ಶಾಮನೂರು ರಾಜಕೀಯ ಸ್ವಾರ್ಥಕ್ಕಲ್ಲ ದಾವಣಗೆರೆ ಅಭಿವೃದ್ಧಿಗೆ

Team Udayavani, May 9, 2017, 12:55 PM IST

ದಾವಣಗೆರೆ: ಸತ್‌ಪಾತ್ರರು ಸಂಪತ್ತನ್ನು ಸಾಮಾಜಿಕ ಸೇವಾ ಕೈಂಕರ್ಯದ ಸತ್ಕಾರ್ಯಕ್ಕೆ ಬಳಸುತ್ತಾರೆ ಎಂಬುದಕ್ಕೆ ಶಾಸಕ ಶಾಮನೂರು ಶಿವಶಂಕರಪ್ಪ ಜ್ವಲಂತ ಉದಾಹರಣೆ ಎಂದು ಸುತ್ತೂರು ಮಹಾ ಸಂಸ್ಥಾನ ಮಠದ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಬಣ್ಣಿಸಿದ್ದಾರೆ. 

ಸೋಮವಾರ ಶಾಮನೂರು ಶಿವಶಂಕರಪ್ಪ ಕನ್ವೆನ್‌ಶನ್‌ ಸೆಂಟರ್‌, ಪಾರ್ವತಿ ಪರ್ಲ್ಸ್ (ಮಿನಿ ಛತ್ರ), ಎಸ್‌.ಎಸ್‌. ಮಾಲ್‌ ಸಮುತ್ಛಯ ಲೋಕಾರ್ಪಣೆ ಮತ್ತು ಸಾಮೂಹಿಕ ವಿವಾಹ ಮಹೋತ್ಸವ ಸಮಾರಂಭ ಉದ್ಘಾಟನಾ ಸಮಾರಂಭದ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಶೈಕ್ಷಣಿಕ ಕ್ಷೇತ್ರವಲ್ಲದೆ ಧಾರ್ಮಿಕ ಕ್ಷೇತ್ರದಲ್ಲೂ ಕಾಣಿಕೆ ನೀಡುತ್ತಿರುವ ಶಾಮನೂರು ಶಿವಶಂಕರಪ್ಪ ದಾವಣಗೆರೆಯನ್ನ ವಾಣಿಜ್ಯ, ಸಾಂಸ್ಕೃತಿಕ ನಗರಿಯನ್ನಾಗಿ ಮುನ್ನಡೆಸಿದ ಕೀರ್ತಿ ಹೊಂದಿದ್ದಾರೆ ಎಂದರು. ಅನೇಕ ರಾಜಕಾರಣಿಗಳು, ಪಕ್ಷಕ್ಕೆ ಆರ್ಥಿಕ ಸಹಾಯ ಮಾಡಿರುವ ಶಾಮನೂರು ಶಿವಶಂಕರಪ್ಪನವರು ಮನಸ್ಸು ಮಾಡಿದ್ದರೆ ಏನೆಲ್ಲಾ ರಾಜಕೀಯ ಅಧಿಕಾರ ಪಡೆಯಬಹುದಿತ್ತು.

ಆದರೆ, ಅವರು ರಾಜಕೀಯವನ್ನು ಸಮಾಜ, ದಾವಣಗೆರೆಯ ಅಭಿವೃದ್ಧಿಗೆ ಬಳಸುತ್ತಿದ್ದಾರೆಯೇ ಹೊರತು  ಸ್ವಾರ್ಥಕ್ಕಲ್ಲ. ತಾವು ಉಚಿತ ಕಲ್ಯಾಣ ಮಂಟಪದಲ್ಲಿ ಮದುವೆಯಾಗಿದ್ದನ್ನ ಸ್ಮರಿಸುವ ಎಸ್ಸೆಸ್‌ ದಾವಣಗೆರೆಯಲ್ಲಿ 5 ಕಡೆ ಉಚಿತ ಕಲ್ಯಾಣ ಮಂಟಪ ನಿರ್ಮಿಸುತ್ತಿರುವುದು ಅವರ ಸಾಮಾಜಿಕ ಕಳಕಳಿಗೆ ಸಾಕ್ಷಿ ಎಂದು ಹೇಳಿದರು. 

ಸಾಣೇಹಳ್ಳಿಯ ಡಾ| ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಮಾತನಾಡಿ, ಶಾಮನೂರು ಶಿವಶಂಕರಪ್ಪನವರ ಮನೆತನದವರು ಎಂದಿಗೂ ರಾಜಕೀಯವನ್ನು ಸಾರ್ವಜನಿಕ ಸೇವಾ ಕಾರ್ಯಕ್ಕೆ ಬಳಸಿಕೊಳ್ಳುತ್ತಿದ್ದಾರೆ. ಅನೇಕ ಮನೆತನದವರು ರಾಜಕೀಯಕ್ಕೆ ಬಂದ ನಂತರ ಬ್ರಹ್ಮಾಂಡ ಭ್ರಷ್ಟಾಚಾರದಲ್ಲಿ ತೊಡಗಿಸಿಕೊಳ್ಳುವ ಮೂಲಕ ತಮ್ಮ ಜೊತೆಗೆ ಮನೆನತದ ಹೆಸರನ್ನೂ ಕೆಡಿಸಿಕೊಳ್ಳುವುದು ಕಂಡು ಬರುತ್ತದೆ. 

ಅದಕ್ಕೆ ಅಪವಾದ ಎನ್ನುವಂತೆ ಶಾಮನೂರು ಕುಟುಂಬ ರಾಜಕೀಯ ಮಾಡುತ್ತಿದೆ. ಸಚಿವ ಮಲ್ಲಿಕಾರ್ಜುನ್‌ ಉದ್ದಿಮೆ ಜೊತೆಗೆ ರಾಜಕೀಯದಲ್ಲಿ ಒಳ್ಳೆಯ ಕೆಲಸ ಮಾಡುತ್ತಿದ್ದಾರೆ ಎಂದು ತಿಳಿಸಿದರು. ಮಾಜಿ ಪ್ರಧಾನಿ ಎಚ್‌.ಡಿ. ದೇವೇಗೌಡ ಮಾತನಾಡಿ, ನನ್ನ ಮೊಮ್ಮಗಳ ಗೃಹ ಪ್ರವೇಶ ಇದ್ದರೂ ದಾವಣಗೆರೆಯಲ್ಲಿನ ಈ ಕಾರ್ಯಕ್ರಮಕ್ಕೆ ಎಳೆದು ತಂದಿದ್ದು ನನ್ನ ಮತ್ತು ಶಾಮನೂರು ಶಿವಶಂಕರಪ್ಪ ನವರೊಂದಿಗೆ ನಡುವಿನ ಆತೀಯ ಸಂಬಂಧ.

ಕೇಂದ್ರ ಸ್ಥಾನ ದಾವಣಗೆರೆಯ ಸಮಗ್ರ ಅಭಿವೃದ್ದಿಗೆ ತಮ್ಮ ಜೀವನವನ್ನೇ ಮುಡಿಪಾಗಿಟ್ಟಿರುವ ಶಾಮನೂರು ಶಿವಶಂಕರಪ್ಪ ನನ್ನ ಮಾರ್ಗದರ್ಶಿಗಳು ಹೌದು. ಕೇಂದ್ರ ಸರ್ಕಾರದ ಸ್ಮಾರ್ಟ್‌ಸಿಟಿ ಯೋಜನೆಯನ್ನೇ ಅಣಕು ಮಾಡುವಂತೆ ಅತ್ಯಂತ ಸ್ಮಾರ್ಟ್‌ ಕಟ್ಟಡಗಳನ್ನ ಲೋಕಾರ್ಪಣೆ ಮಾಡಿದ್ದಾರೆ ಎಂದು ಹೇಳಿದರು. 

ತೋಟಗಾರಿಕಾ ಇಲಾಖೆ ಸಚಿವರಾಗಿರುವ ಮಲ್ಲಿಕಾರ್ಜುನ್‌ ಸಹ ತಂದೆಯಂತೆ ಇಲಾಖೆ ಚೆನ್ನಾಗಿ ನಿಭಾಯಿಸುತ್ತಿದ್ದಾರೆ. ಚಿತ್ರದುರ್ಗ ಇತರೆ ಭಾಗದಲ್ಲಿ ರೈತರ ಜೀವನದ ಅಭ್ಯುದಯಕ್ಕೆ ಕಾರಣವಾಗಿರುವ  ತೋಟಗಾರಿಕಾ ಬೆಳೆ ಸಿಡಿಲಿನಿಂದ  ಹಾನಿಗೊಳಗಾಗಿದೆ. ರೈತರಿಗೆ ನೆರವು ನೀಡಬೆಕು ಎಂದ ಅವರು ತಾವು ಹೇಳಿದ್ದನ್ನು ಪಕ್ಷ ಭೇದ ಮರೆತು ಅವರು ಕೆಲಸ ಮಾಡಿಕೊಡಿಸುತ್ತಾರೆ ಎಂದು ತಿಳಿಸಿದರು.