ಪಿಎಫ್ಐ-ಕೆಎಫ್ಡಿ ನಿಷೇಧಕ್ಕೆ ಆಗ್ರಹಿಸಿ ಮಂಗ್ಳೂರಲ್ಲಿ ನಿರಶನ

Team Udayavani, Sep 1, 2017, 12:35 PM IST

ಹುಬ್ಬಳ್ಳಿ: ಹಿಂದೂ ಕಾರ್ಯಕರ್ತರ ಹತ್ಯೆ ಖಂಡಿಸಿ ಹಾಗೂ ಪಿಎಫ್ಐ, ಕೆಎಫ್ಡಿ ಹಾಗೂ ಎಸ್‌ಡಿಪಿಐ ಸಂಘಟನೆಗಳ ನಿಷೇಧಕ್ಕೆ ಒತ್ತಾಯಿಸಿ ಸೆಪ್ಟಂಬರ್‌ 7ರಂದು ಮಂಗಳೂರಿನಲ್ಲಿ ಬಹೃತ್‌ ಬೈಕ್‌ ರ್ಯಾಲಿ ಮತ್ತು ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ ಎಂದು ಬಿಜೆಪಿ ಯುವ ಮೋರ್ಚಾ ರಾಜ್ಯಾಧ್ಯಕ್ಷ ಹಾಗೂ ಸಂಸದ ಪ್ರತಾಪ ಸಿಂಹ ತಿಳಿಸಿದರು. 

ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕಳೆದ ನಾಲ್ಕು ವರ್ಷಗಳಲ್ಲಿ ರಾಜ್ಯದಲ್ಲಿ ಹಿಂದೂಪರ ಹಾಗೂ ಬಿಜೆಪಿಯ ಒಟ್ಟು 12 ಕಾರ್ಯಕರ್ತರನ್ನು ಹತ್ಯೆಗೈಯಲಾಗಿದೆ. ಇದರಲ್ಲಿ ಎಂಟು ಹತ್ಯೆಗಳಲ್ಲಿ ಪಿಎಫ್ಐ, ಕೆಎಫ್ಡಿ ಪ್ರೇರಿತ ಹತ್ಯೆಗಳಾಗಿದ್ದು, ಉಳಿದವು ರಾಜಕೀಯ ಕೊಲೆಯಾಗಿವೆ ಎಂದು ಆರೋಪಿಸಿದರು. 

ಇಂತಹ ಹೀನ ಕೃತ್ಯಗಳಲ್ಲಿ ಭಾಗಿಯಾಗಿರುವ ಪಿಎಫ್ಐ ಹಾಗೂ ಕೆಎಫ್ಡಿ ಸಂಘಟನೆಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕಿದ್ದ ಕಾಂಗ್ರೆಸ್‌ ಸರಕಾರ, ಈ ಸಂಘಟನೆಗಳ ಮೇಲಿನ ಸುಮಾರು 175 ಕೇಸ್‌ ಗಳನ್ನು ಹಿಂಪಡೆದಿದೆ. ರಾಜ್ಯದಲ್ಲಿ ಕಾನೂನು ಸುವ್ಯವಸ್ಥೆ ಹಿಂದಿನ ಉತ್ತರ ಪ್ರದೇಶ ಹಾಗೂ ಬಿಹಾರ ಮೀರಿಸುವ ಸ್ಥಿತಿ ಇದೆ ಎಂದರು. 

ಐದು ಕಡೆಯಿಂದ ರ್ಯಾಲಿ: ಹಿಂದೂ ಕಾರ್ಯಕರ್ತರ ಹತ್ಯೆ ಖಂಡಿಸಿ ಮಂಗಳೂರು ಚಲೋ ಹಮ್ಮಿಕೊಳ್ಳಲಾಗಿದ್ದು, ರಾಜ್ಯದ ಐದು ಕಡೆಯಿಂದ ಬೈಕ್‌ ರ್ಯಾಲಿ ಆರಂಭಗೊಂಡು ಸೆ.7ರಂದು ಮಂಗಳೂರಿಗೆ ಸೇರಲಿದ್ದು, ಅಂದು 11:00ಗಂಟೆಗೆ ಪ್ರತಿಭಟನೆ ನಡೆಸಲಾಗುವುದು ಎಂದರು. 

ಬೈಕ್‌ ರ್ಯಾಲಿ ಹುಬ್ಬಳ್ಳಿ, ಬೆಂಗಳೂರು, ಶಿವಮೊಗ್ಗ, ಚಿಕ್ಕಮಗಳೂರು ಹಾಗೂ ಮೈಸೂರಿನಿಂದ  ಆರಂಭವಾಗಲಿದೆ. ಸೆ.5ರಂದು ಹುಬ್ಬಳ್ಳಿಯಲ್ಲಿ ವಿಧಾನಸಭೆ ಪ್ರತಿಪಕ್ಷ ನಾಯಕ ಜಗದೀಶ ಶೆಟ್ಟರ, ಸಂಸದ ಪ್ರಹ್ಲಾದ ಜೋಶಿ ರ್ಯಾಲಿಗೆ ಚಾಲನೆ ನೀಡಲಿದ್ದಾರೆ. ಅದೇ ರೀತಿ ಉಳಿದ ನಾಲ್ಕು ಕಡೆಗಳಲ್ಲಿಯೂ ಪಕ್ಷದ ನಾಯಕರು, ಹತ್ಯೆಗೀಡಾದ ಕುಟುಂಬದವರು ಚಾಲನೆ ನೀಡಲಿದ್ದಾರೆ. ಸೆ.7ರಂದು ಸುಮಾರು 10 ಸಾವಿರ ಬೈಕ್‌ಗಳು ಮಂಗಳೂರು ಸೇರಲಿವೆ.

ಸಂಘಟನೆಗಳ ನಿಷೇಧ ಹಾಗೂ ಸಚಿವ ರಮಾನಾಥ ರೈ ಅವರ ರಾಜೀನಾಮೆಗೆ ಒತ್ತಾಯಿಸಿ ಪ್ರತಿಭಟನೆ ನಡೆಯಲಿದೆ ಎಂದರು. ಸಚಿವ ರಮಾನಾಥ ರೈ ಅವರಿಗೆ ಗೃಹ ಖಾತೆ ನೀಡುವುದು ಕಳ್ಳನ ಕೈಗೆ ಕೀಲಿ ಕೊಟ್ಟಂತಾಗಲಿದೆ ಎಂದು ಅವರು ಲೇವಡಿ ಮಾಡಿದರು. ಬಿಜೆಪಿ ಆಡಳಿತಾವಧಿಯಲ್ಲಿ ಬಳ್ಳಾರಿಯಲ್ಲಿನ ಕಾನೂನು ಸುವ್ಯವಸ್ಥೆ ಹಾಗೂ ಹಲವು ಹತ್ಯೆಗಳ ಕುರಿತಾಗಿ ಕೇಳಲಾದ ಪ್ರಶ್ನೆಗೆ ಸಮರ್ಪಕ ಉತ್ತರ ನೀಡಲಿಲ್ಲ. 

ಸ್ಪಷ್ಟನೆ ನೀಡಲಿ: ಕೆಪಿಸಿಸಿ ಮಹಿಳಾ ಘಟಕದ ಅಧ್ಯಕ್ಷೆ ಲಕ್ಷ್ಮೀ ಹೆಬ್ಟಾಳಕರ ಅವರು, ಬೆಳಗಾವಿ ಮಹಾರಾಷ್ಟ್ರಕ್ಕೆ ಸೇರುವುದಾದರೆ ಮೊದಲು ಜೈ ಎನ್ನುವೆ ಎಂಬ ಹೇಳಿಕೆ ಬಗ್ಗೆ ಕಾಂಗ್ರೆಸ್‌ ನಾಯಕರು ಸ್ಪಷ್ಟನೆ ನೀಡಲಿ ಎಂದು ಪ್ರತಾಪ ಸಿಂಹ ಒತ್ತಾಯಿಸಿದರು. ಮೆಟ್ರೋದಲ್ಲಿ ಹಿಂದಿಬಳಕೆ ಕುರಿತಾಗಿ ದೊಡ್ಡ ಆರೋಪ ಮಾಡಿದ್ದ ಕನ್ನಡ  ನಾಯಕರು ಇದೀಗ ತಮ್ಮದೇ ಪಕ್ಷದ ನಾಯಕಿಯ ಮನದಲ್ಲಿನ ಕನ್ನಡ ವಿರೋಧಿ ಭಾವನೆ ಬಗ್ಗೆ ಏನೆಂದು ಉತ್ತರಿಸಬೇಕಿದೆ ಎಂದರು.