ಕೊಲೆ ಮಾಡಿ ಅಪಘಾತದ ಕಥೆ; ಮೂವರ ಸೆರೆ

ಪ್ರಿಯತಮನ ಜತೆ ಸೇರಿ ಗಂಡನಿಗೇ ಸಂಚಕಾರ; ರಸ್ತೆ ಬದಿ ಶವ ಬಿಸಾಡಿ ಆ್ಯಕ್ಸಿಡೆಂಟ್‌ ಸನ್ನಿವೇಶ

Team Udayavani, Oct 23, 2022, 3:27 PM IST

ಧಾರವಾಡ: ಗಂಡನನ್ನೇ ಕೊಲೆ ಮಾಡಿದ ಪತ್ನಿ, ಆಕೆಯ ಪ್ರಿಯತಮ ಸೇರಿದಂತೆ ಮೂವರನ್ನು ಕುಂದಗೋಳ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಕುಂದಗೋಳದ ಕಮಡೊಳ್ಳಿ-ಹಿರೇಹರಕುಣಿ ರಸ್ತೆಯ ಮಾರ್ಗ ಮಧ್ಯೆ ಅ.4ರಂದು ಶಿವಪ್ಪ ಉರ್ಫ್‌ ಸಿದ್ದು ಕಲ್ಲಪ್ಪ ಈಟಿ(38) ಬೈಕ್‌ ಮೇಲೆ ಹೋಗುವಾಗ ಬಿದ್ದು ಮೃತಪಟ್ಟಿರುವುದಾಗಿ ಪತ್ನಿ ಲಲಿತಾ ಈಟಿ ಹೇಳಿಕೆ ಅನ್ವಯ ಕುಂದಗೋಳ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ಆದರೆ ಈ ಸಾವಿನ ಬಗ್ಗೆ ಕುಟುಂಬಸ್ಥರು ಸಂಶಯ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆ ಕೈಗೊಂಡಿದ್ದರು. ಲಲತಾಳೇ ಪತಿ ಶಿವಪ್ಪನನ್ನು ತನ್ನ ಪ್ರಿಯತಮ ಹಾಗೂ ಇನ್ನೊಬ್ಬನನ್ನು ಸೇರಿಸಿಕೊಂಡು ಆಯುಧದಿಂದ ತಲೆಗೆ ಬಲವಾಗಿ ಹೊಡೆದು ಕೊಲೆ ಮಾಡಿ ಶವವನ್ನು ರಸ್ತೆ ಬದಿಯ ತೆಗ್ಗಿನಲ್ಲಿ ಬಿಸಾಡಿದ್ದರು. ಬಳಿಕ ಬೈಕ್‌ ಅನ್ನು ಕಲ್ಲಿನಿಂದ ಜಖಂಗೊಳಿಸಿ, ಶಿವಪ್ಪನ ದೇಹದ ಪಕ್ಕಕ್ಕೆ ತಳ್ಳುವ ಮೂಲಕ ಮೇಲ್ನೋಟಕ್ಕೆ ರಸ್ತೆ ಅಪಘಾತ ಎನ್ನುವ ರೀತಿಯಲ್ಲಿ ಮಾಡಲಾಗಿತ್ತು ಎಂಬುದು ಪೊಲೀಸರ ತನಿಖೆಯಲ್ಲಿ ಪತ್ತೆಯಾಗಿತ್ತು.

ಮೂವರು ಆರೋಪಿತರನ್ನು ಪೊಲೀಸರು ವಶಕ್ಕೆ ಪಡೆದು, ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ. ಎಸ್ಪಿ ಲೋಕೇಶ ಜಗಲಾಸರ, ಡಿವೈಎಸ್‌ಪಿ ಎಂ.ಬಿ. ಸಂಕದ ಮಾರ್ಗದರ್ಶನದಲ್ಲಿ ಕುಂದಗೋಳ ಠಾಣೆ ಇನ್ಸ್‌ಪೆಕ್ಟರ್‌ ಮಾರುತಿ ಗುಳ್ಳಾರಿ ನೇತೃತ್ವದ ತಂಡವು ಪ್ರಕರಣ ಬೇಧಿಸಿದ್ದು, ತಂಡದಲ್ಲಿ ಪಿಎಸ್‌ಐ ನರಸಿಂಹರಾಜು ಜೆ.ಡಿ., ಸಿಬ್ಬಂದಿ ಮಡಿವಾಳ ಜೋಡಗೇರಿ, ಬಸವರಾಜ ಶಿರಕೋಳ, ನಾಗರಾಜ ಹೊಸಕೇರಿ, ಪರಮೇಶ ಗೊಂದಿ, ಅಮರೇಶ ಬಳಗಾರ, ಚಂದ್ರು ಬಡಿಗೇರ ಇದ್ದರು.