ಮಠದ ಏಳ್ಗೆಗೆ ಕೊಡುಗೆ ನೀಡಿ

Team Udayavani, Feb 27, 2017, 12:57 PM IST

ದಾವಣಗೆರೆ: ಹಾಲುಮತ ಸಮಾಜದ ನೌಕರರ ಬಾಂಧವರು ಮಠದ ಏಳಿಗೆಗೂ ತಮ್ಮ ಕಾಣಿಕೆ ನೀಡಬೇಕು ಎಂದು ಕಾಗಿನೆಲೆ ಕನಕ ಗುರುಪೀಠದ ಶ್ರೀ ನಿರಂಜನಾನಂದ ಪುರಿ ಸ್ವಾಮೀಜಿ ತಿಳಿಸಿದ್ದಾರೆ. ಭಾನುವಾರ ಕುವೆಂಪು ಕನ್ನಡ ಭವನದಲ್ಲಿ ಜಿಲ್ಲಾ ಕನಕ ನೌಕರರ ಬಳಗ ಹಮ್ಮಿಕೊಂಡಿದ್ದ ಹಾಲುಮತೋತ್ಸವ, ಪ್ರತಿಭಾ ಪುರಸ್ಕಾರ ಸಮಾರಂಭ ಉದ್ಘಾಟಿಸಿ, ಮಾತನಾಡಿದರು.

ಸಮಾಜದ ಸರ್ಕಾರಿ ನೌಕರರು ಮಠದ ಏಳಿಗೆ ಕನಿಷ್ಠ ತಿಂಗಳಿಗೆ 100 ರೂ. ಗಳನ್ನಾದರೂ ನೀಡಬೇಕು. ಮೈಗೆ ಎಣ್ಣೆ ಹಚ್ಚಿಕೊಂಡವರಂತೆ ವರ್ತಿಸಬಾರದು ಎಂದು ಖಾರವಾಗಿ ಹೇಳಿದರು. ಮಠದಲ್ಲಿ ಪ್ರಸ್ತುತ 250 ವಿದ್ಯಾರ್ಥಿಗಳು ವಸತಿಯುತ ಶಿಕ್ಷಣ ಪಡೆಯುತ್ತಿದ್ದಾರೆ. ಅರ್ಹ, ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಐಎಎಸ್‌, ಐಪಿಎಸ್‌ ಸ್ಪರ್ಧಾತ್ಮಕ ಪರೀಕ್ಷೆಗೆ ತರಬೇತಿ ಸಹ ನೀಡಲಾಗುತ್ತಿದೆ.

ಮಠದ ಸಮುದಾಯದ ವಿದ್ಯಾರ್ಥಿಗಳ ಶಿಕ್ಷಣದ ಅಗತ್ಯತೆ ಪೂರೈಕೆಗೆ ಶ್ರಮಿಸುತ್ತಿದೆ. ಇಂತಹ ಹಂತದಲ್ಲಿ ಸರ್ಕಾರಿ ನೌಕರರು ತಮ್ಮ ಸಹಕಾರ ನೀಡಬೇಕಿದೆ ಎಂದು ತಿಳಿಸಿದರು. ಮಾಜಿ ಶಾಸಕ ಕೆ. ಮಲ್ಲಪ್ಪ ಮಾತನಾಡಿ, ಮಠದಿಂದ ಪ್ರತಿಭಾವಂತ ಅಭ್ಯರ್ಥಿಗಳಿಗೆ ನೀಡಲಾಗುತ್ತಿರುವ ಐಎಎಸ್‌, ಐಪಿಎಸ್‌ ತರಬೇತಿಯನ್ನು ಎಲ್ಲಾ ಸಮಾಜವರಿಗೂ ವಿಸ್ತರಿಸಬೇಕು.

ಕನಕದಾಸರ ವಿಚಾರ ಧಾರೆಗಳು, ನಮ್ಮ ಸಮಾಜದ ಉತ್ತಮ ಆದರ್ಶಗಳು ಎಲ್ಲಾ ಸಮಾಜಕ್ಕೆ ತಿಳಿಸುವಂತೆ ಆಗಬೇಕು. ಆದರೆ, ಇತೀ¤ಚಿನೆ ಬೆಳವಣಿಗೆಗಳು ಇದಕ್ಕೆ ವ್ಯತಿರಿಕ್ತವಾಗಿವೆ ಎಂದರು. ಇತೀ¤ಚಿನ ದಿನಗಳಲ್ಲಿ ಕನಕದಾಸ ಜಯಂತಿಯನ್ನು ಕೇವಲ ನಮ್ಮ ಸಮಾಜದವರು ಮಾತ್ರ ಆಚರಿಸುವಂತಹ ಸ್ಥಿತಿ ನಿರ್ಮಾಣವಾಗಿದೆ. ಇದು ಬದಲಾಗಬೇಕು. 

ಮುಂದಿನ ದಿನಗಳಲ್ಲಿ ಕನಕದಾಸರನ್ನು ಕುಬjರನ್ನಾಗಿಸುವ ಬದಲು ಎಲ್ಲಾ ಸಮಾಜದವರು ಒಟ್ಟುಗೂಡಿ ಆಚರಿಸುವಂತೆ ಆಗಬೇಕು ಎಂದು ಆಶಿಸಿದರು. ಹೊಸದುರ್ಗದ ಕಲ್ಲೋಡಿನ ಶ್ರೀ ಈಶ್ವರಾನಂದಪುರಿ ಸ್ವಾಮೀಜಿ ಮಾತನಾಡಿ, ಸಮುದಾಯದ ಕಾರ್ಯಕ್ರಮಗಳಲ್ಲಿ ಗಂಭೀರ ವಿಷಯಗಳ ಚಿಂತನೆ ನಡೆಯುತ್ತಿಲ್ಲ.

ಓದುವ ಸಂಸ್ಕೃತಿ ಹಾಗೂ ಜ್ಞಾನ ಸಂಪಾದನೆಯಲ್ಲಿ ಎಲ್ಲರೂ ಹಿಂದೆಬಿದ್ದಿದ್ದಾರೆ. ಇದನ್ನು ಬದಲಾಯಿಸಬೇಕು.  ಕನಕ ಗುರುಪೀಠದಿಂದ 11 ಸಂಪುಟಗಳ ಗ್ರಂಥಮಾಲಿಕೆಯನ್ನು ಹೊರತರಲಾಗುತ್ತಿದ್ದು, ಸಮಾಜದ ಪ್ರತಿಯೊಬ್ಬ ವ್ಯಕ್ತಿಯು  ಗ್ರಂಥಮಾಲಿಕೆಯನ್ನು ಖರೀದಿಸಬೇಕು ಎಂದು ಹೇಳಿದರು. 

ನಿವೃತ್ತ ಪ್ರಾಂಶುಪಾಲ ಡಾ| ನಾ. ಲೋಕೇಶ್‌ ಒಡೆಯರ್‌ ಮಾತನಾಡಿ, ಕಾಲ, ಕಾಯಕ ಕಾಸು ಇವುಗಳನ್ನು ಗೌರವಿಸಿದಾಗ ಮಾತ್ರ ಪ್ರಗತಿ ಹೊಂದಲು ಸಾಧ್ಯ. ಪ್ರತಿಭೆ ಎನ್ನುವುದು ಯಾವುದೋ ಒಂದು ಜಾತಿಯ ಸ್ವತ್ತಲ್ಲ. ಶ್ರದ್ಧೆ, ಪ್ರಾಮಾಣಿಕತೆ, ಜ್ಞಾನದ ಹಸಿವು ಇರುವ  ಎಲ್ಲರೂ ಜ್ಞಾನ ಸಂಪಾದನೆಮಾಡಬಹುದು ಎಂದರು. 

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಡಾ| ಭೀಮಾಶಂಕರ್‌ ಎಸ್‌. ಗುಳೇದ್‌, ಡಾ| ಉದಯ ಶಂಕರ್‌ ಒಡೆಯರ್‌, ಜಿಲ್ಲಾ ಪಂಚಾಯತ್‌ ಸದಸ್ಯೆ ಜಯಶೀಲಾ, ಮುಖಂಡರಾದ ಎಂ. ಕರಿಯಪ್ಪ, ಟಿ. ನಾಗರಾಜಪ್ಪ, ಬಿ.ಟಿ. ಹನುಮಂತಪ್ಪ, ಎಚ್‌ .ಬಿ. ಪರುಶುರಾಮಪ್ಪ, ಪ್ರೊ. ಬಾಗೂರು ಆನಂದಪ್ಪ, ಯುಗಧರ್ಮ ರಾಮಣ್ಣ, ಕೆ. ದೇವೇಂದ್ರಪ್ಪ ಇತರರು ವೇದಿಕೆಯಲ್ಲಿದ್ದರು. ಸಮಾಜದ ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಸನ್ಮಾನಿಸಿ, ಗೌರವಿಸಲಾಯಿತು.