ರಾಷ್ಟ್ರಪತಿಗೆ ಮಂಗಳೂರಿನಲ್ಲಿ ಸ್ವಾಗತ

Team Udayavani, Dec 28, 2018, 10:00 AM IST

ಮಹಾನಗರ : ಉಡುಪಿಗೆ ಭೇಟಿ ನೀಡುವ ಹಿನ್ನೆಲೆಯಲ್ಲಿ, ರಾಷ್ಟ್ರಪತಿ ರಾಮ್‌ನಾಥ್‌ ಕೋವಿಂದ್‌ ಅವರು ಗುರುವಾರ ಬೆಳಗ್ಗೆ ಮಂಗಳೂರು ವಿಮಾನನಿಲ್ದಾಣಕ್ಕೆ ಆಗಮಿಸಿದರು. ಹೊಸದಿಲ್ಲಿಯಿಂದ  ಯುಸೇನೆಯ ವಿಶೇಷ ವಿಮಾನದ ಮೂಲಕ ಮಂಗಳೂರು ವಿಮಾನ ನಿಲ್ದಾಣಕ್ಕೆ ಬೆಳಗ್ಗೆ 10.45ಕ್ಕೆ ಆಗಮಿಸಿದ ರಾಷ್ಟ್ರಪತಿಯವರನ್ನು ರಾಜ್ಯಪಾಲ ವಾಜೂಬಾೖ ವಾಲಾ ಅವರು ಸ್ವಾಗತಿಸಿದರು.

ಜಿಲ್ಲಾ ಉಸ್ತುವಾರಿ ಸಚಿವ ಯು.ಟಿ. ಖಾದರ್‌, ಮೇಯರ್‌ ಭಾಸ್ಕರ್‌ ಕೆ., ಜಿಲ್ಲಾ ಪಂಚಾಯತ್‌ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೋಡು, ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ಎಸ್‌. ಸಸಿಕಾಂತ್‌ ಸೆಂಥಿಲ್‌, ಅಪರ ಜಿಲ್ಲಾಧಿಕಾರಿ ಕುಮಾರ್‌, ಪೊಲೀಸ್‌ ಆಯುಕ್ತ ಟಿ.ಆರ್‌. ಸುರೇಶ್‌, ಜಿಲ್ಲಾ ಪೊಲೀಸ್‌ ಅಧೀಕ್ಷಕ ರವಿಕಾಂತೇಗೌಡ, ಡಿ.ಸಿ.ಪಿ. ಉಮಾಪ್ರಶಾಂತ್‌, ಸಹಾಯಕ ಕಮಿಷನರ್‌ ರವಿಚಂದ್ರ ನಾಯಕ್‌, ಮನಪಾ ಆಯಕ್ತ ಮೊಹಮ್ಮದ್‌ ನಜೀರ್‌, ಡಿ.ಡಿ.ಎಲ್‌.ಆರ್‌. ಕುಸುಮಾಧರ ಅವರು ಉಪಸ್ಥಿತರಿದ್ದರು. 11 ಗಂಟೆ ಸುಮಾರಿಗೆ ಮಂಗಳೂರು ವಿಮಾನ ನಿಲ್ದಾಣದಿಂದ ಹೆಲಿ ಕಾಪ್ಟರ್‌ ಮೂಲಕ ರಾಷ್ಟ್ರಪತಿಗಳು ಉಡುಪಿಗೆ ತೆರಳಿದರು.

ರಾಷ್ಟ್ರಪತಿ ಆಗಮಿಸುವ ಅರ್ಧ ತಾಸು ಮುನ್ನ ರಾಜ್ಯಪಾಲ ವಾಜೂಬಾೖ ವಾಲಾ ವಿಶೇಷ ವಿಮಾನದಲ್ಲಿ ಬೆಂಗಳೂರಿನಿಂದ ಮಂಗಳೂರು ವಿಮಾನ ನಿಲ್ದಾಣಕ್ಕೆ ಆಗಮಿಸಿದ್ದರು. ಬಳಿಕ ಅವರು ವಿಮಾನ ನಿಲ್ದಾಣದಲ್ಲಿ ವಿಶ್ರಾಂತಿ ಪಡೆದರು. ಇದೇ ವೇಳೆ ಸಚಿವ ಯು.ಟಿ. ಖಾದರ್‌, ಮೇಯರ್‌ ಭಾಸ್ಕರ್‌ ಕೆ. ಜತೆಗಿದ್ದರು. ಉಡುಪಿ ಕಾರ್ಯಕ್ರಮ ಮುಗಿಸಿ ಹೆಲಿಕಾಪ್ಟರ್‌ ಮೂಲಕ ಮಂಗಳೂರು ವಿಮಾನ ನಿಲ್ದಾಣಕ್ಕೆ ಮಧ್ಯಾಹ್ನ 1.20ಕ್ಕೆ ಆಗಮಿಸಿದ ರಾಷ್ಟ್ರಪತಿಗಳನ್ನು ಜಿಲ್ಲಾಧಿಕಾರಿ ಸಹಿತ ಹಲವರು ಬರಮಾಡಿಕೊಂಡರು. ಬಳಿಕ 1.30ಕ್ಕೆ ವಾಯುಸೇನೆ ವಿಶೇಷ ವಿಮಾನದಲ್ಲಿ ಮುಂಬಯಿಗೆ ತೆರಳಿದರು.