BJP; ದಾವಣಗೆರೆ ಟಿಕೆಟ್ ಮುಂದೆಯೂ ನನಗೇ ಕೊಡುತ್ತಾರೆ: ಸಂಸದ ಜಿ.ಎಂ. ಸಿದ್ದೇಶ್ವರ

Team Udayavani, Feb 21, 2024, 8:25 PM IST

ದಾವಣಗೆರೆ : ”ಲೋಕಸಭೆ ಚುನಾವಣೆಯಲ್ಲಿ ನಾನು ಎಂದೂ ಟಿಕೆಟ್ ಕೇಳಿರಲಿಲ್ಲ ಆದರೂ ನನಗೇ ಟಿಕೆಟ್ ಕೊಡುತ್ತ ಬಂದಿದ್ದಾರೆ, ಮುಂದೆಯೂ ನನಗೇ ಕೊಡುತ್ತಾರೆ. ಜನರು ಮುಂದೆಯೂ ಆಶೀರ್ವಾದ ಮಾಡುತ್ತಾರೆ” ಎಂದು ಬಿಜೆಪಿ ಸಂಸದ ಜಿ.ಎಂ. ಸಿದ್ದೇಶ್ವರ ಬುಧವಾರ ಹೇಳಿಕೆ ನೀಡಿದ್ದಾರೆ.

ದಾವಣಗೆರೆ ಎಂಪಿ ಟಿಕೆಟ್ ವಿಚಾರಕ್ಕೆ ಸಂಬಂಧಿಸಿ ಪ್ರತಿಕ್ರಿಯಿಸಿ, ”ದೆಹಲಿಯಲ್ಲಿ ರಾಷ್ಟ್ರೀಯ ಸಮಾವೇಶ ಇತ್ತು ಅದಕ್ಕೆ ಹೋಗಿದ್ದೆ. ನಾನು ಟಿಕೆಟ್ ಕೇಳಲು ಹೋಗಲ್ಲ, ಪಕ್ಷದ ತೀರ್ಮಾನ ಅಂತಿಮ. ಯಾರಿಗೆ ಟಿಕೆಟ್ ಬೇಕೋ ಅವರು ಕೇಳಲು ಹೋಗುತ್ತಾರೆ. ಸ್ಪರ್ಧೆ ಯಾವಾಗಲೂ ಇರುತ್ತದೆ. ಈ ಸಲ ಸ್ವಲ್ಪ ಪ್ರಬಲವಾಗಿದೆ” ಎಂದರು.

ಪುತ್ರನಿಗೆ ಟಿಕೆಟ್ ಕೊಡಿಸುತ್ತಾರೆ ಅನ್ನೋ ವಿಚಾರ ಪ್ರತಿಕ್ರಿಯಿಸಿ, ”ಅದು ಭಗವಂತನ ಇಚ್ಛೆ” ಎಂದರು.

ಭಾರತ್ ಅಕ್ಕಿ ಹೆಸರಲ್ಲಿ ಕಳಪೆ ಅಕ್ಕಿ ವಿತರಣೆ ಎಂಬ ಸಚಿವ ಕೆ.ಹೆಚ್. ಮುನಿಯಪ್ಪ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿ ”ಮುನಿಯಪ್ಪ ಮೊದಲು ಅವರು ಹೇಳಿದಂತೆ ಜನರಿಗೆ ೧೦ಕೆಜಿ ಅಕ್ಕಿ ಕೊಡಲಿ. ಆಮೇಲೆ ಭಾರತ್ ಅಕ್ಕಿ ಬಗ್ಗೆ ಮಾತನಾಡಲಿ.ಕಳಪೆ ಹೇಗೆ ಕೊಡೋಕೆ ಬರುತ್ತೆ? ವಿರೋಧ ಪಕ್ಷದವರಿಗೆ ಏನು ಕೆಲಸವಿದೆ. ಹೀಯಾಳಿಸುವುದೇ ಅವರ ಕೆಲಸ” ಎಂದರು.