ಬಿಜೆಪಿಯ ಕಪಟ ಯಾತ್ರೆಗೆ ಜನರು ಮರುಳಾಗಲ್ಲ: ರವೀಂದ್ರ

Team Udayavani, Nov 8, 2017, 7:26 PM IST

ಹರಪನಹಳ್ಳಿ: ಕೋಮುವಾದಿ ಬಿಜೆಪಿಯವರು ಪರಿವರ್ತನಾ ಯಾತ್ರೆ ಹೆಸರಿನಲ್ಲಿ ಹಮ್ಮಿಕೊಂಡಿರುವ ಕಪಟ ಯಾತ್ರೆಗೆ ಜನರು ಮರುಳಾಗುವುದಿಲ್ಲ ಎಂದು ಶಾಸಕ ಎಂ.ಪಿ.ರವೀಂದ್ರ ಬಿಜೆಪಿ ವಿರುದ್ಧ ವಾಗ್ಧಾಳಿ ನಡೆಸಿದರು.

ತಾಲೂಕಿನ ಹಿರೇಮೇಗಳಗೆರೆ ಗ್ರಾಮದಲ್ಲಿ ಮಂಗಳವಾರ ಹಿರೇಮೇಗಳಗೆರೆಯಿಂದ ಕಮ್ಮತ್ತಹಳ್ಳಿ ಕ್ರಾಸ್‌ವರೆಗಿನ ರಸ್ತೆ ಅಭಿವೃದ್ಧಿಗೆ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು. ಮುಖ್ಯಮಂತ್ರಿಯಾಗಿದ್ದ ಸಮಯದಲ್ಲಿಯೇ ಜೈಲಿಗೆ ಹೋಗಿ ಬಂದಿರುವ ಯಡಿಯೂರಪ್ಪ ನೇತೃತ್ವದಲ್ಲಿ ಯಾತ್ರೆ ನಡೆಸುತ್ತಿರುವುದು ಹಾಸ್ಯಹಾಸ್ಪವಾಗಿದೆ. ಬಿಜೆಪಿ ಅಧಿಕಾರ ಅವಧಿಯಲ್ಲಿ ಡಿನೋಟಿಫಿಕೇಷನ್‌, ಬ್ಲೂ ಫಿಲಂ ವೀಕ್ಷಣೆ ಸೇರಿದಂತೆ ಮಾಡಬಾರದ ಅನಾಚಾರ ಮಾಡಿದ್ದಾರೆ. ಇಂತವರು ಪರಿವರ್ತನಾ ಯಾತ್ರೆ ನಡೆಸುತ್ತಿದ್ದಾರೆ. ಮೊದಲು ಬಿಜೆಪಿ ಮುಖಂಡರು ಕೋಮುವಾದ ಬದಲಾಗಿ ಸಮಾನತೆ ಕಡೆಗೆ ಪರಿರ್ವತನೆ ಹೊಂದಲಿ ಎಂದರು.

ಸಿದ್ದರಾಮಯ್ಯ ಸರ್ಕಾರ ಸರ್ವರಿಗೂ ಸಮಪಾಲು, ಸಮಬಾಲು ತತ್ವದಡಿ ಭ್ರಷ್ಟಚಾರ ರಹಿತ ಆಡಳಿತ ನೀಡಿ ದೇಶಕ್ಕೆ ಮಾದರಿ ಸರ್ಕಾರವಾಗಿದೆ. ನೋಟು ಅಪಮಾನ್ಯಕರಣದ ತೊಂದರೆಯನ್ನು ಜನರು ಇನ್ನೂ ಮರೆತ್ತಿಲ್ಲ. ಬಿಜೆಪಿಯವರು ಏನೇ ಸಮಾವೇಶ ಯಾತ್ರೆ ನಡೆಸಿದರೂ ಮುಂದಿನ ಚುನಾವಣೆಯಲ್ಲಿ ಕಾಂಗ್ರೆಸ್‌ ಪಕ್ಷ ಅಧಿಕಾರಕ್ಕೆ ಬರುವುದು ಶತಸಿದ್ದ ಎಂದು ವಿಶ್ವಾಸ ವ್ಯಕ್ತಪಡಿಸಿದರು. ತಾಲೂಕಿನ ಪ್ರತಿಯೊಂದು ಹಳ್ಳಿಗಳಲ್ಲಿ ಹಿಂದುಳಿದ, ಪರಿಶಿಷ್ಟ ಜಾತಿ, ಪಂಗಡದ ಕಾಲೋನಿಗಳಲ್ಲಿ ಸಿಸಿ ರಸ್ತೆ ಮತ್ತು ಗ್ರಾಮಗಳಿಗೆ ಸಂಪರ್ಕಿಸುವ ರಸ್ತೆಗಳ ಅಭಿವೃದ್ಧಿ ಮಾಡಲಾಗಿದೆ. ಫ್ಲೋರೈಡ್‌ ಅಂಶವುಳ್ಳ ಕುಡಿಯುವ ನೀರಿಗೆ ಮುಕ್ತಿ ಹಾಡಲು ಬಹುತೇಕ ಗ್ರಾಮಗಳಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕಗಳು ಸ್ಥಾಪಿಸಲಾಗಿದೆ. 60 ಕೆರೆಗಳಿಗೆ ನೀರು ತುಂಬಿಸುವ ಯೋಜನೆ ಮತ್ತು ಗರ್ಭಗುಡಿ ಬ್ರಿಡ್ಜ್ ಕಂ ಬ್ಯಾರೇಜ್‌ ಯೋಜನೆಗೆ ಶೀಘ್ರವೇ ಮುಖ್ಯಮಂತ್ರಿಗಳಿಂದ ಶಂಕುಸ್ಥಾಪನೆ ನೆರವೇರಿಸಲಾಗುವುದು ಎಂದು ತಿಳಿಸಿದರು.

ಪಟ್ಟಣದಲ್ಲಿನ ಪೊಲೀಸ್‌ ಠಾಣೆಯಲ್ಲಿ ವೃತ್ತ ನೀರಿಕ್ಷಕರ ಕಚೇರಿಯನ್ನು ಎದುರುಗಡೆ ಇರುವ ಸರಕಾರಿ ಪ್ರಥಮ ದರ್ಜೆ ಕಾಲೇಜಿಗೆ ಸ್ಥಳಾಂತರಿಸುವ ಕುರಿತು ಬಗ್ಗೆ ಖುದ್ದು ಸ್ಥಳವನ್ನು ಪರಿಶೀಲಿಸಿದ ನಂತರ ಈ ಬಗ್ಗೆ ತೀರ್ಮಾನಿಸಲಾಗುವುದು ಎಂದರು. ಜಿಪಂ ಸದಸ್ಯ ಎಚ್‌.ಬಿ.ಪರಶುರಾಮಪ್ಪ, ತಾಪಂ ಅಧ್ಯಕ್ಷೆ ಅನ್ನಪೂರ್ಣಮ್ಮ, ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಬೇಲೂರು ಅಂಜಪ್ಪ, ತಾಪಂ ಸದಸ್ಯ ರೇವನಗೌಡ, ಮುಖಂಡರಾದ ಎಂ.ವಿ. ಅಂಜಿನಪ್ಪ, ಸಾಬಳ್ಳಿ ಜಂಬಣ್ಣ, ಟಿ.ಎಂ. ಶಿವಶಂಕರ, ಪ್ರೇಮಕುಮಾರಗೌಡ, ಅಂಗಡಿ ಚಂದ್ರಪ್ಪ, ಎಂ.ಅಜ್ಜಣ್ಣ, ವೆಂಕಟೇಶ್‌, ಚನ್ನಬಸವನಗೌಡ, ಲಕ್ಕಹಳ್ಳಿ ಹನುಮಂತಪ್ಪ, ಷಣ್ಮುಖಪ್ಪ, ಪಿಡಬ್ಲೂಡಿ ಎಇಇ ಪ್ರಭಾಕರ, ಎಇಇ ವಿಭುಸ್ವಾಮಿ, ಗ್ರಾಪಂ ಸದಸ್ಯೆ ನೀಲಮ್ಮ, ವಸಂತಪ್ಪ, ಸಿ.ಪರಶುರಾಮ, ಎಲ್‌.ಮಂಜ್ಯನಾಯ್ಕ ಉಪಸ್ಥಿತರಿದ್ದರು.