ರಸ್ತೆ ವಿಭಜಕ ಅಳವಡಿಸಲು ಸಮ್ಮತಿ

Team Udayavani, Jun 25, 2018, 5:32 PM IST

ಬಾದಾಮಿ: ಪಟ್ಟಣದ ಮುಖ್ಯ ರಸ್ತೆಯ ಅಗಲೀಕರಣದಲ್ಲಿ ಡಿವೈಡರ್‌(ವಿಭಜಕ) ಅಳವಡಿಸಲು ಹಾಗೂ ಚರಂಡಿ ವಿಸ್ತರಣೆ ಮಾಡುವಂತೆ ರಾಜ್ಯ ನಗರಾಭಿವೃದ್ಧಿ ಇಲಾಖೆಯ ಅಧಿಕಾರಿಗಳಿಗೆ ಹೋರಾಟ ಸಮಿತಿ ವತಿಯಿಂದ ಮನವಿ ಸಲ್ಲಿಸಲಾಗಿದ್ದು, ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ ಎಂದು ಬಾದಾಮಿ ಅಭಿವೃದ್ಧಿ ಹೋರಾಟ ಸಮಿತಿ ಅಧ್ಯಕ್ಷ ಎಂ.ಎಸ್‌.ಹಿರೇಹಾಳ ತಿಳಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಪಟ್ಟಣದ ಮುಖ್ಯ ರಸ್ತೆಯಲ್ಲಿ ಕೆಶಿಪ್‌ ವತಿಯಿಂದ ಕಾಮಗಾರಿ ನಡೆದಿದ್ದು, ಈ ಕಾಮಗಾರಿಯಲ್ಲಿ ನಗರದ ಹೊರವಲಯದ ಮಿನಿ ವಿಧಾನಸೌಧದಿಂದ ಬಾದಾಮಿಯ ಎಲ್‌ಐಸಿ ಕಚೇರಿವರೆಗೆ ಡಿವೈಡರ್‌ (ವಿಭಜಕ) ಅಳವಡಿಸಬೇಕು. ರಸ್ತೆಯ ಪಕ್ಕದಲ್ಲಿ ಚರಂಡಿ ವಿಸ್ತರಿಸಬೇಕು ಎಂದು ಮನವಿ ಸಲ್ಲಿಸಲಾಗಿದೆ. ಡಿಪಿಆರ್‌ ಪ್ರಕಾರ ಡಿವೈಡರ್‌ ಮಾಡುವುದಾಗಿ ತಿಳಿಸಿದ್ದಾರೆ. ಈಗಾಗಲೇ ಕೇಂದ್ರ ಸರಕಾರದ ಹೃದಯ ಯೋಜನೆಯಡಿ ಸೈಕಲ್‌ ಪಾತ್‌ಗೆ ಮೀಸಲಿರಿಸಿದ ಜಾಗೆಯನ್ನು ಕೆಶಿಪ್‌ನವರಿಗೆ ಬಿಟ್ಟು ಕೊಟ್ಟು ಡಿವೈಡರ್‌ ನಿರ್ಮಿಸಬೇಕು. ಸೈಕಲ್‌ ಪಾತ್‌ ಬಿಟ್ಟು ಕೊಡುವುದರಿಂದ ಒಟ್ಟು 45 ಅಡಿ 6 ಇಂಚು ರಸ್ತೆಯಾಗುವುದು. ಅಂದಾಜು ಒಂದು ಅಡಿ ಡಿವೈಡರ್‌ ನಿರ್ಮಾಣ ಮಾಡಿದರೆ ಎರಡೂ ಬದಿಯಲ್ಲಿ 22 ಅಡಿ 3 ಇಂಚು ರಸ್ತೆ ಲಭ್ಯವಾಗಲಿದೆ. ಇದರಿಂದ ಐತಿಹಾಸಿಕ ನಗರ ಸುಂದರವಾಗಿ ಕಾಣುತ್ತದೆ. ಇದರಿಂದ ಬಾದಾಮಿ ಜನತೆಗೆ ಪ್ರವಾಸಿಗರಿಗೆ ಬಹಳಷ್ಟು ಅನುಕೂಲವಾಗುತ್ತದೆ ಎಂದರು. ಸಾಮಾಜಿಕ ಕಾರ್ಯಕರ್ತ ಚಂದ್ರಶೇಖರ ಸೂಡಿ ಮಾತನಾಡಿ, ಬಾದಾಮಿ ಪಟ್ಟಣದ ರಾಮದುರ್ಗ ರಸ್ತೆಯಿಂದ ಟಾಂಗಾ ನಿಲ್ದಾಣದವರೆಗೆ ಒತ್ತುವರಿ ತೆರವು ಕಾರ್ಯಾಚರಣೆಯಲ್ಲಿ ತಾರತಮ್ಯ ಮಾಡಲಾಗಿದೆ. ಪಾದಾಚಾರಿ ರಸ್ತೆ(ಫುಟ್‌ಪಾತ್‌) ನಿರ್ಮಾಣ ಕಾಮಗಾರಿ ಕಳಪೆಯಾಗಿದೆ. ಡಿಪಿಆರ್‌ ನಲ್ಲಿ ನಮೂದಿಸಿದಂತೆ ಗುಣಮಟ್ಟದ ಹಾಸಿಗೆ ಕಲ್ಲು ಹಾಕಿಲ್ಲ. ಕಳಪೆ ಕಾಮಗಾರಿ ನಡೆಯುತ್ತಿದೆ. ಇದನ್ನು ತಡೆದ ಹೋರಾಟ ಸಮಿತಿಯವರಿಗೆ ಗುತ್ತಿಗೆದಾರರು ಹೆದರಿಸುತ್ತಿದ್ದಾರೆ. ಇದರಿಂದ ಸಮಿತಿಯವರೆಗೆ ಜೀವ ಭಯವಿದೆ ಎಂದರು.

ಈ ಕುರಿತು ಬಾದಾಮಿಯಲ್ಲಿ ನಡೆಯುತ್ತಿರುವ ಎಲ್ಲ ಕಾಮಗಾರಿಗಳು ಸಮರ್ಪಕವಾಗಿ ನಡೆಯುತ್ತಿಲ್ಲ ಇದಕ್ಕೆ ಸಂಬಂಧಿಸಿದ ಪುರಸಭೆ ಮುಖ್ಯಾಧಿಕಾರಿ, ಯೋಜನಾ ನಿರ್ದೇಶಕ, ಜಿಲ್ಲಾ ಧಿಕಾರಿಗಳಿಗೆ ಮತ್ತು ಜನಪ್ರತಿನಿಧಿಗಳಿಗೆ ಮನವಿ ಸಲ್ಲಿಸಿದರೂ ಯಾರೂ ಸಹಿತ ಗಮನ ಹರಿಸುತ್ತಿಲ್ಲ ಎಂದು ದೂರಿದರು.

ನಿಸರ್ಗ ಬಳಗದ ಅಧ್ಯಕ್ಷ ಎಚ್‌.ಎಸ್‌. ವಾಸನ ಮಾತನಾಡಿ, ಚರಂಡಿ ಕಾಮಗಾರಿಗೆ ಕಳಪೆ ಸಿಮೆಂಟ್‌ ಬಳಕೆ ತಡೆದ ನಂತರವೂ ಕೆಲದಿನಗಳ ನಂತರ ಅದನ್ನೇ ಉಪಯೋಗಿಸುತ್ತಿದ್ದಾರೆ ಎಂದರು. ಪಾರ್ಕಿಂಗ್‌ ಪ್ಲಾಜಾ ಮತ್ತು 96 ಮನೆಗಳ ಸ್ಥಳಾಂತರ ಕುರಿತು ಬೇಗನೆ ಸಮಸ್ಯೆ ಬಗೆಹರಿಸಬೇಕು ಎಂದು ಆಗ್ರಹಿಸಿದರು. ಈ ಎಲ್ಲ ಸಮಸ್ಯೆಗಳಿಗೆ ಸ್ಪಂದಿಸದಿದ್ದರೆ ಸಾರ್ವಜನಿಕರು, ಹೋರಾಟ ಸಮಿತಿ ಮತ್ತು ವ್ಯಾಪಾರಸ್ಥರು ಸಹಯೋಗದಲ್ಲಿ ಬರುವ ಜುಲೈ 3 ರಂದು ಪ್ರತಿಭಟನೆ ಹಮ್ಮಿಕೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದರು. ಪತ್ರಿಕಾಗೋಷ್ಠಿಯಲ್ಲಿ ಹೋರಾಟ ಸಮಿತಿ ಸದಸ್ಯರಾದ ಇಷ್ಟಲಿಂಗ ನರೇಗಲ್‌, ಇಮ್ರಾನ್‌ ಕಲಬುರ್ಗಿ, ರಾಘು ಹರ್ತಿ, ಸಂಗಮೇಶ ಲೋಕಾಪುರ, ಮಹಾಂತೇಶ ವಡ್ಡರ ಹಾಜರಿದ್ದರು.