ವಿವಿಧ ಬೇಡಿಕೆ ಈಡೇರಿಕೆಗೆ ಮಾಜಿ ಸೈನಿಕರ ಧರಣಿ

Team Udayavani, Jan 28, 2020, 12:13 PM IST

ದಾವಣಗೆರೆ: ಸೈನಿಕ ಶಾಲೆ ಮಾದರಿ ತರಬೇತಿ ಕೇಂದ್ರ, ಸಮುದಾಯ ಭವನ, ಹುತಾತ್ಮ ಯೋಧರ ಸ್ಮಾರಕದ ಅನುಷ್ಠಾನ, 24ಗಿ7 ಕಾಲ ಅತ್ಯುಚ್ಚ ಸುವರ್ಣ ಧ್ವಜ ಸ್ಥಾಪನೆಗೆ ಸೂಕ್ತ ಸ್ಥಳವಕಾಶ ಒಳಗೊಂಡಂತೆ ವಿವಿಧ ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ ಸೋಮವಾರ ದಾವಣಗೆರೆ ಜಿಲ್ಲಾ ಮಾಜಿ ಸೈನಿಕ ವಿವಿಧೋದ್ದೇಶ ಸಂಘದ ನೇತೃತ್ವದಲ್ಲಿ ಮಾಜಿ ಸೈನಿಕರು, ಕುಟುಂಬದ ಸದಸ್ಯರು ಜಿಲ್ಲಾಧಿಕಾರಿ ಕಚೇರಿ ಎದುರು ಶಾಂತಿಯುತ ಧರಣಿ ನಡೆಸಿದರು.

ಬೆಳಗಾವಿ, ಚಿತ್ರದುರ್ಗ ಇತರೆಡೆಯಂತೆ ದಾವಣಗೆರೆಯಲ್ಲಿ ದಿನದ 24 ಗಂಟೆ ಸದಾ ತ್ರಿವರ್ಣ ಧ್ವಜ ಹಾರಾಡುವ ವ್ಯವಸ್ಥೆ ಮಾಡಬೇಕು ಎಂಬುದು ಮಾಜಿ ಸೈನಿಕರ ಉತ್ಕಟ ಬಯಕೆ. ಅದಕ್ಕೆ ಸೂಕ್ತ ಸ್ಥಳಾವಕಾಶ ಮಾಡಿಕೊಡಬೇಕು ಎಂದು ಒತ್ತಾಯಿಸಿ ಸಂಬಂಧಿತರಿಗೆ ಮನವಿ ಮಾಡಲಾಗಿದೆ. ಆದರೆ, ಈವರೆಗೆ ಯಾವುದೇ ಪ್ರಯೋಜನ ಆಗಿಲ್ಲ ಎಂದು ತಿಳಿಸಿದರು.

ದಾವಣಗೆರೆಯಲ್ಲಿ ಹುತಾತ್ಮರ ಸ್ಮಾರಕಕ್ಕೆ ಮಹಾನಗರ ಪಾಲಿಕೆಯಲ್ಲಿ ಅನುಮೋದನೆ ಪಡೆದು 6 ತಿಂಗಳು ಕಳೆದರೂ ಅನುಷ್ಠಾನಕ್ಕೆ ಬರದೇ ಇರುವುದು ಖೇದಕರ ಸಂಗತಿ. ಕೂಡಲೇ ಅನುಷ್ಠಾನಕ್ಕೆ ತರಬೇಕು ಎಂದು ಒತ್ತಾಯಿಸಿದರು.

ಅನೇಕ ಯುವಕರಿಗೆ ಸೈನ್ಯಕ್ಕೆ ಸೇರುವ ಬಯಕೆ ಇರುತ್ತದೆ. ಸೈನ್ಯಕ್ಕೆ ಸೇರುವ ನಿಟ್ಟಿನಲ್ಲಿ ಸೂಕ್ತ ಮಾಹಿತಿ, ಒಂದಷ್ಟುತರಬೇತಿ ಅತ್ಯಗತ್ಯ. ಮಾಜಿ ಸೈನಿಕರು ಆಸಕ್ತರಿಗೆ ಅಗತ್ಯ ತರಬೇತಿ ನೀಡಲು ಸದಾ ಸಿದ್ಧರಿದ್ದಾರೆ. ಸೈನಿಕ ಶಾಲೆ ಮಾದರಿಯ ತರಬೇತಿ ಶಾಲೆಗೆ ಸೂಕ್ತ ಕಡೆ ಜಾಗದ ವ್ಯವಸ್ಥೆ ಮಾಡಿಕೊಡಬೇಕು ಎಂದು ಆಗ್ರಹಿಸಿದರು. ಮಾಜಿ ಹಾಗೂ ಹಾಲಿ ಸೈನಿಕರ ಕುಟುಂಬಗಳಿಗೆ ಸಭೆ, ಸಮಾರಂಭ, ಕಾರ್ಯಕ್ರಮಕ್ಕೆ ಅನುಕೂಲ ಆಗುವಂತೆ ಸಮುದಾಯ ಭವನಕ್ಕೆ ಜಾಗ ನೀಡಬೇಕು ಎಂದು ಒತ್ತಾಯಿಸಿದರು.

ದಾವಣಗೆರೆಯಲ್ಲಿ 1800-1900 ರಷ್ಟು ಹಾಲಿ, ಮಾಜಿ ಸೈನಿಕರು, 6 ಸಾವಿರದಷ್ಟು ಅವಲಂಬಿತರಿದ್ದಾರೆ. ಕುಂದುಕೊರತೆ, ಸಮಸ್ಯೆ, ಮಾಹಿತಿಗಾಗಿ ಕಚೇರಿಯ ಅಗತ್ಯವಿದೆ. 28 ವರ್ಷಗಳಿಂದ ಸೈನಿಕರು ತಮ್ಮ ವೆಚ್ಚದಲ್ಲೇ ಕಚೇರಿ ನಿರ್ವಹಣೆ ಮಾಡುತ್ತಿದ್ದಾರೆ. ಭವಿಷ್ಯದಲ್ಲಿ ಕಷ್ಟಸಾಧ್ಯ. ಹಾಗಾಗಿ ಸರ್ಕಾರಿ ಕಟ್ಟಡದಲ್ಲಿ ಕಚೇರಿಗೆ ಅವಕಾಶ ಮಾಡಿಕೊಡಬೇಕು ಎಂದು ಒತ್ತಾಯಿಸಿದರು. ಸರ್ಕಾರಿ ಆದೇಶದಂತೆ ಮಾಜಿ ಸೈನಿಕರಿಗೆ ನಿವೇಶನ, ಜಮೀನು, ಸಂಘದ ಕಚೇರಿಗೆ ಸ್ಥಳವಕಾಶ, ನೇರ, ಗುತ್ತಿಗೆ ಆಧಾರದಲ್ಲಿ ಕೆಲಸನೇಮಕಾತಿಯಲ್ಲಿ ಮೀಸಲಾತಿ… ಇತರೆ ಬೇಡಿಕೆ ಈಡೇರಿಸುವ ತನಕ ಹೋರಾಟ ಮುಂದುವರೆಯಲಿದೆ ಎಂದು ತಿಳಿಸಿದರು.

ಸಂಘದ ಅಧ್ಯಕ್ಷ ಎಂ.ಎನ್‌. ಸತ್ಯಪ್ರಕಾಶ್‌, ಉಪಾಧ್ಯಕ್ಷ ಎಂ.ಎಸ್‌. ಮಹೇಂದ್ರಕರ್‌, ಕಾರ್ಯದರ್ಶಿಓ.ಬಿ. ಶಶಿಕಾಂತ್‌, ಖಜಾಂಚಿ ಎಂ. ದಾಸಪ್ಪ, ಗೋಪಾಲ್‌, ಬಸವರಾಜ್‌, ಎಂ.ಎನ್‌. ಬಸವರಾಜಪ್ಪ, ಅಂದಾನಪ್ಪ, ಎಸ್‌.ಎಸ್‌. ಷಣ್ಮುಖಪ್ಪ, ರಘುನಾಥ್‌ ಜಾಧವ್‌, ಉದಯ್‌ಕುಮಾರ್‌, ಪರಶುರಾಮ್‌, ದಾಕ್ಷಾಯಣಮ್ಮ ಅಂದಾನಪ್ಪ ಇತರರು ಇದ್ದರು. ದಾವಣಗೆರೆ-ಹರಿಹರ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ರಾಜನಹಳ್ಳಿ ಶಿವಕುಮಾರ್‌ ಧರಣಿ ಸ್ಥಳಕ್ಕೆ ಭೇಟಿ ನೀಡಿದ್ದರು.