ನಿಷ್ಠಾವಂತರ ಬೇಸರಕ್ಕೆ ಶೀಘ್ರದಲ್ಲೇ ಪರಿಹಾರ

Team Udayavani, Mar 5, 2017, 12:48 PM IST

ದಾವಣಗೆರೆ: ಜಿಲ್ಲೆಯಲ್ಲಿ ಪಕ್ಷದ ನಿಷ್ಠಾವಂತ ಕಾರ್ಯಕರ್ತರು ಅನುಭವಿಸುತ್ತಿರುವ ಸಮಸ್ಯೆಗಳ ಕುರಿತು ಪಕ್ಷದ ವರಿಷ್ಠರಿಗೆ ಸಂಪೂರ್ಣ ಮಾಹಿತಿ ಇದ್ದು, ಶೀಘ್ರದಲ್ಲೇ ಎಲ್ಲಾ ಸಮಸ್ಯೆ ಇತ್ಯರ್ಥ ಆಗಲಿವೆ ಎಂದು ವಿಧಾನ ಪರಿಷತ್‌ ನೂತನ ಸದಸ್ಯ ರಮೇಶ್‌ ಬಾಬು ಕಾರ್ಯಕರ್ತರಿಗೆ ಭರವಸೆ ನೀಡಿದ್ದಾರೆ. 

ವಿಧಾನ ಪರಿಷತ್‌ಗೆ ಆಗ್ನೇಯ ಶಿಕ್ಷಕರ ಕ್ಷೇತ್ರದಿಂದ ನಡೆದ ಉಪ ಚುನಾವಣೆಯಲ್ಲಿ ಆಯ್ಕೆಯಾದ ಹಿನ್ನೆಲೆಯಲ್ಲಿ ಶನಿವಾರ ರೋಟರಿ ಬಾಲಭವನದಲ್ಲಿ ಪಕ್ಷದಿಂದ ಹಮ್ಮಿಕೊಂಡಿದ್ದ ಸಮಾರಂಭದಲ್ಲಿ ಸನ್ಮಾನಿತರಾಗಿ ಮಾತನಾಡಿದ ಅವರು, ದಾವಣಗೆರೆ ಜಿಲ್ಲೆಯಲ್ಲಾಗುತ್ತಿರುವ ಪಕ್ಷದ ಪ್ರತೀ ಬೆಳವಣಿಗೆ ಕುರಿತು ವರಿಷ್ಠರಾದ ದೇವೇಗೌಡ, ಕುಮಾರಸ್ವಾಮಿಯವರಿಗೆ ಮಾಹಿತಿ ಇದೆ.

ಸದ್ಯದಲ್ಲೇ ಒಳ್ಳೆಯ ತೀರ್ಮಾನ ತೆಗೆದುಕೊಳ್ಳಲಿದ್ದಾರೆ ಎಂದರು. ಪಕ್ಷದ ಜಿಲ್ಲಾ ಮುಖಂಡರೆನ್ನಿಸಿಕೊಂಡವರು ಪಕ್ಷದ ಕಾರ್ಯಕರ್ತರನ್ನು ಕಡೆಗಣಿಸುತ್ತಿರುವುದು ಸ್ವತಃ ನನ್ನ ಅನುಭವಕ್ಕೂ ಬಂದಿದೆ. ಇಂತಹ ಬೆಳವಣಿಗೆಯಿಂದ ನನಗೆ ಬೇಸರ ಆಗಿದೆ. ಆದರೆ, ಕಾರ್ಯಕರ್ತರು ಎದೆಗುಂದ ಬೇಕಿಲ್ಲ.

ನಾನು ಹಲವಾರುವರ್ಷಗಳಿಂದ ಪಕ್ಷಕ್ಕಾಗಿ ದುಡಿದಿದ್ದೇನೆ. ಪಕ್ಷದ ಇಬ್ಬರೂ ವರಿಷ್ಠರು ಮಾತನಾಡಿಕೊಂಡೇ ನನಗೆ ಟಿಕೆಟ್‌ ಕೊಟ್ಟಿದ್ದಾರೆ. ಕುಮಾರಸ್ವಾಮಿಯವರೇ ನಾನು ಅಭ್ಯರ್ಥಿ ಆಗಬೇಕು ಎಂಬುದಾಗಿ ಬಯಸಿದ್ದರು. ಆದರೆ, ರಾಜಕೀಯ ಕಾರಣಗಳಿಂದ ಕೆಲ ನಡವಳಿಕೆ ವ್ಯತ್ಯಾಸ ಕಂಡುಬಂದವು. ಅಂತಹ ಬೆಳವಣಿಗೆ ರಾಜಕಾರಣದಲ್ಲಿ ಸಹಜ.

ಇದರ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಕಿಲ್ಲ ಎಂದು ಅವರು ತಿಳಿಸಿದರು,. ಈ ಚುನಾವಣೆ ಪಕ್ಷದಲ್ಲೊಂದು ಹೊಸ ಸಂಚಲನ ಸೃಷ್ಟಿಸಿದೆ. ಬೆಳಗಾವಿಯಿಂದ ಕೋಲಾರದವರೆಗೆ ಪಕ್ಷದ ಕಾರ್ಯಕರ್ತರು ಪಟಾಕಿ ಸಿಡಿಸಿ, ಗೆಲುವು ಸಂಭ್ರಮಿಸಿದ್ದಾರೆ. ಮುಂದಿನ ವಿಧಾನ ಸಭಾ ಚುನಾವಣೆಯಲ್ಲೂ ಸಹ ಇದೇ ರೀತಿಯ ಫಲಿತಾಂಶ ಹೊರಬೀಳುವುದು ಖಚಿತ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ.

ಇದನ್ನು ನಿಜ ಮಾಡಲು ಪಕ್ಷದ ಕಾರ್ಯಕರ್ತರು ಶ್ರಮಿಸಬೇಕು ಎಂದು ಅವರು ಮನವಿ ಮಾಡಿದರು. ನನಗೆ ಜಿಲ್ಲೆಯ ಮೂರು ವಿಧಾನ ಸಭಾ ಕ್ಷೇತ್ರಗಳ ವ್ಯಾಪ್ತಿ ಬರುತ್ತದೆ. ಪಕ್ಷ ಸಂಘಟನೆ ಕೆಲಸ ಮಾಡಲು ನಾನು ಸದಾ ಸಿದ್ಧ. ಯಾವುದೇ ಹಿಂಜರಿಕೆಯಿಲ್ಲದೆ ನನ್ನನ್ನು ನೀವು ಕರೆಯಿರಿ. ಗ್ರಾಮೀಣ ಭಾಗದಲ್ಲಿ ಕೆಲಸ ಆಗಬೇಕಿದ್ದರೆ ನೇರ ನನ್ನನ್ನು ಬಂದು ಸಂಪರ್ಕಿಸಿ.

ಶಿಕ್ಷಕರ ಪ್ರತಿನಿಧಿ ಎಂಬ ಕಾರಣಕ್ಕೆ ಕೇವಲ ಶಿಕ್ಷಕರ ಕೆಲಸಕ್ಕೇನಾನು ಸೀಮಿತವಾಗಿರುವುದಿಲ್ಲ. ಎಲ್ಲರ ಕೆಲಸ ಮಾಡುವುದು ನನ್ನ ಜವಾಬ್ದಾರಿ ಆಗಿದೆ. ಪಕ್ಷ ಸಂಘಟನೆಗೆ ಎಲ್ಲರೂ ಒತ್ತುಕೊಡಿ ಎಂದರು. ದಾವಣಗೆರೆಯಲ್ಲಿ ಹಿಂದುಳಿದ ವರ್ಗಗಳ ಬೃಹತ್‌ ಸಮಾವೇಶ ನಡೆಸುವ ಚಿಂತನೆ ಇದೆ. ಇದಕ್ಕಾಗಿ ನೀವೆಲ್ಲಾ ಒಗ್ಗಟ್ಟಿನಿಂದ ಕೆಲಸ ಮಾಡಿ. ಸಣ್ಣ ಸಣ್ಣ ಸಮಸ್ಯೆಗಳಿಗೆ ಕಿವಿ ಕೊಡಬೇಡಿ. 

ಜೊತೆಗೆ ಯಾರಿಗೂ ಸಹ ಅಗೌರವ ತೋರಿಸಬೇಡಿ. ಪಕ್ಷದ ಒಳಿತಿಗಾಗಿ ದುಡಿಯಿರಿ ಎಂದು ಅವರು ಕಿವಿಮಾತು ಹೇಳಿದರು. ಜಿಪಂ ಸದಸ್ಯ ಸಣ್ಣ ಪಕೀರಪ್ಪ, ಬಸವರಾಜ ಪಾದಯಾತ್ರಿ, ಪಕ್ಷದ ಮುಖಂಡರಾದ ಟಿ. ದಾಸಕರಿಯಪ್ಪ, ಜೆ. ಅಮಾನುಲ್ಲಾ ಖಾನ್‌, ಟಿ. ಅಸರ್‌, ಹೂವಿನಮಡು ಚಂದ್ರಪ್ಪ, ಎಚ್‌.ಸಿ. ಗುಡ್ಡಪ್ಪ, ಕೆ. ದಾದಾಪೀರ್‌, ಬೆಳವನೂರು ನಾಗೇಶ್‌ರಾವ್‌, ಕೆ.ಬಿ. ಕಲ್ಲೇರುದ್ರೇಶಪ್ಪ ಇತರರು ವೇದಿಕೆಯಲ್ಲಿದ್ದರು.