ಕಾರ್ಮಿಕರು-ಶ್ರಮಜೀವಿಗಳೇ ದೇಶದ ಪ್ರಗತಿಗೆ ಕಾರಣ

Team Udayavani, May 4, 2019, 3:21 PM IST

ದಾವಣಗೆರೆ: ಶಿವಯೋಗಾಶ್ರಮದಲ್ಲಿ ಶುಕ್ರವಾರ ನಡೆದ ಶರಣ ಸಂಗಮ ಕಾರ್ಯಕ್ರಮದಲ್ಲಿ ಪಿಯುಸಿಯಲ್ಲಿ ಹೆಚ್ಚು ಅಂಕ ಪಡೆದ ವಿದ್ಯಾರ್ಥಿನಿ ಪೂಜಾ ಅವರನ್ನು ಸನ್ಮಾನಿಸಲಾಯಿತು.

ದಾವಣಗೆರೆ: ನಿಸ್ವಾರ್ಥ ಸೇವೆ ಸಲ್ಲಿಸುತ್ತಿರುವ ಕಾರ್ಮಿಕರು, ಶ್ರಮಜೀವಿಗಳೇ ದೇಶದ ಪ್ರಗತಿಗೆ ಕಾರಣ ಎಂದು ದೊಡ್ಡಪೇಟೆ ವಿರಕ್ತಮಠದ ಶ್ರೀ ಬಸವಪ್ರಭು ಸ್ವಾಮೀಜಿ ಹೇಳಿದರು.

ನಗರದ ಜಯದೇವ ವೃತ್ತದ ಶಿವಯೋಗಾಶ್ರಮದಲ್ಲಿ ಶುಕ್ರವಾರ ವಿರಕ್ತಮಠ ಶಿಚವಯೋಗಾಶ್ರಮ, ವಚನ ಸಾಹಿತ್ಯ ಪರಿಷತ್‌, ಚುಟುಕು ಸಾಹಿತ್ಯ ಪರಿಷತ್‌, ಸ್ಫೂರ್ತಿ ಪ್ರಕಾಶನ ಸಂಯುಕ್ತಾಶ್ರಯದಲ್ಲಿ ಶರಣ ಸಂಗಮ ಹಾಗೂ ಬಸವಣ್ಣನವರ ಜಯಂತಿ ಅಂಗವಾಗಿ ಹಮ್ಮಿಕೊಂಡಿದ್ದ ಕವಿಗೋಷ್ಠಿ ಕಾರ್ಯಕ್ರಮದ ಸಾನ್ನಿಧ್ಯವಹಿಸಿ ಮಾತನಾಡಿದರು.

ದೇಶವು ರಾಜಕಾರಣಿಗಳು, ಶ್ರೀಮಂತರು, ಬಂಡವಾಳಶಾಹಿಗಳಿಂದ ಪ್ರಗತಿಯಾಗಿಲ್ಲ. ಪ್ರಾಮಾಣಿಕವಾಗಿ ದುಡಿಯುವ ಕಾರ್ಮಿಕರು, ಶ್ರಮಜೀವಿಗಳಿಂದಾಗಿದೆ. ಅಂತಹ ದುಡಿಯುವ ವರ್ಗಕ್ಕೆ ಗೌರವ, ಸಮಾನತೆ ನೀಡಬೇಕು. ಆಗ ಮಾತ್ರ ದೇಶ ಸರ್ವಾಂಗೀಣ ಅಭಿವೃದ್ಧಿ ಸಾಧ್ಯ ಎಂದರು.

ದೇಶದಲ್ಲಿ ಬೆವರು ಸುರಿಸಿ ಯಾರು ದುಡಿಯುತ್ತಾರೋ ಅವರ ಸೇವೆ ಶ್ರೇಷ್ಠವಾದದ್ದು. ದುರಂತವೆಂದರೆ ನಮ್ಮ ದೇಶದಲ್ಲಿ ಈ ವರ್ಗವನ್ನು ಕಡೆಗಣಿಸಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಶ್ರಮಿಕ ವರ್ಗ ಬಡವಾಗಿಯೇ ಉಳಿದಿದೆ ಎಂದು ಕಳವಳ ವ್ಯಕ್ತಪಡಿಸಿದರು.

ಇಂದು ದುಡಿಯದೇ ಪ್ರತಿಫಲ ಬಯಸುವ ಜನರೇ ಅಧಿಕವಾಗಿದ್ದಾರೆ. ದೇಶದ ಜನಸಂಖ್ಯೆ 130 ಕೋಟಿ ದಾಟಿದರೂ ಕೆಲಸ ಮಾಡುವ ಜನ ಸಿಗದಂತಾಗಿದೆ. ಸೋಮಾರಿಯಾಗಿ ಸುಖವಾಗಿರಬೇಕೆಂಬ ಜನರಿಂದ ಕುಟುಂಬವಾಗಲಿ, ದೇಶವಾಗಲಿ ಎಂದೂ ಉದ್ಧಾರವಾಗಲು ಸಾಧ್ಯವಿಲ್ಲ. ದುಡಿದು ಉಣ್ಣುವ ಪ್ರತಿಜ್ಞೆ ಮಾಡುವ ಜನರಿಂದ ಮಾತ್ರ ಉದ್ಧಾರ ಸಾಧ್ಯ ಎಂದು ಹೇಳಿದರು.

ಶರಣ ಸಂಸ್ಕೃತಿಯು ಶ್ರಮ ಸಂಸ್ಕೃತಿಯಾಗಿದೆ. ಶ್ರಮಜೀವಿಗಳೇ ನಿಜವಾದ ಶರಣರು. ಅನುಭವ ಮಂಟಪದಲ್ಲಿ ಎಲ್ಲರಿಗೂ ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ಬಸವಣ್ಣ ನೀಡಿದ್ದರು. ಆದರೆ, ಪ್ರಸ್ತುತ ಅಭಿಪ್ರಾಯಕ್ಕೂ, ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೂ ಗುಂಡೇಟು ಬೀಳುತ್ತಿರುವುದು ನಿಜಕ್ಕೂ ದುರಂತ ಎಂದರು.

12ನೇ ಶತಮಾನದಲ್ಲಿ ಬಸವಣ್ಣನವರು ಕಾಯಕ ಸಮಾಜವನ್ನು ಕಟ್ಟಿದರು. ಕಾಯಕದಿಂದಲೇ ಜೀವನದ ಪ್ರಗತಿ ಎಂಬುದನ್ನು ಸಾರಿದರು. ಕಾಯಕವನ್ನು ಮಾಡದ ಗುರು, ಲಿಂಗ, ಜಂಗಮನನ್ನು ತಿರಸ್ಕರಿಸಿದರು. ಯಾರೇ ಆಗಲಿ ಅನುಭವ ಮಂಟಪದಲ್ಲಿ ಕಡ್ಡಾಯವಾಗಿ ಕಾಯಕ ಮಾಡಬೇಕೆಂಬ ಆದರ್ಶವನ್ನು ಪ್ರತಿಪಾದಿಸಿದರು. ಅಂತಹ ಆದರ್ಶವನ್ನು ಪ್ರತಿಯೊಬ್ಬರು ತಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕಿದೆ ಎಮದು ಹೇಳಿದರು.

ಇದೇ ವೇಳೆ ದ್ವಿತೀಯ ಪಿಯುಸಿಯಲ್ಲಿ ಶೇ.91ಕ್ಕಿಂತ ಹೆಚ್ಚು ಅಂಕ ಪಡೆದ ಮೋತಿ ವೀರಪ್ಪ ಸರ್ಕಾರಿ ಪಿಯು ಕಾಲೇಜಿನ ವಿದ್ಯಾರ್ಥಿನಿ ಪೂಜಾ ಅವರನ್ನು ಸನ್ಮಾನಿಸಲಾಯಿತು.

ಚುಟುಕು ಸಾಹಿತ್ಯ ಪರಿಷತ್‌ ಜಿಲ್ಲಾಧ್ಯಕ್ಷ ರಾಜಶೇಖರ್‌ ಗುಂಡಗತ್ತಿ, ಸ್ಫೂರ್ತಿ ಪ್ರಕಾಶನದ ಎಂ. ಬಸವರಾಜು, ಸಾಹಿತಿ ಮಹಾಂತೇಶ್‌ ನಿಟ್ಟೂರು, ಸುಭಾಶಿಣಿ ಮಂಜುನಾಥ್‌ ಉಪಸ್ಥಿತರಿದ್ದರು. ತಾರೇಶ್‌ ಸ್ವಾಗತಿಸಿದರು. ಗಂಗಾಧರ್‌ ಬಿ.ಎಲ್. ನಿಟ್ಟೂರು ನಿರೂಪಿಸಿದರು. ತೆಲಿಗಿ ವೀರಭದ್ರಪ್ಪ ವಂದಿಸಿದರು.

ಕವಿಗೋಷ್ಠಿಯಲ್ಲಿ ಬಸವಣ್ಣನವರ ಕುರಿತು ಕವಿತೆಗಳು
ಬಸವಜಯಂತಿ ಅಂಗವಾಗಿ ಆಯೋಜಿಸಿದ್ದ ಕವಿಗೋಷ್ಠಿಯಲ್ಲಿ ಕೆ.ಎನ್‌ ಸ್ವಾಮಿ ಅವರ (ಕಾರುಣ್ಯ ಸಿಂಧೂ ಬಸವಣ್ಣ ), ಯೋಗೀಂದ್ರನಾಯ್ಕ (ಜಗಜ್ಯೋತಿ), ಮಲ್ಲಮ್ಮ ನಾಗರಾಜ್‌ ಅಣ್ಣ ಮತ್ತೆ ಹುಟ್ಟಿ ಬಾ ಶೀರ್ಷಿಕೆಯ ಕವನ ವಾಚನ ಮಾಡಿದರು. ನಂತರ ನೀಲಗುಂದ ಜಯಮ್ಮ, ಪ್ರೊ| ಅಂಜಿನಪ್ಪ ಸೇರಿದಂತೆ ವಿವಿಧ ಕವಿಗಳು ತಮ್ಮ ಸ್ವರಚಿತ ಕವಿತೆಗಳನ್ನು ಮಂಡಿಸಿದರು.