ಪುಲ್ವಾಮಾ ಘಟನೆ ಪ್ರಶ್ನಿಸಿದರೆ ದೇಶದ್ರೋಹಿ ಪಟ್ಟ

Team Udayavani, Mar 7, 2019, 8:53 AM IST

ದಾವಣಗೆರೆ: ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾದಲ್ಲಿ ನಡೆದ ಘಟನೆಯ ಜವಾಬ್ದಾರಿ ಮತ್ತು ಹೊಣೆಗಾರಿಕೆಯ ಬಗ್ಗೆ ಪ್ರಶ್ನಿಸಿದವರಿಗೆ ದೇಶದ್ರೋಹಿ, ರಾಷ್ಟ್ರ ವಿರೋಧಿ ಚಟುವಟಿಕೆಯ ಪಟ್ಟ ಕಟ್ಟಲಾಗುತ್ತಿದೆ ಎಂದು ಕರ್ನಾಟಕ ಪ್ರದೇಶ ಕಾಂಗ್ರೆಸ್‌ ಸಮಿತಿ ಪ್ರಧಾನ ಕಾರ್ಯದರ್ಶಿ ಮುರುಳೀಧರ್‌ ಹಾಲಪ್ಪ ದೂರಿದ್ದಾರೆ.

ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಬುಧವಾರ ಬಾಪೂಜಿ ಎಂಬಿಎ ಸಭಾಂಗಣದಲ್ಲಿ ದಾವಣಗೆರೆ ಉತ್ತರ ವಿಧಾನಸಭಾ ಕ್ಷೇತ್ರದ ಸಿದ್ಧತಾ ಶಿಬಿರ ಉದ್ಘಾಟಿಸಿ ಮಾತನಾಡಿದ ಅವರು, ಪುಲ್ವಾಮಾದ ಘಟನೆ ಕುರಿತಂತೆ ಟಿವಿ, ರೇಡಿಯೋ, ಸಾಮಾಜಿಕ ಜಾಲತಾಣದಲ್ಲಿ ಬಗೆಬಗೆಯ ಚರ್ಚೆ ನಡೆಯುತ್ತಿವೆ. ಈ ಕ್ಷಣದವರೆಗೆ ಆ ಘಟನೆಗೆ ಮೂಲ ಕಾರಣರು ಯಾರು ಎಂಬುದರ ವಿಷಯವಾಗಿ ಜವಾಬ್ದಾರಿ ಸ್ಥಾನದಲ್ಲಿರುವ ಯಾರೊಬ್ಬರು ಸಹ ಅಧಿಕೃತ ಹೇಳಿಕೆಯನ್ನೇ ನೀಡಿಲ್ಲ. ಯಾವುದೇ ಸಂಬಂಧವೇ ಇಲ್ಲದ ಅಮಿತ್‌ ಶಾ ಹೇಳಿಕೆ ಕೊಡುತ್ತಾರೆ. ಪುಲ್ವಾಮಾ ಘಟನೆಯ ಬಗ್ಗೆ
ಹೇಳಿಕೆ ನೀಡಲು ಅವರಿಗೆ ಯಾವುದಾದರೂ ಸಂವಿಧಾನತ್ಮಕ ಜವಾಬ್ದಾರಿ ನೀಡಲಾಗಿದೆಯೇ ಎಂದು ಪ್ರಶ್ನಿಸಿದರು.

ಪುಲ್ವಾಮಾ ಘಟನೆ ಭಾರತ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಲೆ ತಗ್ಗಿಸುವ ವಿಚಾರ. ಪುಲ್ವಾಮಾದ ಘಟನೆಯಲ್ಲಿ 44 ಜನ ಸಿಆರ್‌ಪಿಎಫ್‌ ಯೋಧರು ಹುತಾತ್ಮರಾಗಲಿಕ್ಕೆ ಆಡಳಿತ, ಗುಪ್ತಚರ ಇಲಾಖೆ ವೈಫಲ್ಯವೋ ಏನೂ ಗೊತ್ತಿಲ್ಲ. ಆ ಘಟನೆಯ ಬಗ್ಗೆ ಜಮ್ಮು ಮತ್ತು ಕಾಶ್ಮೀರದ ರಾಜ್ಯಪಾಲರ ಮೂವರು ಸಲಹೆಗಾರಾಗಲಿ, ಜವಾಬ್ದಾರಿಯ ಸ್ಥಾನದಲ್ಲಿರುವ ಯಾರೂ ಸಹ ಅಧಿಕೃತ ಹೇಳಿಕೆಯನ್ನೇ ಕೊಟ್ಟಿಲ್ಲ. ಎಂದು ಹೇಳಿದರು. 

ಫೆ. 14 ರಂದು ಮಧ್ಯಾಹ್ನ 3 ಗಂಟೆ 8 ನಿಮಿಷಕ್ಕೆ ಪುಲ್ವಾಮಾದ ಘಟನೆ ನಡೆದಿದ್ದರೂ ದೇಶದ ಮಹಾನ್‌ ಕಾವಲುಗಾರ, ಭಾರತ ಮಾತ್ರವಲ್ಲ ವಿಶ್ವಮಾನ್ಯರಾಗಿರುವ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಹೇಳಿಕೆ ಕೊಟ್ಟಿದ್ದು ಸಂಜೆ 6ಕ್ಕೆ. ಉತ್ತರಾಂಚಲ್‌ ಪ್ರದೇಶದ ನೈನಿತಾಲ್‌ ಅರಣ್ಯಧಾಮದಲ್ಲಿ
ಶೂಟಿಂಗ್‌ನಲ್ಲಿ ನಿರತರಾಗಿದ್ದಂತಹ ದೇಶದ ಮಹಾನ್‌ ಕಾವಲುಗಾರ 4 ಗಂಟೆಗಳ ಕಾಲ ಯಾರ ಸಂಪರ್ಕಕ್ಕೂ ಸಿಕ್ಕಿರಲಿಲ್ಲ. ಪುಲ್ವಾಮಾದ ಘಟನೆಯಲ್ಲಿ ಹುತಾತ್ಮರ ಶವದ ಪೆಟ್ಟಿಗೆಗಳನ್ನು ಪಾಲಂ ವಿಮಾನ ನಿಲ್ದಾಣಕ್ಕೆ ತರಲಿಕ್ಕೂ ದೇಶದ ಮಹಾನ್‌ ಕಾವಲುಗಾರ ಒಂದು ಗಂಟೆ ಕಾಯಿಸಿದರು.

ಇಡೀ ದೇಶ ಶೋಕಾಚರಣೆ ನಡೆಸುತ್ತಿದ್ದರೆ ಮೋದಿಯವರು ಪುಲ್ವಾಮಾ ಘಟನೆಯನ್ನೇ ಎನ್‌ಕ್ಯಾಷ್‌ ಮಾಡಿಕೊಳ್ಳುವ ಉದ್ದೇಶದಿಂದ ರಾಜಕೀಯ ರ್ಯಾಲಿಯಲ್ಲಿ ತೊಡಗಿದ್ದರು ಎಂದು ಆರೋಪಿಸಿದರು. ಅಧಿಕಾರಕ್ಕೆ ಬಂದ 4 ವರ್ಷ 7 ತಿಂಗಳಲ್ಲಿ ಮೋದಿ 61 ದೇಶಗಳ ಪ್ರವಾಸ ಮಾಡಿದ್ದಾರೆ. ಅವರಂತಹ ವಿದೇಶ ಪ್ರವಾಸದ ಎಕ್ಸ್‌ಪರ್ಟ್‌…. ಇನ್ನೊಬ್ಬರಿಲ್ಲ ಎಂದು ವ್ಯಂಗ್ಯವಾಡಿದರು.

ಪುಲ್ವಾಮಾ ಮಾತ್ರವಲ್ಲ ಉರಿ, ಉದಾಂಪುರ, ಪಠಾಣ್‌ಕೋಟ್‌, ಡೊಕ್ಲಾಮಾ… ಘಟನೆಗಳ ಬಗ್ಗೆ ಯಾರಾದರೂ ಯಾವುದಾದರೂ ಪ್ರಶ್ನೆ ಕೇಳಿದರೆ ಅವರಿಗೆ ದೇಶದ್ರೋಹದ ಪಟ್ಟ ಕಟ್ಟಲಾಗುತ್ತದೆ. ಯುವಕರು, ಮಹಿಳೆಯರು ಆ ಘಟನೆಗಳ ಬಗ್ಗೆ ಪ್ರಶ್ನೆ ಕೇಳಬೇಕು ಎಂದು ತಿಳಿಸಿದರು. 

ಡಾ| ಶಿವಕುಮಾರ ಸ್ವಾಮಿ ಲಿಂಗೈಕ್ಯರಾದ ಸಂದರ್ಭದಲ್ಲಿ ದೆಹಲಿ ಬಿಜೆಪಿಯ ಯಾವುದೇ ಮುಖಂಡರು ಸಿದ್ಧಗಂಗೆಯತ್ತ ಸುಳಿಯಲೇ ಇಲ್ಲ. ರಾಜ್ಯ ನಾಯಕರು ಕೈ ಕಾಲು ಹಿಡಿದುಕೊಂಡಿದ್ದಕ್ಕೆ ಕೊನೆಯದಾಗಿ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಎಲ್ಲಾ ಮುಗಿಯುವಾಗ ಬಂದರು.
ಕೇಂದ್ರ ಸರ್ಕಾರ ವೀರಶೈವ, ಲಿಂಗಾಯತರನ್ನ ಯಾಕೆ ಸಚಿವರನ್ನಾಗಿ ಮಾಡಿಲ್ಲ ಎಂದು ಪ್ರಶ್ನಿಸಿದ ಒಕ್ಕಲಿಗ ಸಮುದಾಯದ ಸದಾನಂದಗೌಡರಿಂದ ರೈಲ್ವೆ ಖಾತೆಯನ್ನ ಕಿತ್ತುಕೊಂಡರು ಎಂದರು. 

ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಎಚ್‌.ಬಿ. ಮಂಜಪ್ಪ ಮಾತನಾಡಿ, ಮಾಜಿ ಸಚಿವ ಎಸ್‌.ಎಸ್‌. ಮಲ್ಲಿಕಾರ್ಜುನ್‌ರವರೇ ದಾವಣಗೆರೆ ಲೋಕಸಭಾ ಕ್ಷೇತ್ರದ ಕಾಂಗ್ರೆಸ್‌ ಅಭ್ಯರ್ಥಿ. ಅವರನ್ನ ಗೆಲ್ಲಿಸುವ ಮೂಲಕ ಜಿಲ್ಲೆಯ ಅಭಿವೃದ್ಧಿಗೆ ಸಹಕರಿಸಬೇಕು ಎಂದು ಮನವಿ ಮಾಡಿದರು.
 
ಕಪಿಸಿಸಿ ಕಾರ್ಯದರ್ಶಿಗಳಾದ ರಾಜು ಜಮಖಂಡಿ, ಖಾದರ್‌ ಮೊಹಿದ್ದೀನ್‌ ಶೇಖ್‌, ಮೇಯರ್‌ ಶೋಭಾ ಪಲ್ಲಾಗಟ್ಟೆ, ಮುದೇಗೌಡ್ರ ಗಿರೀಶ್‌, ಅಮೃತೇಶ್ವರಸ್ವಾಮಿ, ಬಿ.ಕೆ. ಪರಶುರಾಮ್‌, ಬಿ.ಎಸ್‌. ನಂಜಾನಾಯ್ಕ, ಕೆ.ಸಿ. ಲಿಂಗರಾಜ್‌, ಡೋಲಿ ಚಂದ್ರು, ಯತಿರಾಜ್‌, ಅಲಿ ರಹಮತ್‌, ಎ. ನಾಗರಾಜ್‌, ಕೆ.ಜಿ. ಶಿವಕುಮಾರ್‌, ಇತರರು ಇದ್ದರು. ದಿನೇಶ್‌ ಕೆ. ಶೆಟ್ಟಿ ಸ್ವಾಗತಿಸಿದರು.