ಜ. 18ಕ್ಕೆ ಜಯದೇವಶ್ರೀ ಶೂನ್ಯಪೀಠ ಪ್ರಶಸ್ತಿ ಪ್ರದಾನ

Team Udayavani, Jan 4, 2019, 1:05 AM IST

ದಾವಣಗೆರೆ: ಶ್ರೀಜಯದೇವ ಮುರುಘರಾಜೇಂದ್ರ ಸ್ವಾಮೀಜಿಗಳ 62ನೇ ಸ್ಮರಣೋತ್ಸವದ ಅಂಗವಾಗಿ ದಾವಣಗೆರೆ ಶಿವಯೋಗಾಶ್ರಮ ಟ್ರಸ್ಟ್‌ನ ಬಸವಕೇಂದ್ರದಿಂದ ನೀಡುವ ಪ್ರತಿಷ್ಠಿತ ಜಯದೇವಶ್ರೀ ಪ್ರಶಸ್ತಿಗೆ ಹೈಕೋರ್ಟ್‌ ವಿಶ್ರಾಂತ ನ್ಯಾ. ಎಚ್‌.ಎನ್‌. ನಾಗಮೋಹನ್‌ದಾಸ್‌ ಆಯ್ಕೆಯಾಗಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಚಿತ್ರದುರ್ಗ ಮುರುಘಾಮಠದ ಡಾ. ಶ್ರೀ ಶಿವಮೂರ್ತಿ ಮುರುಘಾ ಶರಣರು, ಈ ವಿಷಯ ತಿಳಿಸಿದರು. ನಗರದ ಶಿವಯೋಗಿ ಮಂದಿರದಲ್ಲಿ ಜ.18 ರಿಂದ 20ರವರೆಗೆ ನಡೆಯುವ ಜಯದೇವಶ್ರೀಗಳ 62ನೇ ಸ್ಮರಣೋತ್ಸವ ಮತ್ತು ಶರಣ ಸಂಸ್ಕೃತಿ ಉತ್ಸವದ ಹಿನ್ನೆಲೆಯಲ್ಲಿ ಈ ಬಾರಿಯ ಜಯದೇವಶ್ರೀ ಪ್ರಶಸ್ತಿಗೆ ವಿಶ್ರಾಂತ ನ್ಯಾ. ಎಚ್‌.ಎನ್‌. ನಾಗಮೋಹನ್‌ದಾಸ್‌ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದರು.

ಅಂತೆಯೇ “ಶೂನ್ಯಪೀಠ ಚನ್ನಬಸವ’ ಪ್ರಶಸ್ತಿಗೆ ಖ್ಯಾತ ಸಾಹಿತಿ ಡಾ. ಕುಂ. ವೀರಭದ್ರಪ್ಪ, “ಶೂನ್ಯಪೀಠ ಅಲ್ಲಮ’ ಪ್ರಶಸ್ತಿಗೆ ಧಾರವಾಡದ ಹಿರಿಯ ಸಾಹಿತಿ ಡಾ. ಸಿ.ಆರ್‌. ಯರವಿನ ತೆಲಿಮಠ, “ಶೂನ್ಯಪೀಠ ಅಕ್ಕನಾಗಮ’ ಪ್ರಶಸ್ತಿಗೆ ತುಮಕೂರಿನ ಸಮಾಜ ಸೇವಕಿ ಭವ್ಯಾರಾಣಿ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದು ಹೇಳಿದರು.

ಜ.18 ಸಂಜೆ 6.30ಕ್ಕೆ ನಡೆವ ಸಾಧಕರ ಸಮಾವೇಶದಲ್ಲಿ ನಾಲ್ವರಿಗೆ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ಪ್ರಶಸ್ತಿ 25 ಸಾವಿರ ರೂ. ನಗದು,ಸ್ಮರಣಿಕೆ ಒಳಗೊಂಡಿದೆ. 2002ರಿಂದ ಈ ಎಲ್ಲ ಪ್ರಶಸ್ತಿಗಳನ್ನು ವಿವಿಧ ಸಾಧಕರಿಗೆ ನೀಡಲಾಗಿದೆ ಎಂದು ತಿಳಿಸಿದರು.