ಗಾಳಿ: ಲಾರಿ ಮೇಲೆ ಉರುಳಿದ ಮರ

Team Udayavani, Apr 4, 2018, 7:48 AM IST

ಬೆಳ್ತಂಗಡಿ: ಮಂಗಳವಾರ ಸಂಜೆ ಬೆಳ್ತಂಗಡಿ ತಾಲೂಕಿನ ವಿವಿಧೆಡೆ ಮಳೆ ಸುರಿದಿದ್ದು, ಉಜಿರೆಯ ನೀರಚಿಲುಮೆ ಬಳಿ ರಾಜ್ಯ ಹೆದ್ದಾರಿಯಲ್ಲಿ ಸಂಚರಿಸುತ್ತಿದ್ದ ಮಿನಿ ಲಾರಿಯ ಮೇಲೆ ಮರ ಬಿದ್ದು ಹಾನಿ ಸಂಭವಿಸಿದೆ. ಸ್ವಲ್ಪ ಸಮಯ ಉಜಿರೆ – ಧರ್ಮಸ್ಥಳ ರಸ್ತೆ ಸಂಚಾರಕ್ಕೆ ಅಡ್ಡಿಯುಂಟಾಯಿತು.

ಹಲವು ವಿದ್ಯುತ್‌ ಕಂಬಗಳಿಗೂ ಹಾನಿಯುಂಟಾಗಿದೆ. ಕನ್ಯಾಡಿ-2 ಶಾಲೆ ಬಳಿ ವಿದ್ಯುತ್‌ ತಂತಿಗಳ ಮೇಲೆ ಮರಬಿದ್ದು ಹಾನಿಯುಂಟಾಗಿದೆ.

ಗುಡುಗು ಸಿಡಿಲು ಗಾಳಿ ಸಹಿತ ಮಳೆ ಸುರಿದಿದ್ದರಿಂದ ಮುಂಡಾಜೆ, ಕಲ್ಮಂಜ, ಮುಲಾರು ಮೊದಲಾದೆಡೆ 500ಕ್ಕೂ ಹೆಚ್ಚು ಅಡಿಕೆ ಮರ, ರಬ್ಬರ್‌ ಮರಗಳಿಗೆ ಹಾನಿಯಾಗಿದೆ. ಪರಾರಿ ಸಿದ್ದಬೈಲು ಮಾರ್ಗದ ಪಿಲತಡ್ಕ ಬಳಿ 5 ವಿದ್ಯುತ್‌ ಕಂಬಗಳು ನೆಲಕಚ್ಚಿವೆ. ಉಜಿರೆ, ಕನ್ಯಾಡಿ ಮೊದಲಾದೆಡೆ ವಿದ್ಯುತ್‌ ಕಂಬಗಳಿಗೆ ಹಾನಿಯಾಗಿದೆ. ಮಂಗಳವಾರ ಸಂಜೆಯಿಂದಲೇ ನಗರ ಸಹಿತ ತಾಲೂಕಿನ ವಿವಿಧೆಡೆ ವಿದ್ಯುತ್‌ ವ್ಯತ್ಯಯ ಉಂಟಾಗಿ ಕತ್ತಲು ಆವರಿಸಿತ್ತು.