ರೈತರ ಸಂಪೂರ್ಣ ಸಾಲಮನ್ನಾ ಮಾಡಿ

Team Udayavani, Jul 4, 2017, 1:50 PM IST

ದಾವಣಗೆರೆ: ರೈತರ ಸಂಪೂರ್ಣ ಸಾಲಮನ್ನಾ, ಪ್ರತಿ ಎಕರೆಗೆ ಲಕ್ಷ ಕೋಟಿ ಬೆಳೆ ಹಾನಿ ಪರಿಹಾರ ವಿತರಣೆ ಒಳಗೊಂಡಂತೆ ವಿವಿಧ ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ ಸೋಮವಾರ ಜನಾಂದೋಲನಗಳ ಮಹಾಮೈತ್ರಿ ನೇತೃತ್ವದಲ್ಲಿ ರೈತರು, ಕಾರ್ಮಿಕರು, ಪ್ರಗತಿಪರ ಚಿಂತಕರು, ಹೋರಾಟಗಾರರು ಪ್ರತಿಭಟನೆ ನಡೆಸಿದರು.

ಶ್ರೀ ಜಯದೇವ ವೃತ್ತದಿಂದ ಮಹಾತ್ಮಗಾಂಧಿ ವೃತ್ತದವರೆಗೆ ಮೆರವಣಿಗೆ ನಡೆಸಿ, ಕೇಂದ್ರ ಸರ್ಕಾರದ ಪ್ರತಿಕೃತಿ ದಹಿಸಿ, ಆಕ್ರೋಶ ವ್ಯಕ್ತಪಡಿಸಿದರು. ನಂತರ ಉಪ ವಿಭಾಗಾಧಿಕಾರಿ ಕಚೇರಿಗೆ ತೆರಳಿ, ಉಪ ವಿಭಾಗಾಧಿಕಾರಿ ಕಚೇರಿ ಮೂಲಕ ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ ಮನವಿ ಸಲ್ಲಿಸಿದರು. 

ದೇಶದ್ಯಾಂತ ಶೇ. 68 ರಷ್ಟಿರುವ ರೈತರು 52 ಸಾವಿರ ಕೋಟಿ ಸಾಲ ಹೊಂದಿದ್ದಾರೆ. ಸತತ ಮೂರು ವರ್ಷದ ಬರದಿಂದ ಸಾಲ ಕಟ್ಟುವ ಸ್ಥಿತಿಯಲ್ಲೇ ಇಲ್ಲ. ಹಾಗಾಗಿ ಕೇಂದ್ರ ಸರ್ಕಾರ ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿನ ಸಾಲ ಮನ್ನಾ ಮಾಡಬೇಕು ಎಂದು ಆಗ್ರಹಿಸಿದ ಪ್ರತಿಭಟನಾಕಾರರು, ರೈತರ ಸಾಲ ಮನ್ನಾ ಮಾಡಿದರೆ ತಲಾಆದಾಯ
ಕುಸಿಯುತ್ತಿದೆ ಎಂಬ ಕೇಂದ್ರದ ಹಣಕಾಸು ಸಚಿವ ಅರುಣ್‌ ಜೆಟ್ಲಿ ಹೇಳಿಕೆ ಅತ್ಯಂತ ಖಂಡನೀಯ. ದೇಶದ 100 ಶ್ರೀಮಂತ ಬಂಡವಾಳಗಾರರ ಸಾಲ ಮನ್ನಾ ಮಾಡಿದಾಗ ಕುಸಿಯದ ಜಿಡಿಪಿ ದೇಶಕ್ಕೆ ಅನ್ನ ನೀಡುವ ಅನ್ನದಾತರ ಸಾಲ ಮಾಡಿದ ತಕ್ಷಣಕ್ಕೆ ಕುಸಿಯುತ್ತದೆಯೇ ಎಂದು ಆಕ್ರೋಶದಿಂದ ಪ್ರಶ್ನಿಸಿದರು.

ರಾಜ್ಯ ಸರ್ಕಾರ ಸಹ ಕಣ್ಣೊರೆಸುವ ತಂತ್ರವಾಗಿ ಸಹಕಾರ ಸಂಘದಲ್ಲಿನ ರೈತರ 50 ಸಾವಿರ ಸಾಲ ಮನ್ನಾ ಮಾಡಿದೆ. ಶೇ. 9 ರಷ್ಟು ರೈತರು ಮಾತ್ರ 50 ಸಾವಿರ ಸಾಲ ಹೊಂದಿದ್ದಾರೆ. ಶೇ. 6 ರಷ್ಟು ರೈತರು ಅದಕ್ಕಿಂತಲೂ ಹೆಚ್ಚಿನ ಸಾಲ ಪಡೆದಿದ್ದಾರೆ. 14 ಷರತ್ತು ಬೇರೆ ವಿಧಿಸಲಾಗಿದೆ. ರಾಜ್ಯ ಸರ್ಕಾರ ಷರತ್ತು ಕೈ ಬಿಟ್ಟು ಸಂಪೂಣ ಸಾಲ ಮನ್ನಾ ಮಾಡಬೇಕು. ಕಳೆದ ಎರಡು ವರ್ಷದಲ್ಲಿ ಮಳೆ ಕೊರತೆಯಿಂದ ಬೆಳೆ ಕಳೆದುಕೊಂಡು ರೈತರು ತೀವ್ರ ಸಂಕಷ್ಟದಲ್ಲಿದ್ದಾರೆ. ಪ್ರತಿ ಎಕರೆಗೆ 5 ಕೋಟಿ ಪರಿಹಾರ ಒಳಗೊಂಡಂತೆ ಅನುಕೂಲಕರ ಸೌಲಭ್ಯ ಒದಗಿಸುವ ಮೂಲಕ ಕಷ್ಟದಲ್ಲಿರುವ ರೈತರ ನೆರವಿಗೆ ಧಾವಿಸಬೇಕು ಎಂದು ಒತ್ತಾಯಿಸಿದರು. 

ರೈತ ಸಂಘದ ರಾಜ್ಯ ಕಾರ್ಯದರ್ಶಿ ಬಲ್ಲೂರು ರವಿಕುಮಾರ್‌, ಮಹಾಮೈತ್ರಿಯ ಚಿಕ್ಕನಹಳ್ಳಿ ರೇವಣಸಿದ್ದಪ್ಪ, ಅನೀಸ್‌ಪಾಷಾ, ಮೌಲಾನಾಯ್ಕ, ಜಗಳೂರು ಕೊಟ್ರೇಶ್‌, ಸತೀಶ್‌ ಅರವಿಂದ್‌, ಭಾರತಿ, ಮಧು ತೊಗಲೇರಿ, ಎ.ಎಂ. ಕೊಟ್ರೇಶ್‌, ಟಿ.ವಿ.ಎಸ್‌. ರಾಜು, ಬನಶ್ರೀ, ಭಾರತಿ, ತಿಪ್ಪೇಸ್ವಾಮಿ, ಪರಶುರಾಮ್‌ ಇತರರು ಇದ್ದರು.