ಚೌಕಕ್ಕೆ ಉತ್ತಮ ಪ್ರತಿಕ್ರಿಯೆ

Team Udayavani, Feb 16, 2017, 2:35 PM IST

ಹುಬ್ಬಳ್ಳಿ: ಸಾಹಸಸಿಂಹ ದಿ. ಡಾ| ವಿಷ್ಣುವರ್ಧನ ಅವರ ಅಭಿನಯದ “ಆಪ್ತಮಿತ್ರ’ ಚಿತ್ರದ ನಂತರ “ಚೌಕ’ ಕನ್ನಡ ಚಲನಚಿತ್ರವು ಯಶಸ್ವಿಯಾಗಿ ಮೂಡಿ ಬಂದಿದೆ. ಚಿತ್ರದ ಬಗ್ಗೆ ರಾಜ್ಯಾದ್ಯಂತ ಪ್ರೇಕ್ಷಕರಿಂದ ನಿರೀಕ್ಷೆಗಿಂತಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ ಎಂದು ಚಿತ್ರದ ನಿರ್ದೇಶಕ ತರುಣ ಸುಧೀರ ಹಾಗೂ ನಿರ್ಮಾಪಕ ಯೋಗೀಶ ದ್ವಾರಕೀಶ ಹೇಳಿದರು. 

ನಗರದಲ್ಲಿ ಬುಧವಾರ ಜಂಟಿ ಸುದ್ದಿಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಅವರು, ಚಿತ್ರದ ಯಶಸ್ಸಿನಿಂದ ತುಂಬಾ ಸಂತಸವಾಗಿದೆ. ಅದನ್ನು ಬೆಂಗಳೂರಿನಲ್ಲೇ ಕುಳಿತು ಅನುಭವಿಸುವುದು ಬೇಡ. ಬದಲಾಗಿ ಚಿತ್ರ ತಂಡದೊಂದಿಗೆ ಚೌಕ ವಿಜಯಯಾತ್ರೆ ಆರಂಭಿಸಿ ರಾಜ್ಯಾದ್ಯಂತ ಪ್ರೇಕ್ಷಕರೊಂದಿಗೆ ಹಂಚಿಕೊಳ್ಳುತ್ತಿದ್ದೇವೆ ಎಂದರು. 

ನಿರ್ದೇಶಕ ತರುಣ ಸುಧೀರ ಮಾತನಾಡಿ, ನನ್ನ ತಂದೆ ಉತ್ತರ ಕರ್ನಾಟಕದ ರಂಗಭೂಮಿಗಳಲ್ಲಿ ಸಾಕಷ್ಟು ನಾಟಕಗಳನ್ನು ಪ್ರದರ್ಶಿಸಿದ್ದಾರೆ. ನಮ್ಮ ಕುಟುಂಬದ ಮೇಲೆ ಈ ಭಾಗದ ಅನ್ನದ ಋಣವಿದೆ. ಅದನ್ನು ಮರೆಯಲಾಗದು. ಜನರಿಂದ ಚೌಕ ಚಿತ್ರಕ್ಕೆ ನಿರೀಕ್ಷೆಗಿಂತ ಹೆಚ್ಚಿನ ಪ್ರೋತ್ಸಾಹ, ಬೆಂಬಲ ಸಿಕ್ಕಿದೆ ಎಂದರು. 

ಚಿತ್ರದ ನಾಯಕ ನಟರಾದ ಪ್ರಜ್ವಲ್‌ ದೇವರಾಜ್‌, ದಿಗಂತ್‌, ಪ್ರೇಮ್‌ ಮಾತನಾಡಿ, ರಾಜ್ಯಾದ್ಯಂತ ಚೌಕ ಚಿತ್ರ ಯಶಸ್ವಿಯಾಗಿ ಪ್ರದರ್ಶನಗೊಳ್ಳುತ್ತಿದೆ. ಪ್ರೇಕ್ಷಕರಿಂದ ಒಳ್ಳೆಯ ಪ್ರತಿಕ್ರಿಯೆ ದೊರೆಯುತ್ತಿದೆ. ಇದರಿಂದ ನಮಗೆಲ್ಲ ತುಂಬಾ ಸಂತಸವಾಗಿದೆ ಎಂದರು. ಚಿತ್ರ ತಂಡದವರು ಇದ್ದರು.