ದಾವಣಗೆರೆ: ಕೋವಿಡ್ ಗೆ 5 ಸಾವು; ಬಲಿಯಾದವರ ಸಂಖ್ಯೆ 126ಕ್ಕೆ ಏರಿಕೆ

Team Udayavani, Aug 15, 2020, 9:05 PM IST

ಸಾಂದರ್ಭಿಕ ಚಿತ್ರ

ದಾವಣಗೆರೆ: ಜಿಲ್ಲೆಯಲ್ಲಿ ಶನಿವಾರ ಕೋವಿಡ್ ನಿಂದ ಐವರು ಸಾವನ್ನಪ್ಪಿದ್ದಾರೆ. ತೀವ್ರ ಮಧುಮೇಹ, ರಕ್ತದೊತ್ತಡ ದಿಂದ ಬಳಲುತ್ತಿದ್ದ ದಾವಣಗೆರೆಯ ನಿಟುವಳ್ಳಿಯ 65 ವರ್ಷದ ವೃದ್ಧ (ರೋಗಿ ನಂಬರ್ 192736), ಕೆಟಿಜೆ ನಗರದ 63 ವರ್ಷದ ವೃದ್ಧ (ರೋಗಿ ನಂಬರ್ 226285), ಹಾವೇರಿ ಜಿಲ್ಲೆಯ ರಟ್ಟಿಹಳ್ಳಿಯ 70 ವರ್ಷದ ವೃದ್ಧ (ರೋಗಿ ನಂಬರ್ 204798), ಹರಿಹರದ ಹರ್ಲಾಪುರದ 65 ವರ್ಷದ ವೃದ್ಧ(ರೋಗಿ‌ ನಂಬರ್ 220222), ದಾವಣಗೆರೆ ವಿನೋಬ ನಗರದ 78 ವರ್ಷದ ವೃದ್ಧ (ರೋಗಿ ನಂಬರ್ 187854) ಮೃತಪಟ್ಟವರು.

ಐವರ ನಿಧನದಿಂದ ಜಿಲ್ಲೆಯಲ್ಲಿ ಕೋವಿಡ್ ಗೆ ಬಲಿಯಾದವರ ಸಂಖ್ಯೆ 126 ಆಗಿದೆ. ಜಿಲ್ಲೆಯಲ್ಲಿ ಶನಿವಾರ ಒಂದೇ ದಿನ 327 ಜನರಲ್ಲಿ ಸೋಂಕು ದೃಢಪಟ್ಟಿದೆ. ದಾವಣಗೆರೆ ನಗರ ಮತ್ತು ತಾಲೂಕಿನ 162, ಹರಿಹರದ 73, ಜಗಳೂರಿನ 7, ಹೊನ್ನಾಳಿ, ಚನ್ನಗಿರಿಯ ತಲಾ 26, ಹೊರ ಜಿಲ್ಲೆಯ 13 ಜನರು ಒಳಗೊಂಡಂತೆ 327 ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ.

ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ ಐದು ಸಾವಿರ ದಾಟಿದೆ. ಜಿಲ್ಲೆಯಲ್ಲಿ ಒಟ್ಟು 5070 ಪ್ರಕರಣಗಳಿವೆ. ಕೊರೊನಾದಿಂದ ಗುಣಮುಖರಾದ 267 ಸೋಂಕಿತರು ಬಿಡುಗಡೆಯಾಗಿದ್ದಾರೆ. ಜಿಲ್ಲೆಯಲ್ಲಿ ಈವರೆಗೆ 3421 ಜನರು ಬಿಡುಗಡೆ ಆಗಿದ್ದಾರೆ. ಒಟ್ಟಾರೆ 5070 ಪ್ರಕರಣಗಳಲ್ಲಿ 3421 ಬಿಡುಗಡೆಯಾಗಿದ್ದಾರೆ. 126 ಜನರು ಸಾವನ್ನಪ್ಪಿದ್ದಾರೆ. 1523 ಸಕ್ರಿಯ ಪ್ರಕರಣಗಳಿವೆ.