ಸಮಾಜಘಾತುಕರ ಕಡಿವಾಣಕ್ಕೆ ಗೂಂಡಾಕಾಯ್ದೆ ಬ್ರಹ್ಮಾಸ್ತ್ರ

Team Udayavani, May 3, 2017, 12:59 PM IST

ದಾವಣಗೆರೆ: ಸದಾ ಕಾನೂನು ಸುವ್ಯವಸ್ಥೆಗೆ ಭಂಗ ತರುವ ಸಂಘಟಿತ ಅಪರಾಧವೆಸಗುವ ಸಮಾಜಘಾತುಕರ ನಿಯಂತ್ರಣಕ್ಕೆ ಗೂಂಡಾ ಕಾಯ್ದೆ ಅತ್ಯಂತ ಪ್ರಬಲ ಬ್ರಹ್ಮಾಸ್ತ್ರ ಎಂದು ಉತ್ಛ ನ್ಯಾಯಾಲಯದ ಸರ್ಕಾರಿ ವಕೀಲ ಇಂದ್ರೇಶ್‌ ಹೇಳಿದ್ದಾರೆ.ಜಿಲ್ಲಾ ಪೊಲೀಸ್‌ ಕಚೇರಿ ಸಭಾಂಗಣದಲ್ಲಿ ಮಂಗಳವಾರ ಗೂಂಡಾ ಕಾಯ್ದೆ ಅನುಷ್ಠಾನ… ಕುರಿತಂತೆ ಪೂರ್ವ ವಲಯ ಪೊಲೀಸ್‌ ಅಧಿಕಾರಿಗಳಿಗೆ ಆಯೋಜಿಸಿದ್ದ ಕಾರ್ಯಾಗಾರದಲ್ಲಿ ಮಾತನಾಡಿದರು.

ಐಪಿಸಿ, ಸಿಆರ್‌ಪಿ ಕಾಯ್ದೆಯ ಮೂಲಕವೂ ಸಮಾಜಘಾತುಕ ವ್ಯಕ್ತಿಗಳ ನಿಯಂತ್ರಣ ಆಗದಿದ್ದಾಗ ಗೂಂಡಾ ಕಾಯ್ದೆಯ ಬಳಸಿ ನಿಯಂತ್ರಣಕ್ಕೆ ತರಬಹುದು. ಆದರೆ, ಈ ಕಾಯ್ದೆ ಬಳಸುವಾಗ ಸಾಕಷ್ಟು ಜಾಗ್ರತೆ ವಹಿಸುವುದು ಅತ್ಯಗತ್ಯ ಎಂದರು. ಕಾನೂನು ಸುವ್ಯವಸ್ಥೆಗೆ ಭಂಗ ತರುವ  ಸಮಾಜಘಾತುಕರ ನಿಯಂತ್ರಣದ ಜೊತೆಗೆ ಸಾರ್ವಜನಿಕರ ರಕ್ಷಣೆಗಾಗಿ ಗೂಂಡಾ ಕಾಯ್ದೆ ಅನ್ವಯ ಮುಂಜಾಗ್ರತಾ ಕ್ರಮವಾಗಿ ಬಂಧಿಸುವ ಅವಕಾಶ ಇದೆ.

1985ರಿಂದ ಜಾರಿಗೆ ಬಂದಿರುವ ಗೂಂಡಾ ಕಾಯ್ದೆಯಡಿ 2010ರ ವರೆಗೆ ರಾಜ್ಯದಲ್ಲಿ 47 ಪ್ರಕರಣ ಮಾತ್ರ ದಾಖಲಾಗಿದ್ದವು. 2012 ರಲ್ಲಿ ಒಂದೇ ವರ್ಷದಲ್ಲಿ 112 ಪ್ರಕರಣ ದಾಖಲಾಗಿದ್ದವು. 2010ರಲ್ಲಿ ಗೂಂಡಾ ಕಾಯ್ದೆಯ ಶಿಕ್ಷೆಯ ಪ್ರಮಾಣ ಶೇ.3, 2014 ರಲ್ಲಿ ಶೇ.25 ರಷ್ಟಿತ್ತು ಎಂದು ತಿಳಿಸಿದರು. ಇಂತಹವರಿಂದ ಕಾನೂನು, ಶಾಂತಿ, ಸುವ್ಯವಸ್ಥೆಗೆ ಧಕ್ಕೆ ಆಗುತ್ತದೆ ಎಂದು ಮುಂಜಾಗ್ರತಾ  ಕ್ರಮವಾಗಿ ಗೂಂಡಾ ಕಾಯ್ದೆಯಡಿ ಬಂಧನಕ್ಕೆ ಒಳಪಡಿಸಬಹುದು.

ಆದರೆ, ಈ ಕಾಯ್ದೆ ಬಳಸುವಾಗ ಯಾವುದೇ ಕಾರಣಕ್ಕೂ ವ್ಯಕ್ತಿ ಸ್ವಾತಂತ್ರÂ, ಮೂಲಭೂತ ಹಕ್ಕುಗಳ ಉಲ್ಲಂಘನೆ ಆಗದಂತೆ ನೋಡಿಕೊಳ್ಳಬೇಕು. ಗೂಂಡಾ ಕಾಯ್ದೆಗೆ ಒಳಪಡಿಸುವರ ವಿರುದ್ಧ ಸಿದ್ಧಪಡಿಸುವ ವರದಿ ಸಮರ್ಥನೀಯವಾಗಿರಬೇಕು ಅಲ್ಲದೆ ಸಂಬಂಧಿತರಿಂದ ಆಗಬಹುದಾದ ಅನಾಹುತ, ಧಕ್ಕೆಯನ್ನು ಸಶಕ್ತವಾಗಿ ರುಜುವಾತುಪಡಿಸಬೇಕು ಎಂದು ತಿಳಿಸಿದರು. 

ಸಾರ್ವಜನಿಕರ ರಕ್ಷಣೆ, ಕಾನೂನು ಸುವ್ಯವಸ್ಥೆ ಕಾಪಾಡಲು ತಮ್ಮ ವೈಯಕ್ತಿಕ ಬದುಕನ್ನೇ ಮುಡಿಪಾಗಿಟ್ಟು ಕೆಲಸ ಮಾಡುವಂತಹ ಪೊಲೀಸ್‌ ಅಧಿಕಾರಿಗಳು, ಸಿಬ್ಬಂದಿ ಕಾಯ್ದೆ, ಕಾನೂನು ಬಗ್ಗೆ ತಿಳಿದುಕೊಳ್ಳ ಬೇಕು. ಪ್ರತಿ ನಿತ್ಯ ಆಗುವ ಕಾನೂನು, ತಿದ್ದುಪಡಿ ಇತರೆ ವಿಚಾರಗಳ ಬಗ್ಗೆ ಸಮಗ್ರ ಮಾಹಿತಿ ಹೊಂದಬೇಕು. ದೇಶದ ಖ್ಯಾತ ವಕೀಲ ರಾಂ ಜೆಠ್ಮಲಾನಿ, ತಾವು ಪ್ರತಿ ದಿನ ಐಪಿಸಿ 302 ಕಾಯ್ದೆ ಬಗ್ಗೆ ಅಧ್ಯಯನ ಮಾಡುತ್ತೇನೆ ಎಂಬುದಾಗಿ ಹೇಳುತ್ತಾರೆ.

ಅದೇ ರೀತಿ ಪ್ರತಿಯೊಬ್ಬರೂ ಅಧ್ಯಯನಶೀಲರಾಗಬೇಕು ಎಂದು ತಿಳಿಸಿದರು. ಪೂರ್ವ ವಲಯ ಪೊಲೀಸ್‌ ಮಹಾ ನಿರೀಕ್ಷಕ ಡಾ| ಎಂ.ಎ. ಸಲೀಂ ಮಾತನಾಡಿ, ಇಂದಿನ ಆಧುನಿಕ ಯುಗದಲ್ಲಿ ಸಮಾಜದಲ್ಲಿ ಕಾನೂನು, ಸುವ್ಯವಸ್ಥೆ, ಶಾಂತಿಯುತ ವಾತಾವರಣ ಕಾಪಾಡುವಲ್ಲಿ ಪೊಲೀಸರ ಕರ್ತವ್ಯ ಅತ್ಯಂತ ಮಹತ್ವದ್ದಾಗಿದೆ.

ಸಮಾಜದಲ್ಲಿನ ದುಷ್ಟಶಕ್ತಿ, ದುಷ್ಕರ್ಮಿ, ಸಮಾಜಘಾತುಕ ಶಕ್ತಿಗಳ ವಿರುದ್ದ ಮುಂಜಾಗ್ರತಾ ಕ್ರಮ ತೆಗೆದುಕೊಳ್ಳಲು ಇರುವ ಪ್ರಬಲ, ಶಕ್ತಿಯುತ ಗೂಂಡಾ ಕಾಯ್ದೆಯನ್ನು ಸರಿಯಾಗಿ ಬಳಕೆ ಮಾಡಬೇಕು. ಸಮಾಜಘಾತುಕ ಶಕ್ತಿಗಳನ್ನ ಗೂಂಡಾ ಕಾಯ್ದೆಯಡಿ ಬಂಧಿಸುವ ಮೂಲಕ ಇತರರಿಗೆ ಕಠಿಣ ಸಂದೇಶ ರವಾನಿಸುವಂತಾಗಬೇಕು ಎಂದು ತಿಳಿಸಿದರು. 1947ಕ್ಕೂ ಮುನ್ನ ಬ್ರಿಟಿಷರು ಅನೇಕ ರಾಷ್ಟ್ರೀಯ ನಾಯಕರ ವಿರುದ್ಧ ಗೂಂಡಾ ಕಾಯ್ದೆ ಬಳಸುತ್ತಿದ್ದರು.

1947ರ ನಂತರ ಈ ಕಾಯ್ದೆಯ ದುರ್ಬಳಕೆ ತಡೆಗಟ್ಟುವ ನಿಟ್ಟಿನಲ್ಲಿ ಸಾಕಷ್ಟು ತಿದ್ದುಪಡಿ ತರಲಾಗುತ್ತಿದೆ. ಈ ಕಾಯ್ದೆಯ  ಅನ್ವಯ ಸಮಾಜಘಾತುಕ ಶಕ್ತಿಗಳನ್ನ ಬಂಧಿಸಿ, 1 ವರ್ಷದವರೆಗೆ ಬಂಧನದಲ್ಲಿಡಬಹುದು. ಈ ಕಾಯ್ದೆ ಅನುಷ್ಠಾನಗೊಳಿಸುವಾಗ ಸಾಕಷ್ಟು ಕ್ರಮ, ಮಾನದಂಡ ಅನುಸರಿಸಬೇಕಿದೆ ಎಂದರು. 

ಪೂರ್ವ ವಲಯದಲ್ಲಿ 2015 ರಲ್ಲಿ ಗೂಂಡಾ ಕಾಯ್ದೆ ಅನ್ವಯ 16 ಪ್ರಕರಣ ಮಾತ್ರ ದಾಖಲಾಗಿವೆ. 2016 ರಲ್ಲಿ 8, ಈ ವರ್ಷ ಇಲ್ಲಿಯವರೆಗೆ ಶಿವಮೊಗ್ಗ ಜಿಲ್ಲಾ ವ್ಯಾಪ್ತಿಯಲ್ಲಿ ಒಂದು ಪ್ರಕರಣ ದಾಖಲಾಗಿದೆ. ದಾವಣಗೆರೆ, ಚಿತ್ರದುರ್ಗ ಇತರೆ ಜಿಲ್ಲೆಯಲ್ಲಿ ಹೆಚ್ಚಿನ ಪ್ರಕರಣ ದಾಖಲಾಗಿಲ್ಲ. ಮಟ್ಕಾ, ಕ್ರಿಕೆಟ್‌ ಬೆಟ್ಟಿಂಗ್‌ ಇತರೆ ಸಂಘಟಿತ ಅಪರಾಧಕ್ಕೆ ಸಂಬಂಧಿಸಿದಂತೆ ಗೂಂಡಾ ಕಾಯ್ದೆಯನ್ನ ಸರಿಯಾಗಿ ಬಳಸಬೇಕು ಎಂದು ತಿಳಿಸಿದರು. 

ಜಿಲ್ಲಾ ರಕ್ಷಣಾಧಿಕಾರಿ ಡಾ| ಭೀಮಾಶಂಕರ್‌ ಎಸ್‌. ಗುಳೇದ್‌ ಸ್ವಾಗತಿಸಿದರು. ವೃತ್ತ ನಿರೀಕ್ಷಕ ಜಿ.ಬಿ. ಉಮೇಶ್‌ ನಿರೂಪಿಸಿದರು. ಗ್ರಾಮಾಂತರ ಉಪಾಧೀಕ್ಷಕ ಬಿ.ಎಸ್‌. ನೇಮಗೌಡ ವಂದಿಸಿದರು. ಪೂರ್ವ ವಲಯದ ದಾವಣಗೆರೆ, ಹಾವೇರಿ, ಶಿವಮೊಗ್ಗ, ಚಿತ್ರದುರ್ಗ ಜಿಲ್ಲೆಯ 60ಕ್ಕೂ ಹೆಚ್ಚು ಅಧಿಕಾರಿಗಳು ಭಾಗವಹಿಸಿದ್ದರು.