ಬೆಂಬಲ ಬೆಲೆ ಶೇಂಗಾ ಖರೀದಿ ಕೇಂದ್ರದತ್ತ ಮುಖ ಮಾಡದ ಜಿಲ್ಲೆಯ ರೈತರು

Team Udayavani, Jan 11, 2018, 2:35 PM IST

ದಾವಣಗೆರೆ: ಕೇಂದ್ರ ಸರ್ಕಾರದ ಬೆಂಬಲ ಬೆಲೆ ಯೋಜನೆಯಡಿ ಡಿ. 19ರಿಂದ ಪ್ರಾರಂಭಿಸಿರುವ ಶೇಂಗಾ ಖರೀದಿ ಪ್ರಕ್ರಿಯೆಯಲ್ಲಿ ದಾವಣಗೆರೆಯಲ್ಲಿ
ಸೊನ್ನೆ, ಜಗಳೂರಲ್ಲಿ ಈವರೆಗೆ 25 ರೈತರಿಂದ 325 ಕ್ವಿಂಟಲ್‌ ಮಾತ್ರ ಖರೀದಿಯಾಗಿದೆ!. ಜಗಳೂರು ತಾಲೂಕು ಮತ್ತಿತರೆ ಭಾಗದ ರೈತರಿಂದ ಖರೀದಿ ಕೇಂದ್ರ ಪ್ರಾರಂಭಿಸಲು ಮನವಿ ಹಿನ್ನೆಲೆಯಲ್ಲಿ ಡಿ. 18 ರಂದು ಜಿಲ್ಲಾಧಿಕಾರಿ ಡಿ.ಎಸ್‌. ರಮೇಶ್‌ ಅಧ್ಯಕ್ಷತೆಯ ಜಿಲ್ಲಾ ಟಾಸ್ಕ್´ೋರ್ಸ್‌ ಸಮಿತಿ ಸಭೆಯಲ್ಲಿ ಡಿ. 19 ರಿಂದ ದಾವಣಗೆರೆ ಮತ್ತು ಜಗಳೂರುನಲ್ಲಿ ಖರೀದಿ ಕೇಂದ್ರ ಪ್ರಾರಂಭಿಸಲು ಹಸಿರು ನಿಶಾನೆ ನೀಡಿತ್ತು.

ಕೇಂದ್ರ ಸರ್ಕಾರ ನಿಗದಿಪಡಿಸಿರುವ 4,250 ರೂ. ಜೊತೆಗೆ ರಾಜ್ಯ ಸರ್ಕಾರದ 200 ರೂ. ಸೇರಿಸಿ ಒಟ್ಟಾರೆ ಕ್ವಿಂಟಲ್‌ಗೆ 4,450 ರೂಪಾಯಿಯಂತೆ ಪ್ರಾದೇಶಿಕ ಎಣ್ಣೆ ಬೀಜ ಬೆಳೆಗಾರರ ಸಹಕಾರಿ ಸಂಘಗಳ ಒಕ್ಕೂಟ (ಕೆಒಎಫ್‌) ಮೂಲಕ ಖರೀದಿ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿತ್ತು. ಜಿಲ್ಲಾ ಟಾಸ್ಕ್´ೋರ್ಸ್‌ ಸಮಿತಿ ಸಭೆ ತೀರ್ಮಾನದಂತೆ ಜಿಲ್ಲಾ ಕೇಂದ್ರ ದಾವಣಗೆರೆ ಹಾಗೂ ಹೆಚ್ಚು ಶೇಂಗಾ ಬೆಳೆಯುವ ಜಗಳೂರಿನಲ್ಲಿ ಖರೀದಿ ಕೇಂದ್ರ ಪ್ರಾರಂಭವಾಗಿವೆ. ಈವರೆಗೆ ಜಿಲ್ಲಾ ಕೇಂದ್ರ ದಾವಣಗೆರೆಯಲ್ಲಿನ ಖರೀದಿ ಕೇಂದ್ರಕ್ಕೆ ಬಂದ ರೈತರ ಸಂಖ್ಯೆ ಬರೀ ಇಬ್ಬರು ಮಾತ್ರ. ಆ ಇಬ್ಬರೂ ಕೇಂದ್ರಕ್ಕೆ ತಂದಿದ್ದ ಶೇಂಗಾ ಸ್ಯಾಂಪಲ್‌ ನಿಗದಿತ ಪ್ರಮಾಣದಂತೆ ಇರದ ಕಾರಣಕ್ಕೆ ರಿಜೆಕ್ಟ್ (ತಿರಸ್ಕೃತ) ಆಗಿದೆ. ಹಾಗಾಗಿ ದಾವಣಗೆರೆಯಲ್ಲಿ ಒಂದೇ ಒಂದು ಶೇಂಗಾಕಾಯಿ ಖರೀದಿ ಆಗಿಲ್ಲ. ಜಗಳೂರು ಖರೀದಿ ಕೇಂದ್ರಕ್ಕೆ ಈವರೆಗೆ 82 ರೈತರು ಸ್ಯಾಂಪಲ್‌ ತಂದಿದ್ದು, ಈವರೆಗೆ 25 ರೈತರಿಂದ
315 ಕ್ವಿಂಟಲ್‌ ಖರೀದಿ ಆಗಿದೆ. ಜಗಳೂರುನಲ್ಲಿ ಮಾತ್ರವೇ ಶೇಂಗಾ ಖರೀದಿ ಪ್ರಕ್ರಿಯೆ ಚಾಲ್ತಿಯಲ್ಲಿದೆ.

16,181 ಹೆಕ್ಟೇರ್‌ನಲ್ಲಿ ಶೇಂಗಾ: ದಾವಣಗೆರೆ ಜಿಲ್ಲೆಯಲ್ಲಿ 16,181 ಹೆಕ್ಟೇರ್‌ ಪ್ರದೇಶದಲ್ಲಿ ಶೇಂಗಾ ಬಿತ್ತನೆಯಾಗಿದ್ದು, ಅಂದಾಜು 3,23,620 ಕ್ವಿಂಟಲ್‌ ಇಳುವರಿ ದೊರೆಯಬಹುದು ಎಂಬುದು ಕೃಷಿ ಇಲಾಖೆ ಲೆಕ್ಕಾಚಾರ. ದಾವಣಗೆರೆ ತಾಲೂಕಿನಲ್ಲಿ 146 ಹೆಕ್ಟೇರ್‌ ಪ್ರದೇಶದಲ್ಲಿ ಶೇಂಗಾ ಬಿತ್ತನೆಯಾಗಿದ್ದು 2,920 ಕ್ವಿಂಟಲ್‌ ಇಳುವರಿ ನಿರೀಕ್ಷಿಸಲಾಗಿದೆ. ಹೊನ್ನಾಳಿಯಲ್ಲಿ ಬಿತ್ತನೆಯಾಗಿರುವ 3,112 ಹೆಕ್ಟೇರ್‌ ನಲ್ಲಿ 62,240 ಕ್ವಿಂಟಲ್‌, ಚನ್ನಗಿರಿಯಲ್ಲಿ 535 ಹೆಕ್ಟೇರ್‌ ನಿಂದ 10,700 ಕ್ವಿಂಟಲ್‌, ಹರಪನಹಳ್ಳಿಯಲ್ಲಿ 1,750 ಹೆಕ್ಟೇರ್‌ಗೆ 35 ಸಾವಿರ ಕ್ವಿಂಟಲ್‌ ಮತ್ತು ಜಗಳೂರಿನಲ್ಲಿ 10,638 ಹೆಕ್ಟೇರ್‌ನಿಂದ 212760 ಕ್ವಿಂಟಲ್‌ ದೊರೆಯುವ ಅಂದಾಜಿದೆ.

ಹೆಚ್ಚು ಇಷ್ಟಪಡೊಲ್ಲ: ಜಿಲ್ಲಾಡಳಿತವು ರೈತರ ಮನವಿ, ಒತ್ತಾಸೆ ಮೇರೆಗೆ ಶೇಂಗಾ ಖರೀದಿಗೆ ಮುಂದಾಗಿದೆ. ಆದರೆ, ಖರೀದಿ ಕೇಂದ್ರ ಎಂದಿನಂತೆ  ವಿಳಂಬ ಆಯಿತು ಎಂಬ ಅಸಮಾಧಾನ ರೈತರಲ್ಲಿದೆ. ಕೈಯಲ್ಲಿ ಇದ್ದಂತಹ ಶೇಂಗಾ ಎಲ್ಲಾ ಖಾಲಿಯಾದ ಮೇಲೆ ಖರೀದಿ ಕೇಂದ್ರ ಪ್ರಾರಂಭಿಸಿ ಏನು
ಪ್ರಯೋಜನ ಎಂಬುದು ರೈತಾಪಿ ವರ್ಗದ ಪ್ರಶ್ನೆ. ಮಳೆಯ ಕೊರತೆ ಒಳಗೊಂಡಂತೆ ಹಲವಾರು ಸಮಸ್ಯೆಗಳ ನಡುವೆಯೂ ಸಾಲ-ಸೋಲ ಮಾಡಿ
ಶೇಂಗಾ ಬಿತ್ತಿ, ತರಿದು (ಗಿಡದಿಂದ ಬಿಡಿಸಿ) ಖರೀದಿ ಕೇಂದ್ರಕ್ಕೆ ತಂದು ಸ್ಯಾಂಪಲ್‌ ತೋರಿಸಿ, ಓಕೆ ಎಂದಾದ ಮೇಲೆ ಶೇಂಗಾ ತಂದು ಮಾರಾಟ ಮಾಡಿ, ದುಡ್ಡಿಗಾಗಿ ತಿಂಗಳುಗಟ್ಟಲೆ ಕಾಯುವ ಉಸಾಬರಿಯೇ ಬೇಡ. ಕ್ಯಾಷ್‌ ಅಂಡ್‌ ಕ್ಯಾರಿ (ಶೇಂಗಾ ಮಾರಿ, ಹಣ ಪಡೆಯುವುದು) ಒಳ್ಳೆಯದು ಎಂಬುದು ರೈತರ ಲೆಕ್ಕಾಚಾರ. ಹಾಗಾಗಿಯೇ ಖರೀದಿ ಕೇಂದ್ರದತ್ತ ಹೆಚ್ಚಿನ ರೈತರು ಮುಖ ಮಾಡುವುದಿಲ್ಲ. ಯಾವುದೇ ಕೃಷಿ ಉತ್ಪನ್ನಗಳ ಧಾರಣೆ ಮುಕ್ತ ಮಾರುಕಟ್ಟೆಯಲ್ಲಿ ಕುಸಿದಾಗ ಸರ್ಕಾರ ಮಧ್ಯ ಪ್ರವೇಶಿಸಿ ಬೆಂಬಲ ಹಾಗೂ ಪ್ರೋತ್ಸಾಹಧನ ನೀಡಿ, ಖರೀದಿಸುವ ಮೂಲಕ ಸಂಕಷ್ಟದಲ್ಲಿರುವ ರೈತರಿಗೆ ನೆರವಿನ ಸಹಾಯಹಸ್ತ ನೀಡುವುದು ಖರೀದಿ ಕೇಂದ್ರದ ಮೂಲ ಉದ್ದೇಶ. ಆದರೆ, ಉತ್ಪನ್ನಗಳ ಆವಕ ಮುಗಿಯುವ ಸಂದರ್ಭದಲ್ಲಿ ಖರೀದಿ ಕೇಂದ್ರ ಪ್ರಾರಂಭಿಸಿ, ಇನ್ನಿಲ್ಲದ ಷರತ್ತು ವಿಧಿಸಿ, ತಿಂಗಳುಗಟ್ಟಲೆ ಸಮಯದ ನಂತರ ಖಾತೆಗೆ ಹಣ ಜಮೆ ಮಾಡುವುದರಿಂದ ರೈತರು ಖರೀದಿ ಕೇಂದ್ರಗಳತ್ತ ಗಮನ ನೀಡುವುದಿಲ್ಲ. ಅಲ್ಲಿಗೆ ಖರೀದಿ ಕೇಂದ್ರಗಳ ಮೂಲ ಉದ್ದೇಶವೇ ಅಕ್ಷರಶಃ ಮೂಲೆಗುಂಪು. ಸಕಾಲಕ್ಕೆ ಖರೀದಿ ಕೇಂದ್ರ, ಷರತ್ತುಗಳಲ್ಲಿ ಸರಳೀಕರಣ, ಹಣ ಪಾವತಿಯ ವ್ಯವಸ್ಥೆ ಆದಾಗ ಮಾತ್ರವೇ ಸರ್ಕಾರ ಖರೀದಿ ಕೇಂದ್ರ ಪ್ರಾರಂಭಿಸುವುದಕ್ಕೂ ಒಂದರ್ಥ. ಇಲ್ಲದೇ
ಹೋದರೆ ಎದ್ದು ಹೋಗುವ ಮಾತು… ಬಿದ್ದು ಹೋಗಲಿ… ಎನ್ನುವಂತಾಗುತ್ತದೆ ಎನ್ನುವುದಕ್ಕೆ ಜಿಲ್ಲೆಯಲ್ಲಿ 16,181 ಹೆಕ್ಟೇರ್‌ ಪ್ರದೇಶದಲ್ಲಿ
ಬಿತ್ತನೆಯಾಗಿರುವ 3,23,620 ಕ್ವಿಂಟಲ್‌ನಷ್ಟು ಶೇಂಗಾದ ಅಂದಾಜು ಇಳುವರಿಯಲ್ಲಿ ಈವರೆಗೆ ಕೇವಲ 325 ಕ್ವಿಂಟಲ್‌ನಷ್ಟು ಖರೀದಿ ಆಗಿರುವುದೇ
ಪುಷ್ಟೀಕರಿಸುತ್ತದೆ.

ರಾ. ರವಿಬಾಬು