ಅಳ್ನಾವರ ಪಪಂ ಅತಂತ್ರ; ಕಾಂಗ್ರೆಸ್‌ಗೆ ಹೆಚ್ಚು ಸ್ಥಾನ

Team Udayavani, Jun 1, 2019, 11:55 AM IST

ಅಳ್ನಾವರ: ಪಪಂ ಚುನಾವಣೆಯಲ್ಲಿ ಗೆಲುವು ಸಾಧಿಸಿದವರ ಸಂಭ್ರಮ.

ಅಳ್ನಾವರ: ತಾಲೂಕು ಕೇಂದ್ರವಾಗಿ ರಚನೆಯಾದ ನಂತರ ಸ್ಥಳೀಯ ಪಪಂಗೆ ನಡೆದ ಪ್ರಥಮ ಚುನಾವಣೆ ಫಲಿತಾಂಶ ಶುಕ್ರವಾರ ಘೋಷಣೆಯಾಗಿದ್ದು, 18 ಸ್ಥಾನಗಳ ಪೈಕಿ ಕಾಂಗ್ರೆಸ್‌8, ಜೆಡಿಎಸ್‌ 6, ಬಿಜೆಪಿ 3 ಸ್ಥಾನ ಗಳಿಸಿದ್ದು, ಪಕ್ಷೇತರರು ಒಂದು ಸ್ಥಾನ ಗೆದ್ದಿದ್ದಾರೆ. ವಿಜೇತ ಅಭ್ಯರ್ಥಿಗಳು ಮತ್ತು ಆಯಾ ಪಕ್ಷದ ಕಾರ್ಯಕರ್ತರು ಪಟ್ಟಣದೆಲ್ಲೆಡೆ ಪಟಾಕ್ಷಿ ಸಿಡಿಸಿ, ಬಣ್ಣ ಎರಚಾಡುವ ಮೂಲಕ ವಿಜಯೋತ್ಸವ ಆಚರಿಸಿದರು.

ಹಿಂದಿನ ಅವಧಿಯಲ್ಲಿ 15 ವಾರ್ಡ್‌ ಹೊಂದಿದ್ದ ಪಟ್ಟಣದಲ್ಲಿ ಈ ಸಲ 18 ವಾರ್ಡ್‌ಗಳು ಅಸ್ತಿತ್ವಕ್ಕೆ ಬಂದಿದ್ದು, ಯಾವ ಪಕ್ಷವೂ ಸ್ಪಷ್ಟ ಬಹುಮತ ಪಡೆಯುವಲ್ಲಿ ವಿಫಲವಾಗಿದೆ. ಸರಳ ಬಹುಮತಕ್ಕೆ 10 ಸ್ಥಾನ ಬೇಕಿದ್ದು, ರಾಜ್ಯದಂತೆ ಇಲ್ಲಿಯೂ ಕೈ-ದಳ ಮೈತ್ರಿ ಆಡಳಿತ ರಚನೆಯಾಗಬಹುದು. ಆದರೆ ಅಧ್ಯಕ್ಷ-ಉಪಾಧ್ಯಕ್ಷ ಸ್ಥಾನ ಮೀಸಲಾತಿ ಅವಲಂಬಿಸಿದೆ.

ಹಿಂದಿನ ಆಡಳಿತದಲ್ಲಿ ಕಾಂಗ್ರೆಸ್‌ 9 ಸದಸ್ಯರನ್ನು ಹೊಂದಿತ್ತು. ಆದರೆ ಈ ಸಲ ಒಂದು ಸ್ಥಾನ ಕಳೆದುಕೊಂಡಿದೆ. 3 ಸದಸ್ಯರನ್ನು ಹೊಂದಿದ್ದ ಜೆಡಿಎಸ್‌ ಈ ಸಲ ಆರು ಸ್ಥಾನಕ್ಕೆ ಏರಿದೆ. 2 ಸ್ಥಾನ ಹೊಂದಿದ್ದ ಬಿಜೆಪಿ ಈ ಸಲ ಒಂದು ಸ್ಥಾನ ಹೆಚ್ಚಿಗೆ ಗಳಿಸಿ ಮೂರಕ್ಕೇರಿದೆ. ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಗೆ ಹೆಚ್ಚಿನ ಮತಗಳನ್ನು ನೀಡಿದ್ದ ಅಳ್ನಾವರ ಪಟ್ಟಣದ ಜನರು ಸ್ಥಳೀಯ ಚುನಾವಣೆಯಲ್ಲಿ ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಬೆಂಬಲಿಸಿರುವುದನ್ನು ಗಮನಿಸಿದರೆ ಗೆಲುವಿಗೆ ಪಕ್ಷಕ್ಕಿಂತ ವೈಯಕ್ತಿಕ ವರ್ಚಸ್ಸು ಕಾರಣ ಎನ್ನುವಂತಾಗಿದೆ.