ಜೋರಾಯ್ತು ಆಟೋ ಮೀಟರ್‌ ಕಡ್ಡಾಯದ ಚರ್ಚೆ

Team Udayavani, Aug 25, 2021, 6:42 PM IST

„ರಾ. ರವಿಬಾಬು

ದಾವಣಗೆರೆ : ಪ್ರಾದೇಶಿಕ ಸಾರಿಗೆ ಪ್ರಾಧಿ ಕಾರ ಸೆ. 1ರ ಒಳಗೆ ಆಟೋರಿಕ್ಷಾಗಳಿಗೆ ಮೀಟರ್‌ ಅಳವಡಿಕೆ ಕಡ್ಡಾಯಗೊಳಿಸಿರುವುದು ಸಾರ್ವಜನಿಕ ಮತ್ತು ಆಟೋರಿಕ್ಷಾ ಚಾಲಕರು, ಮಾಲೀಕ ವರ್ಗದಲ್ಲಿ ಜಿಜ್ಞಾಸೆ, ಗೊಂದಲಕ್ಕೆ ಕಾರಣವಾಗುತ್ತಿದೆ. ಕಳೆದ ಆ. 30 ರಂದು ನಡೆದ ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರದ ಸಭೆಯಲ್ಲಿ ದರ ಪರಿಷ್ಕರಣೆ ಜೊತೆಗೆ ಎಲ್ಲ ಆಟೋರಿಕ್ಷಾಗಳಿಗೆ ಮೀಟರ್‌ ಅಳವಡಿಕೆ ಕಡ್ಡಾಯಗೊಳಿಸಲಾಗಿದೆ. ಸೆ. 1ರ ಒಳಗೆ ಮೀಟರ್‌ ಅಳವಡಿಸಲೇಬೇಕು ಎಂದು ಆದೇಶಿಸಿರುವುದನ್ನ ಕೆಲವರು ಸ್ವಾಗತಿಸಿದರೆ, ಇನ್ನು ಕೆಲವರು ಗೊಂದಲಕ್ಕೆ ಅವಕಾಶ ಮಾಡಿಕೊಡುವ ಸಾಧ್ಯತೆಯ ಹಿನ್ನೆಲೆಯಲ್ಲಿ ಇನ್ನೊಮ್ಮೆ ಸಾರ್ವಜನಿಕರು, ಆಟೋರಿಕ್ಷಾ ಚಾಲಕರು, ಮಾಲಿಕರೊಡನೆ ಕೂಲಂಕುಷವಾಗಿ ಚರ್ಚಿಸಿದ ನಂತರವೇ ಸೂಕ್ತ ತೀರ್ಮಾನ ತೆಗೆದುಕೊಳ್ಳಬೇಕು ಎಂದು ಒತ್ತಾಯಿಸಿದ್ದಾರೆ.

ಗೊಂದಲಕ್ಕೆ ಕಾರಣ ಏನು?: ದಾವಣಗೆರೆಯಲ್ಲಿ ಈಗ ಬಾಡಿಗೆ ಆಧಾರದಲ್ಲಿ ಆಟೋರಿಕ್ಷಾಗಳು ನಡೆಯುತ್ತಿವೆ. ಸಾಮಾನ್ಯವಾಗಿ 30-40 ರೂಪಾಯಿ ಮಾಮೂಲು ಬಾಡಿಗೆ ಇದೆ. ಕೊಂಚ ದೂರವಾದರೆ 50 ರೂಪಾಯಿ ಆಗುತ್ತದೆ. ಈಗಾಗಲೇ ಅನೇಕ ವರ್ಷದಿಂದ ಬಾಡಿಗೆಗೆ ಫಿಕ್ಸ್‌ ಆಗಿರುವುದರಿಂದ ಏಕಾಏಕಿ ಮೀಟರ್‌ ಅಳವಡಿಕೆ ಮಾಡುವುದರಿಂದ ಅನಗತ್ಯ ಗೊಂದಲಕ್ಕೆ ಕಾರಣವಾಗಲಿದೆ ಎಂಬುದು ದಾವಣಗೆರೆ ಜಿಲ್ಲಾ ಆಟೋ ಚಾಲಕರ ಮತ್ತು ಮಾಲೀಕರ ಸಂಘ(ಎಐಟಿಯುಸಿ) ಜಿಲ್ಲಾಧ್ಯಕ್ಷ ಆವರಗೆರೆ ವಾಸು ಅಭಿಪ್ರಾಯ.

ಕಾನೂನು ಪ್ರಕಾರ ಆಟೋರಿಕ್ಷಾಗಳಲ್ಲಿ ಮೀಟರ್‌ ಅಳವಡಿಸಬೇಕು. ಅದನ್ನು ಸ್ವಾಗತಿಸುತ್ತೇವೆ. ಆದರೆ, ಈಗಾಗಲೇ ಸಾರ್ವಜನಿಕರು ಮತ್ತು ಆಟೋದವರು ಬಾಡಿಗೆಗೆ ಫಿಕ್ಸ್‌ ಆಗಿದ್ದಾರೆ. ಬೆಂಗಳೂರಿನಂತಹ ಬೆಳೆದಿರುವ ಸಿಟಿಗಳಲ್ಲಿ ಜನರು ಮೀಟರ್‌ ಬಾಡಿಗೆ ಆಧಾರದಲ್ಲಿ ಓಡಾಡುವುದನ್ನು ರೂಢಿಸಿಕೊಂಡಿದ್ದಾರೆ. ಆದರೆ ದಾವಣಗೆರೆಯಂತಹ ನಗರಗಳಲ್ಲಿ ಮೀಟರ್‌ ಬಾಡಿಗೆಗೆ ಬಗ್ಗೆ ಹೆಚ್ಚು ಮಾಹಿತಿ ಇಲ್ಲ. ಇಂತಿಷ್ಟು ಬಾಡಿಗೆ ಎಂದು ಓಡಾಡುವುದು ಮಾಮೂಲು ಆಗಿರುವುದರಿಂದ ಮೀಟರ್‌ ಅಳವಡಿಸುವುದರಿಂದ ಜನರು ಆಟೋ ಹತ್ತಲು ಹಿಂದೇಟು ಹಾಕಲೂಬಹುದು ಮತ್ತು ಗೊಂದಲಕ್ಕೂ ಕಾರಣವಾಗಬಹುದು. ಹಾಗಾಗಿ ಜಿಲ್ಲಾಡಳಿತ, ಜಿಲ್ಲಾ ಪೊಲೀಸ್‌, ಸಾರಿಗೆ ಇಲಾಖೆ ಇನ್ನೊಮ್ಮೆ ಸಭೆ ಕರೆದು, ಪರಾಮರ್ಶೆ ನಡೆಸಬೇಕು ಎಂದು ಒತ್ತಾಯಿಸಿದ್ದಾರೆ.

ದರ ನಿಗದಿಗೆ ಆಕ್ಷೇಪ: ಸಾರಿಗೆ ಪ್ರಾಧಿಕಾರದ ಸಭೆಯಲ್ಲಿ ಕನಿಷ್ಠ 2 ಕಿಮೀಗೆ 26 ರಿಂದ 30 ರೂ.ಗೆ ಹೆಚ್ಚಳ ಮಾಡಲಾಗಿದೆ. ನಂತರ ಪ್ರತಿ ಕಿಲೋಮೀಟರ್‌ ಗೆ 13 ರಿಂದ 15 ರೂ.ಗೆ ಹೆಚ್ಚಿಸಲಾಗಿದೆ. ಗರಿಷ್ಠ 6 ಕಿಲೋಮೀಟರ್‌ ದರ 78 ರೂಪಾಯಿಯಿಂದ 90 ರೂಪಾಯಿಗೆ ಹೆಚ್ಚಿಸಲಾಗಿದೆ. ವೇಟಿಂಗ್‌ ಬಾಡಿಗೆ 15 ನಿಮಿಷವರೆಗೆ ಉಚಿತ, ನಂತರ 15 ನಿಮಿಷಕ್ಕೆ 5 ರೂಪಾಯಿ ನಿಗದಿಪಡಿಸಲಾಗಿದೆ. ಪ್ರಯಾಣಿಕರ ಸರಕಿಗೆ (ಲಗೇಜ್‌) 20 ಕೆಜಿವರೆಗೆ ಉಚಿತ, ನಂತರದ 20 ಕೆಜಿಗೆ 5 ರೂಪಾಯಿ, ರಾತ್ರಿ 10 ಗಂಟೆಯಿಂದ ಬೆಳಗಿನ 5 ರವರೆಗೆ ಒಂದೂವರೆ ಪಟ್ಟು ದರ ನಿಗದಿ ಮಾಡಲಾಗಿದೆ.

ಸಾರ್ವಜನಿಕರು, ಆಟೋರಿಕ್ಷಾ ಚಾಲಕರು, ಮಾಲೀಕರ ವರ್ಗದಿಂದ ಇದಕ್ಕೆ ಆಕ್ಷೇಪ ವ್ಯಕ್ತವಾಗುತ್ತಿದೆ.ದಿನದಿಂದ ದಿನಕ್ಕೆ ಪೆಟ್ರೋಲ್‌, ಡೀಸೆಲ್‌, ಸಿಲಿಂಡರ್‌ ಬೆಲೆ ಏರಿಳಿತ ಆಗುತ್ತಿರುತ್ತದೆ. ಯಾವ ದರದ ಆಧಾರದಲ್ಲಿ ಆಟೋರಿಕ್ಷಾ ಬಾಡಿಗೆ ದರ ಪರಿಷ್ಕರಣೆ ಮಾಡಲಾಗುತ್ತದೆ. ಇಂದಿನ ರೇಟ್‌ ಆಧಾರದಲ್ಲಿ ಬಾಡಿಗೆ ಫಿಕ್ಸ್‌ ಮಾಡಿದರೆ ನಾಳೆ ಏಕಾಏಕಿ ಪೆಟ್ರೋಲ್‌, ಡೀಸೆಲ್‌, ಸಿಲಿಂಡರ್‌ ಬೆಲೆ ಹೆಚ್ಚಾದರೆ ಆಟೋದವರಿಗೆ ಕಷ್ಟವಾಗುತ್ತದೆ ಎನ್ನುತ್ತಾರೆ ಕೆಲವು ಆಟೋರಿಕ್ಷಾ ಚಾಲಕರು ಮತ್ತು ಮಾಲೀಕರು.

ಹಾಗಾಗಿ ಸಂಬಂಧಪಟ್ಟವರು ಆಟೋರಿಕ್ಷಾಗಳಲ್ಲಿ ಮೀಟರ್‌ ಅಳವಡಿಕೆ, ದರ ಪರಿಷ್ಕರಣೆ ಕುರಿತಂತೆ ಮತೊಮ್ಮೆ ಗಮನ ಹರಿಸಬೇಕು ಎಂಬ ಒತ್ತಾಯ ಸಾರ್ವಜನಿಕ, ಆಟೋರಿಕ್ಷಾ ವಲಯದಿಂದ ಕೇಳಿ ಬರುತ್ತಿದೆ.

ದಾವಣಗೆರೆ : ಆಟೋರಿಕ್ಷಾಗಳಲ್ಲಿ ಮೀಟರ್‌ ಅಳವಡಿಸಲಾಗುವುದು ಎಂಬ ಆದೇಶ ಇದೇ ಮೊದಲೇನಲ್ಲ 1997-98 ರಲ್ಲಿ 5 ರೂಪಾಯಿ ಬಾಡಿಗೆ ಇದ್ದ ಸಂದರ್ಭದಲ್ಲೇ ಆಟೋರಿಕ್ಷಾಗಳಲ್ಲಿ 7 ರೂಪಾಯಿ ಕನಿಷ್ಟ ಬಾಡಿಗೆ ನಿರ್ಧರಿಸಿ ಮೀಟರ್‌ ಅಳವಡಿಕೆ ಮಾಡಲಾಗಿತ್ತು. ಆದರೆ ಹೆಚ್ಚು ದಿನ ಮೀಟರ್‌ ಬಾಡಿಗೆ ಪ್ರಕ್ರಿಯೆ ಮುಂದುವರೆಯಲೇ ಇಲ್ಲ. 2019 ರ ನ. 29 ರಂದು ಅಂದಿನ ಜಿಲ್ಲಾಧಿಕಾರಿ ಅಧ್ಯಕ್ಷತೆಯಲ್ಲಿ ನಡೆದ ಸಾರಿಗೆ ಪ್ರಾಧಿಕಾರದ ಸಭೆಯಲ್ಲಿ ನ. 1 ರಿಂದಲೇ ಮೀಟರ್‌ ಕಡ್ಡಾಯಗೊಳಿಸಲು ತೀರ್ಮಾನ ಕೈಗೊಳ್ಳಲಾಗಿತ್ತು.

ಆದರೆ ದಾವಣಗೆರೆಯ ಹಲವಾರು ಭಾಗದಲ್ಲಿ ರಸ್ತೆಗಳೇ ಸರಿ ಇಲ್ಲ, ಮೀಟರ್‌ ಜಂಪಿಂಗ್‌ ಆಗುತ್ತದೆ, ಜನರು ಒಪ್ಪುವುದಿಲ್ಲ ಎಂಬ ಕಾರಣಕ್ಕೆ ಮೀಟರ್‌ ಅಳವಡಿಕೆ ಮರೀಚಿಕೆಯಾಗಿತ್ತು. ಈಗ ಮತ್ತೆ ಆಟೋರಿಕ್ಷಾಗಳಲ್ಲಿ ಸೆ.1 ರ ಒಳಗೆ ಮೀಟರ್‌ ಅಳವಡಿಕೆ ಕಡ್ಡಾಯ ಮಾಡಲಾಗಿದೆ. ಕೊರೊನಾ ಸಂಕಷ್ಟದಲ್ಲಿ ಆಟೋರಿಕ್ಷಾ ಚಾಲಕರು, ಮಾಲೀಕರು ಮಾತ್ರವಲ್ಲ ಸಾರ್ವಜನಿಕರು ಜೀವನ ನಡೆಸುವುದು ಕಷ್ಟವಾಗಿದೆ. ಸಂಕಷ್ಟದ ಸಮಯದಲ್ಲಿ ಮೀಟರ್‌ ಅಳವಡಿಕೆ ಸರಿಯೇ ಎಂಬುದು ಸಾರ್ವಜನಿಕರು, ಆಟೋರಿಕ್ಷಾ ಚಾಲಕರು, ಮಾಲೀಕರ ಆಕ್ಷೇಪ.