ಪಾಲಿಕೆಯಿಂದಲೇ ಫಾಗಿಂಗ್‌!

Team Udayavani, Jun 28, 2018, 4:16 PM IST

ಹುಬ್ಬಳ್ಳಿ: ಮಳೆಗಾಲದಲ್ಲಿ ಕಾಣಿಸಿಕೊಳ್ಳುವ ಸಾಂಕ್ರಾಮಿಕ ರೋಗಗಳ ತಡೆ ಹಾಗೂ ನಿಯಂತ್ರಿಸುವ ನಿಟ್ಟಿನಲ್ಲಿ ಫಾಗಿಂಗ್‌ ಕಾರ್ಯವನ್ನು ಗುತ್ತಿಗೆ ನೀಡುವ ಬದಲು ಫಾಗಿಂಗ್‌ ಯಂತ್ರಗಳನ್ನೇ ಖರೀದಿಸಲು ಪಾಲಿಕೆ ಮುಂದಾಗಿದೆ. ಪಾಲಿಕೆ ಇಲ್ಲಿಯವರೆಗೆ ಟೆಂಡರ್‌ ಕರೆದು ಗುತ್ತಿಗೆ ನೀಡುತ್ತಿತ್ತು. ಇದರಿಂದ ಸಕಾಲದಲ್ಲಿ ತ್ವರಿತಗತಿಯಲ್ಲಿ ಕಾರ್ಯ ನಿರ್ವಹಿಸಲು ಸಾಧ್ಯವಾಗುತ್ತಿರಲಿಲ್ಲ. ಈ ಎಲ್ಲ ತಾಂತ್ರಿಕ ಕಾರಣಗಳನ್ನು ಮನಗಂಡ ಪಾಲಿಕೆ ಫಾಗಿಂಗ್‌ ಯಂತ್ರಗಳನ್ನು ಖರೀದಿಸಲು ಮುಂದಾಗಿದೆ. 

ಕಳೆದ ಮೂರ್‍ನಾಲ್ಕು ವರ್ಷಗಳಿಂದ ಗುತ್ತಿಗೆ ನೀಡಲಾಗುತ್ತಿತ್ತು. ಪ್ರತಿ ಮಳೆಗಾಲ ಸಂದರ್ಭದಲ್ಲಿ ಸಾಂಕ್ರಾಮಿಕ ರೋಗಗಳ ನಿಯಂತ್ರಣ ಸಾಮಾನ್ಯ ಸಭೆಯ ಚರ್ಚಾ ವಿಷಯ. ಫಾಗಿಂಗ್‌ ಯಂತ್ರಗಳು ತಮ್ಮ ವಾರ್ಡ್‌ಗೆ ಬರುವುದಿಲ್ಲ, ಸಾಮಾನ್ಯ ಕಾರ್ಯಕ್ರಮ ಮಾಡುವುದರಿಂದ ಸದುದ್ದೇಶ ಈಡೇರುವುದಿಲ್ಲ, ಪಾಲಿಕೆ ಸದಸ್ಯರು ಸೂಚಿಸಿದ ಪ್ರದೇಶದಲ್ಲಿ ಫಾಗಿಂಗ್‌ ಮಾಡುವುದಿಲ್ಲ ಎಂಬಿತ್ಯಾದಿ ಆರೋಪಗಳು ಪಾಲಿಕೆ ಸದಸ್ಯರಿಂದ ಕೇಳಿ ಬರುತ್ತಿದ್ದವು. ಅದೂ ಅಲ್ಲದೇ ಪಾಲಿಕೆ ಒಡೆತನದ ಎರಡು ವಾಹನ ಆಧಾರಿತ ಹಾಗೂ ಫಾಗಿಂಗ್‌ ಯಂತ್ರಗಳು ದುರಸ್ತಿಯಾಗದಂತಹ ಸ್ಥಿತಿಗೆ ತಲುಪಿವೆ. ಸುಸ್ಥಿಯಲ್ಲಿರುವ ಒಂದೆರೆಡು ಯಂತ್ರಗಳಿಂದ ಮಹಾನಗರದಲ್ಲಿ ಫಾಗಿಂಗ್‌ ಮಾಡುವುದು ಕಷ್ಟ ಸಾಧ್ಯವಾಗಿತ್ತು. ಈ ಎಲ್ಲ ಸಮಸ್ಯೆಗಳನ್ನು ಅರಿತ ಪಾಲಿಕೆ ಆಯುಕ್ತ ಶಕೀಲ್‌ ಅಹ್ಮದ್‌ ಈ ಬಾರಿ ಪಾಲಿಕೆಯಿಂದಲೇ ಫಾಗಿಂಗ್‌ ಯಂತ್ರಗಳ ಖರೀದಿಗೆ ಮುಂದಾಗಿದ್ದಾರೆ.

ಅಲ್ಲದೇ ಈ ಬಾರಿ ಅವಳಿ ನಗರದಲ್ಲಿ ಸಾಕಷ್ಟು ಸಾಂಕ್ರಾಮಿಕ ರೋಗಗಳು ಪತ್ತೆಯಾಗಿರುವುದು ಕೂಡ ಈ ನಿರ್ಧಾರಕ್ಕೆ ಪ್ರಮುಖ ಕಾರಣವಾಗಿದೆ. ಸಾಂಕ್ರಾಮಿಕ ಪ್ರಕರಣಗಳು ಹೆಚ್ಚಾಗಿ ಕಂಡು ಬರುವ ಭಾಗದಲ್ಲಿ ಈ ಫಾಗಿಂಗ್‌ ಯಂತ್ರಗಳು ಬಳಕೆಯಾಗಲಿವೆ. ಫಾಗಿಂಗ್‌ ಯಂತ್ರಗಳ ದರ ಸುಮಾರು 15 ಸಾವಿರ ರೂಪಾಯಿಯಿಂದ 60 ಸಾವಿರ ರೂಪಾಯಿವರೆಗೆ ಇದ್ದು, ಕೊಟೇಶನ್‌ ಪಡೆದು 12 ವಲಯಗಳಿಗೆ ತಲಾ ಒಂದರಂತೆ ಉತ್ತಮ ಗುಣಮಟ್ಟದ ಯಂತ್ರ ಖರೀದಿಸಲು ವಲಯ ಆಯುಕ್ತರಿಗೆ ಸೂಚನೆ ನೀಡಿದೆ. ಅವಶ್ಯ ಬಿದ್ದಲ್ಲಿ ಹೆಚ್ಚಿನ ಯಂತ್ರಗಳನ್ನು ಖರೀದಿಸುವ ಚಿಂತನೆ ಪಾಲಿಕೆಗಿದೆ.

ಗುತ್ತಿಗೆ ದುಬಾರಿ:
 ಫಾಗಿಂಗ್‌ ಮಾಡುವ ಕಾರ್ಯಕ್ಕೆ ಗುತ್ತಿಗೆ ಕರೆದು ಗುತ್ತಿಗೆದಾರರನ್ನು ಅಂತಿಮಗೊಳಿಸಿ ಕಡಿಮೆ ದರ ನಿಗದಿ ಮಾಡಿದ ಗುತ್ತಿಗೆದಾರರಿಗೆ ಕಾರ್ಯಾದೇಶ ನೀಡಲು ಒಂದಿಷ್ಟು ದಿನಗಳು ಹಿಡಿಯುವುದು ಸಾಮಾನ್ಯ. ಇದರಿಂದ ಸಕಾಲಕ್ಕೆ ಕಾರ್ಯಾರಂಭ ಮಾಡಲು ಸಾಧ್ಯವಾಗುತ್ತಿರಲಿಲ್ಲ. ತುರ್ತು ಸಂದರ್ಭದಲ್ಲಿ ಇದು ಕಷ್ಟ ಸಾಧ್ಯ. ಹೀಗಾಗಿ ತ್ವರಿತಗತಿಯಲ್ಲಿ ಕೆಲಸ ನಿರ್ವಹಣೆ ಸಾಧ್ಯವಿರಲಿಲ್ಲ. ವಿಳಂಬ ಒಂದು ಕಾರಣವಾದರೆ ಪ್ರತಿ ದಿನಕ್ಕೆ ಒಂದು ಯಂತ್ರಕ್ಕೆ ಸುಮಾರು 2500 ರೂ. ಪಾಲಿಕೆಯಿಂದ ಪಾವತಿ ಮಾಡಬೇಕಿತ್ತು. ಇದರಿಂದ ಪಾಲಿಕೆಗೆ ಸಾಕಷ್ಟು ಹೊರೆಯಾಗುತ್ತಿದೆ.

ಅನುಕೂಲವೇನು?
ಫಾಗಿಂಗ್‌ ಸಾಕಷ್ಟು ವೆಚ್ಚದಾಯಕವಾಗಿದ್ದು, ಪ್ರತಿದಿನ ಒಂದು ಯಂತ್ರದ ಬಳಕೆಗೆ ಸುಮಾರು 2500ರೂ. ಗುತ್ತಿಗೆದಾರರಿಗೆ ಪಾವತಿಸಬೇಕಾಗುತ್ತದೆ. ಇದೀಗ ಪಾಲಿಕೆಯಿಂದಲೇ ಫಾಗಿಂಗ್‌ ಕಾರ್ಯ ನಿರ್ವಹಿಸುವುದರಿಂದ ಪಾಲಿಕೆಗೆ ಒಂದಿಷ್ಟು ಹಣ ಉಳಿತಾಯವಾಗುತ್ತದೆ. ಪ್ರತಿ ವರ್ಷ ಈ ಕಾರ್ಯಕ್ಕೆ ಸುಮಾರು 6-7 ಲಕ್ಷ ರೂ.ಗಳನ್ನು ಗುತ್ತಿಗೆದಾರರಿಗೆ ಪಾವತಿಸುತ್ತಿದ್ದರು. ಇದೀಗ ಖರೀದಿ ಮಾಡಿ ಪಾಲಿಕೆಯಿಂದಲೇ ನಿರ್ವಹಿಸುತ್ತಿರುವುದರಿಂದ ಒಂದು ಯಂತ್ರದಿಂದ ಕನಿಷ್ಠ 1000 ರೂ. ಉಳಿತಾಯವಾಗಲಿದೆ. ಸಾಂಕ್ರಾಮಿಕ ರೋಗದ ಲಕ್ಷಣಗಳು ಕಂಡು ಬರುವ ಪ್ರದೇಶಕ್ಕೆ ಹೆಚ್ಚು ಒತ್ತು ನೀಡಬಹುದಾಗಿದೆ. ಸಕಾಲಕ್ಕೆ ಸಮರ್ಪಕವಾಗಿ ಯಂತ್ರಗಳ ಬಳಕೆ ಸಾಧ್ಯವಾಗಲಿದೆ ಎನ್ನುವುದು ಪಾಲಿಕೆ ಅಧಿಕಾರಿಗಳ ಅಭಿಪ್ರಾಯ.

ತ್ವರಿತಗತಿಯಲ್ಲಿ ಕಾರ್ಯ ನಿರ್ವಹಿಸುವ ನಿಟ್ಟಿನಲ್ಲಿ ವಲಯವಾರು ಫಾಗಿಂಗ್‌ ಯಂತ್ರಗಳನ್ನು ಖರೀದಿಸುವಂತೆ ಸೂಚಿಸಿದ್ದೇನೆ. ಸಂಬಂಧಿಸಿದ ಕಂಪನಿಗಳಿಂದ ಕೊಟೇಶನ್‌ ಪಡೆದು ಉತ್ತಮ ಗುಣಮಟ್ಟದ ಯಂತ್ರ ಖರೀದಿಸಿ ವಲಯ ಕಚೇರಿಗಳಿಂದಲೇ ನಿರ್ವಹಿಸಬೇಕು. ಗುತ್ತಿಗೆ ನೀಡುವುದರಿಂದ ಒಂದಿಷ್ಟು ದುಬಾರಿ ಆಗುತ್ತಿತ್ತು. ತುರ್ತು ಸಂದರ್ಭದಲ್ಲಿ ಇದು ಕಷ್ಟ ಸಾಧ್ಯವಾದ ಹಿನ್ನೆಲೆಯಲ್ಲಿ ಫಾಗಿಂಗ್‌ ಯಂತ್ರ ಖರೀದಿಸಲು ಮುಂದಾಗಿದ್ದೇವೆ.
 ಶಕೀಲ್‌ ಅಹ್ಮದ್‌, ಪಾಲಿಕೆ ಆಯುಕ್ತ 

ಹೇಮರಡ್ಡಿ ಸೈದಾಪುರ