ಉಚಿತ ಕಾನೂನು ನೆರವು ಪಡೆಯಿರಿ

Team Udayavani, Sep 2, 2017, 4:22 PM IST

ಸಿಂಧನೂರು: ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡಕ್ಕೆ ಸೇರಿದವರು ಮಾನಸಿಕ ಮತ್ತು ಬೇರೆ ಯಾವುದೇ ನ್ಯೂನ್ಯತೆ
ಹೊಂದಿದವರು, ಮಹಿಳೆ ಮತ್ತು ಮಗು, ಗುಂಪು ಘರ್ಷಣೆ, ಗಲಭೆ ಮತ್ತಿತರರ ಪ್ರಕೃತಿ ವಿಕೋಪಗಳಿಂದ ಸಂತ್ರಸ್ಥರಾದವರು ಉಚಿತವಾಗಿ ಕಾನೂನಿನ ನೆರವು ಪಡೆಯಬಹುದಾಗಿದೆ ಎಂದು ಪ್ರಧಾನ ಸಿವಿಲ್‌ ನ್ಯಾಯಾಧೀಶೆ ರಿಹಾನ್‌ ಸುಲ್ತಾನ್‌ ಸಲಹೆ ನೀಡಿದರು.

ನಗರದ ಎವಿಎಸ್‌ ವಿಜ್ಞಾನ ಮತ್ತು ವಾಣಿಜ್ಯ ಮಹಾವಿದ್ಯಾಲಯದಲ್ಲಿ ತಾಲೂಕು ಕಾನೂನು ಸೇವಾ ಸಮಿತಿ,
ತಾಲೂಕು ನ್ಯಾಯವಾದಿಗಳ ಸಂಘ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ, ತಾಪಂ ಕಚೇರಿ, ಶಿಕ್ಷಣ ಇಲಾಖೆ ಹಾಗೂ ವಿವಿಧ ಸಂಘಟನೆಗಳ ಸಂಯುಕ್ತಾಶ್ರಯದಲ್ಲಿ ಕಾನೂನು ಸಾಕ್ಷರತಾ ರಥ ಆಗಮಿಸಿದ ಹಿನ್ನೆಲೆಯಲ್ಲಿ ಹಮ್ಮಿಕೊಂಡಿದ್ದ ಕಾನೂನು ಅರಿವು-ನೆರವು ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ವಿದ್ಯಾರ್ಥಿನಿಯರಿಗೆ ಏನಾದರೂ ತೊಂದರೆ ಉಂಟಾದರೆ ನ್ಯಾಯಾಲಯದಲ್ಲಿರುವ ದೂರು ಪೆಟ್ಟಿಗೆಯಲ್ಲಿ ಸಮಸ್ಯೆ
ಬರೆದು ಹಾಕಿದರೆ ತಪ್ಪಿತಸ್ಥರ ಮೇಲೆ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಭರವಸೆ ನೀಡಿದರು.

ವಿದ್ಯಾರ್ಥಿನಿಯರು, ಮಹಿಳೆಯರು ಲೈಂಗಿಕ ಕಿರುಕುಳ, ಮಾನಸಿಕ ಹಿಂಸೆ ಮತ್ತು ದೌರ್ಜನ್ಯ ಸಹಿಸಿಕೊಳ್ಳದೆ ತಪ್ಪಿತಸ್ಥರ ಮೇಲೆ ಪೊಲೀಸ್‌ ಇಲಾಖೆ ನ್ಯಾಯಾಲಯದ ಮೊರೆ ಹೋಗಬೇಕು ಎಂದು ಹೇಳಿದರು.

ಅಪರ ಸಿವಿಲ್‌ ನ್ಯಾಯಾಧೀಶರಾದ ಮಹಾಂತೇಶ ಜಿ.ಭೂಸಗೋಳ, ರವಿಕುಮಾರ ಕೆ., ಸಹಾಯಕ ಸರ್ಕಾರಿ
ಅಭಿಯೋಜಕ ಕೆ.ಪಿ. ವೀರೇಶಕುಮಾರ, ಎವಿಎಸ್‌ ಕಾಲೇಜು ಅಧ್ಯಕ್ಷ ಎಂ.ಸಿ.ಅಂಕಯ್ಯ, ಪ್ರಾಚಾರ್ಯ ಎಸ್‌. ವಿಜಯರಾವ ಇದ್ದರು.

ಗ್ರಾಹಕರ ಹಿತ ರಕ್ಷಣೆ ಕಾಯ್ದೆ ಕುರಿತು ಆರ್‌.ಕೆ. ರೆಡ್ಡಿ ವಕೀಲ ಮತ್ತು ಮೋಟಾರ್‌ ವಾಹನ ಕಾಯ್ದೆ ಕುರಿತು ಎಸ್‌.ಎಚ್‌.ಪಿ. ಖಾದ್ರಿ ಉಪನ್ಯಾಸ ನೀಡಿದರು.