ಗುತ್ತಿಗೆದಾರರ ಪ್ರತಿಭಟನೆ

Team Udayavani, Jun 16, 2017, 4:23 PM IST

ಧಾರವಾಡ: ಗುತ್ತಿಗೆದಾರರ ಸಮಸ್ಯೆಗಳ ಪರಿಹಾರಕ್ಕೆ ಆಗ್ರಹಿಸಿ ಉತ್ತರ ಕರ್ನಾಟಕ ಸಿವಿಲ್‌ ಗುತ್ತಿಗೆದಾರರ ಸಂಘದಿಂದ ನಗರದಲ್ಲಿ ಪ್ರತಿಭಟನಾ ರ್ಯಾಲಿ ಕೈಗೊಂಡು, ಜಿಲ್ಲಾಧಿಕಾರಿ ಮೂಲಕ ರಾಜ್ಯ ಸರಕಾರಕ್ಕೆ ಮನವಿ ಸಲ್ಲಿಸಲಾಯಿತು. 

ಲೋಕೋಪಯೋಗಿ ಇಲಾಖೆಯ ಮುಖ್ಯ ಅಭಿಯಂತರರ ಕಚೇರಿ (ಉತ್ತರ ವಲಯ) ಎದುರು ಧರಣಿ ಕೈಗೊಂಡು ಮನವಿ ಸಲ್ಲಿಸಿದ ಬಳಿಕ ಅಲ್ಲಿಂದ ಡಿಸಿ ಕಚೇರಿವರೆಗೆ ಪ್ರತಿಭಟನಾ ರ್ಯಾಲಿ ಕೈಗೊಂಡು, ಡಿಸಿ ಮೂಲಕ ಸಿಎಂಗೆ ಮನವಿ ಸಲ್ಲಿಸಲಾಯಿತು.

ಕೆಲ ಇಲಾಖೆಗಳಲ್ಲಿ ಕೆಲ ಕಾಮಗಾರಿಗಳನ್ನು ಒಟ್ಟುಗೂಡಿಸಿ ಪ್ಯಾಕೇಜ್‌ ಟೆಂಡರ್‌ಗಳನ್ನು ಕರೆಯುತ್ತಿದ್ದು, ಇದರಿಂದ ಸ್ಥಳೀಯ ಗುತ್ತಿಗೆದಾರರು ಕೆಲಸಗಳಿಂದ ವಂಚಿತರಾಗುವಂತಾಗಿದೆ. ಹೀಗಾಗಿ ಪ್ಯಾಕೇಜ್‌ ಟೆಂಡರ್‌ ಮಾಡದೇ ಒಂದು ಕಾಮಗಾರಿಗೆ ಒಂದು ಟೆಂಡರ್‌ ಕರೆಯಬೇಕು.

ಈಗ ಸರಕಾರಿ ಕಾಮಗಾರಿ ನಿರ್ವಹಿಸುವ ಗುತ್ತಿಗೆದಾರರಿಗೆ ಶೇ.18ರಷ್ಟು  ಜಿಎಸ್‌ಟಿ ವಿಧಿಸುತ್ತಿರುವ ಕುರಿತು ಮಾಹಿತಿ ಬಂದಿದ್ದು, ಗುತ್ತಿಗೆದಾರರ ದರ ಪಟ್ಟಿಯಲ್ಲಿ ಇದನ್ನು ಸೇರಿಸಿದ ನಂತರವೇ ಗುತ್ತಿಗೆದಾರರ ಬಿಲ್‌ ನಲ್ಲಿ ಕಟಾಯಿಸಬೇಕು.

ಇದೇ ರೀತಿ ಗುತ್ತಿಗೆದಾರರಿಗೆ ಸರ್ವಿಸ್‌ ತೆರಿಗೆ ವಿಧಿಸುವುದಾದಲ್ಲಿ ಅದನ್ನು ಸಹ ದರಪಟ್ಟಿಯಲ್ಲಿ ಸೇರಿಸಿದ ನಂತರವೇ ಗುತ್ತಿಗೆದಾರರ ಬಿಲ್‌ನಲ್ಲಿ ಕಟಾಯಿಸಬೇಕು ಎಂದು ಆಗ್ರಹಿಸಲಾಗಿದೆ. ಗುತ್ತಿಗೆದಾರರ ಲೈಸನ್ಸ್‌ ಸತತವಾಗಿ ಚಾಲ್ತಿ ಇದ್ದಲ್ಲಿ ಗುತ್ತಿಗೆದಾರರು, 

-ಕಾಮಗಾರಿ ನಿರ್ವಹಿಸಿದ ಪ್ರಮಾಣ ಪತ್ರವನ್ನು ಅವರ ಜೀವಿತ ಅವಧಿಯ ಯಾವುದೇ ಟೆಂಡರಿಗೆ ಅಂದರೆ 5 ವರ್ಷಗಳ ನಂತರವೂ ಸಹ  ಪರಿಗಣಿಸುವುದು ಸೇರಿದಂತೆ ವಿವಿಧ ಬೇಡಿಕೆಗಳುಳ್ಳ ಪಟ್ಟಿ ಮನವಿಯಲ್ಲಿತ್ತು. ಸಂಘದ ಅಧ್ಯಕ್ಷ ಸುಭಾಷ ಪಾಟೀಲ, ಪ್ರಧಾನ ಕಾರ್ಯದರ್ಶಿ ರವೀಂದ್ರ ಮಾನೆ ಸೇರಿದಂತೆ ಹಲವರು ಇದ್ದರು.