Benne Dose: ದಾವಣಗೆರೆ ಬೆಣ್ಣೆ ದೋಸೆಗೂ ಜಿಲ್ಲಾಡಳಿತದಿಂದ ಬ್ರ್ಯಾಂಡಿಂಗ್‌

Team Udayavani, Dec 2, 2023, 8:28 AM IST

ದಾವಣಗೆರೆ: ವಿಶಿಷ್ಟ ರುಚಿಯಿಂದ ಗಮನ ಸೆಳೆದಿರುವ “ದಾವಣಗೆರೆ ಬೆಣ್ಣೆದೋಸೆ’ಗೆ ಶುಕ್ರದೆಸೆ ಬಂದಿದೆ. ಜಿಲ್ಲಾಡಳಿತದಿಂದಲೇ ಬ್ರ್ಯಾಂಡಿಂಗ್‌ ಮಾಡಿ ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೆಣ್ಣೆದೋಸೆಯ ಸವಿರುಚಿ ಹರಡಿಸುವ ಪ್ರಯತ್ನ ನಡೆದಿದೆ. ದಾವಣಗೆರೆ ಬೆಣ್ಣೆದೋಸೆಗೊಂದು ಬ್ರ್ಯಾಂಡ್‌ ಸೃಷ್ಟಿಸಿ ಇದನ್ನು ಪ್ರವಾಸೋದ್ಯದ ಜತೆ ಮೇಳೈಸುವ ಹೊಸ ಪ್ರಯತ್ನಕ್ಕೆ ಜಿಲ್ಲಾಡಳಿತ ಮುಂದಾಗಿದೆ.

ಬೆಣ್ಣೆದೋಸೆಯ ಗುಣಮಟ್ಟ ಖಾತ್ರಿ ಪಡಿಸಿಕೊಳ್ಳಲು ಜಿಲ್ಲಾಡಳಿತ ಇಲ್ಲಿಯ ಬೆಣ್ಣೆದೋಸೆ ಹೋಟೆಲ್‌ಗ‌ಳನ್ನು ಆಹಾರ ಸುರಕ್ಷತಾ ಕಾಯ್ದೆಯನ್ವಯ ಪರಿಶೀಲನೆ ನಡೆಸಲಿದೆ. ದೋಸೆಗೆ ಬಳಸುವ ಧಾನ್ಯಗಳು, ಬೆಣ್ಣೆ ಮತ್ತು ಸಿಬ್ಬಂದಿ ಆರೋಗ್ಯ ತಪಾಸಣೆ ಸೇರಿ ಎಲ್ಲ ಆಯಾಮಗಳಲ್ಲಿ ಅಲ್ಲಿನ ಶುಚಿತ್ವ, ಗುಣಮಟ್ಟವನ್ನು ಸಾರ್ವಜನಿಕರ ಆರೋಗ್ಯ ಸುರಕ್ಷತೆಯ ಮಾನದಂಡಗಳ ಮೂಲಕ ಪರಿಶೀಲಿಸಲಾಗುತ್ತದೆ. ಬಳಿಕವಷ್ಟೇ ಜಿಲ್ಲಾಡಳಿತದಿಂದ ಬ್ರ್ಯಾಂಡಿಂಗ್‌ ಪ್ರಮಾಣ ಪತ್ರ ನೀಡುವ ಮೂಲಕ ಪ್ರವಾಸೋದ್ಯಮಕ್ಕೆ ಇಂಥ ಹೋಟೆಲ್‌ ಗಳನ್ನು ಜೋಡಣೆ ಮಾಡಲು ಯೋಜನೆ ಹಾಕಿಕೊಳ್ಳಲಾಗಿದೆ.

ಬೆಣ್ಣೆ ದೋಸೆ ಹೋಟೆಲ್‌ಗ‌ಳಿಗೆ ಪ್ರಮಾಣ ಪತ್ರ ನೀಡಲು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿಗಳು, ಪಾಲಿಕೆ ಆಯುಕ್ತರು, ಆಹಾರ ಸುರಕ್ಷತಾ ಕಾಯ್ದೆ ಅಂಕಿತ ಅಧಿಕಾರಿಗಳು, ಸ್ಮಾರ್ಟ್‌ಸಿಟಿ ವ್ಯವಸ್ಥಾಪಕ ನಿರ್ದೇಶಕರು, ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಉಪನಿರ್ದೇಶಕರು ಒಳಗೊಂಡ ಸಮಿತಿ ರಚಿಸಿ ಅಧ್ಯಯನ ವರದಿ ನೀಡಲು ಸಹ ಜಿಲ್ಲಾಡಳಿತ ಈಗಾಗಲೇ ಸೂಚನೆ ನೀಡಿದೆ.