ಕಿಮ್ಸ್‌ ಗೆ 48 ಲಕ್ಷ ರೂ.ಮೌಲ್ಯದ ವೈದ್ಯಕೀಯ ಸಲಕರಣೆ ದೇಣಿಗೆ

Team Udayavani, Jun 10, 2021, 5:12 PM IST

ಹುಬ್ಬಳ್ಳಿ: ಕೋವಿಡ್‌ ನಿಯಂತ್ರಣ ನಿಟ್ಟಿನಲ್ಲಿ ಇಲ್ಲಿನ ಕಿಮ್ಸ್‌ ಆಸ್ಪತ್ರೆಗೆ ಅಂದಾಜು 48 ಲಕ್ಷ ರೂ. ಮೌಲ್ಯದ ವಿವಿಧ ವೈದ್ಯಕೀಯ ಸಲಕರಣೆಗಳನ್ನು ರೌಂಡ್‌ ಟೇಬಲ್‌ ಇಂಡಿಯಾ ಟ್ರಸ್ಟ್‌ ಮತ್ತು 41ಇಆರ್‌ ಎಸ್‌ ಕ್ಲಬ್‌ನಿಂದ ದೇಣಿಗೆಯಾಗಿ ನೀಡಲಾಯಿತು.

ಕಿಮ್ಸ್‌ಗೆ ಕಳೆದ ತಿಂಗಳು 108 ಬೆಡ್‌, ಹೊದಿಕೆಗಳನ್ನು ನೀಡಿದ್ದ ರೌಂಡ್‌ ಟೇಬಲ್‌ ಟ್ರಸ್ಟ್‌ ಇದೀಗ ವಿವಿಧ ವೈದ್ಯಕೀಯ ಸಲಕರಣೆ, ಪ್ಲಾಸ್ಟಿಕ್‌ ಕುರ್ಚಿಗಳನ್ನು ದೇಣಿಗೆಯಾಗಿ ನೀಡಿದೆ. ರೌಂಡ್‌ ಟೇಬಲ್‌ನ ರಾಷ್ಟ್ರೀಯ ಕಾರ್ಯದರ್ಶಿ ಸಚಿನ್‌ ಶಾಹ ಮಾತನಾಡಿ, ಕಿಮ್ಸ್‌ಗೆ ನೀಡಿದ ವಿವಿಧ ವೈದ್ಯಕೀಯ ಸಲಕರಣೆಯಿಂದ ಈ ಭಾಗದ ಜನರಿಗೆ ಇನ್ನಷ್ಟು ಉತ್ತಮ ವೈದ್ಯಕೀಯ ಸೌಲಭ್ಯ ದೊರೆಯಲಿದೆ. ಇಂತಹ ಸೌಲಭ್ಯ ಕಲ್ಪಿಸುವ ನಿಟ್ಟಿನಲ್ಲಿ ದೇಶ-ವಿದೇಶಗಳ ದಾನಿಗಳಿಗೆ ಅಭಿನಂದನೆ ಸಲ್ಲಿಸುವುದಾಗಿ ಹೇಳಿದರು.

ಡಾ| ನಾರಾಯಣ ಹೆಬಸೂರು ಮಾತನಾಡಿ, ಕೋವಿಡ್‌ ಸಂಕಷ್ಟದ ಸ್ಥಿತಿಯಲ್ಲಿ ಇಂತಹ ವೈದ್ಯಕೀಯ ಸಲಕರಣೆಗಳು ಸಾಕಷ್ಟು ರೋಗಿಗಳಿಗೆ ಹೆಚ್ಚು ಪ್ರಯೋಜನಕಾರಿ ಆಗಲಿವೆ ಎಂದು ಹೇಳಿದರು. ಡಾ| ಸಂಜಯ ಮಾಶಾಳ, ಕಿಮ್ಸ್‌ ನಿರ್ದೇಶಕ ಡಾ| ರಾಮಲಿಂಗಪ್ಪ ಅಂಟರತಾನಿ, ವಿವಿಧ ವಿಭಾಗಗಳ ಮುಖ್ಯಸ್ಥರು ಇನ್ನಿತರರು ಇದ್ದರು.