾಪಟ್ಟಿ ಬರಬಹುದು.

ರೈಲಿನ ನಂಬರ್‌ ನೀಡುವುದು, ಬುಕ್ಕಿಂಗ್‌ಗೆ ತೆರೆಯುವುದು ಇತ್ಯಾದಿ ಮುಂದೆ ನಡೆಯಲಿದೆ ಎಂದು ರೈಲ್ವೇ ಅಧಿಕಾರಿಗಳು ತಿಳಿಸಿದ್ದಾರೆ.