ಭಿನ್ನಾಭಿಪ್ರಾಯ ಮರೆತು ಹೋರಾಡಿ

Team Udayavani, Jul 30, 2017, 12:01 PM IST

ಹುಬ್ಬಳ್ಳಿ: ಲಿಂಗಾಯತ ಸ್ವತಂತ್ರ ಧರ್ಮ ಮಾನ್ಯತೆಗಾಗಿ ವೇದಿಕೆಯ ಮುಖಾಂತರ ಪಕ್ಷಾತೀತವಾಗಿ ಹೋರಾಟ ಮಾಡಲಾಗುವುದು ಎಂದು ವಿಧಾನ ಪರಿಷತ್‌ ಸದಸ್ಯ ಬಸವರಾಜ ಹೊರಟ್ಟಿ, ಹೇಳಿದರು. ನಗರದ ಖಾಸಗಿ ಹೊಟೇಲ್‌ನಲ್ಲಿ ಲಿಂಗಾಯತ ಸ್ವತಂತ್ರ ಧರ್ಮ ಹೋರಾಟ ವೇದಿಕೆ ಆಯೋಜಿಸಿದ್ದ ಸಭೆಯಲ್ಲಿ ಮಾತನಾಡಿದರು. 

ಇಲ್ಲಿಯವರೆಗೆ ವೀರಶೈವ ಪದವನ್ನಿಟ್ಟುಕೊಂಡು ಸ್ವತಂತ್ರ ಧರ್ಮಕ್ಕಾಗಿ ಕೇಂದ್ರ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿ ವಿಫಲರಾಗಿದ್ದೇವೆ. ಈಗ ನಾವು ಇನ್ನೊಂದು ಪ್ರಯತ್ನ ಮಾಡಲೇಬೇಕಿದೆ. ಮಠಾಧೀಶರೆಲ್ಲ ತಮ್ಮ ಪ್ರತಿಷ್ಠೆ ಬಿಟ್ಟು ಲಿಂಗಾಯತ ಎಂಬ ಹೆಸರಿನ ಮೇಲೆ ಸ್ವತಂತ್ರ ಧರ್ಮದ ಮಾನ್ಯತೆಗಾಗಿ ಹೋರಾಟ ಮಾಡಲು ಸಿದ್ಧರಾಗಬೇಕು. 

ತಾರ್ಕಿಕ ಅಂತ್ಯ ಕಾಣುವವರೆಗೂ ಹೋರಾಟ ಮಾಡಲು ಎಲ್ಲರೂ ಬದ್ಧರಾಗಬೇಕೆಂದರು. ತತ್ವಶಾಸ್ತ್ರ ಪ್ರಾಧ್ಯಾಪಕ ಡಾ|ಎನ್‌.ಜಿ. ಮಹಾದೇವಪ್ಪ ಮಾತನಾಡಿ, ವೀರಶೈವರು ವೈದಿಕ ಸಂಪ್ರದಾಯದ  ಹೋಮ, ಹವನ, ಯಜ್ಞ, ಪಂಚಾಂಗಗಳನ್ನು ನಂಬಿ ಆಚರಿಸುವರು. ಕೇವಲ ಇಷ್ಟಲಿಂಗ ಉಪಾಸನೆ ಅವರ ಪೂಜ್ಯ ವಸ್ತುವಾಗಿದೆ.

ಯಾವುದೇ ಯಜ್ಞ-ಯಾಗಾದಿಗಳನ್ನು ಆಚರಣೆಗೆ ವೀರಶೈವರು ತರುವವರಲ್ಲ. ವೀರಶೈವ ಮತ್ತು ಲಿಂಗಾಯತರಲ್ಲಿ ಅನೇಕ ವ್ಯತ್ಯಾಸಗಳಿವೆ. ಆದ್ದರಿಂದ ಸ್ವತಂತ್ರ ಧರ್ಮಕ್ಕೆ ಲಿಂಗಾಯತ ಧರ್ಮ ಎಂಬ ಹೆಸರಿನಲ್ಲಿ ಪ್ರಸ್ತಾವನೆ ಸಲ್ಲಿಸುವುದು ಅನಿವಾರ್ಯ ಎಂದರು. ವಚನ ಸಾಹಿತಿ ರಂಜಾನ ದರ್ಗಾ ಮಾತನಾಡಿ, ಲಿಂಗಾಯತ ಧರ್ಮ ಸ್ವತಂತ್ರ ಧರ್ಮವಾಗಿದೆ.

ಇದಕ್ಕೆ ಬಸವಣ್ಣನವರೇ ಧರ್ಮಗುರು. ಇದು ವಚನ ಸಾಹಿತ್ಯ ಇತಿಹಾಸದಿಂದ ತಿಳಿದು ಬರುವ ಸಂಗತಿ. ಇದರಲ್ಲಿ ಯಾವುದೇ ಬಗೆಯ ಗೊಂದಲವಿಲ್ಲ. 12ನೇ ಶತಮಾನದಿಂದ ಇಲ್ಲಿಯವರೆಗೂ ಲಿಂಗಾಯತ ಧರ್ಮ ತೀವ್ರ ಅನ್ಯಾಯಕ್ಕೊಳಗಾಗಿದ್ದು, ಈಗ ಕಾಲ ಪಕ್ವವಾಗಿದೆ. ಇಂದಿನ ಸಭೆಯು ಐತಿಹಾಸಿಕವೆಂದು ಅಭಿಪ್ರಾಯಪಟ್ಟರು. 

ಬಸವಣ್ಣನವರು ನವ ಸಮಾಜದ ನಿರ್ಮಾಪಕರು. ಲಿಂಗಾಯತ ಧರ್ಮಕ್ಕೆ ಹೊಸ ಸಿದ್ಧಾಂತ, ಹೊಸ ದರ್ಶನಕೊಟ್ಟರು. ಒಂದು ಸ್ವತಂತ್ರ ಧರ್ಮಕ್ಕಿರಬೇಕಾದ ಎಲ್ಲ ಅಂಶಗಳು ಲಿಂಗಾಯತ ಧರ್ಮಕ್ಕಿವೆ. ಆದ್ದರಿಂದ ಸ್ವತಂತ್ರ ಧರ್ಮದ ಘೋಷಣೆಗಾಗಿ ರಾಜ್ಯ ಸರಕಾರಕ್ಕೆ ಲಿಂಗಾಯತ ಧರ್ಮ ಎಂಬ ಪ್ರಸ್ತಾವನೆ ಸಲ್ಲಿಸಬೇಕು. 

ಈಗಾಗಲೇ ವೀರಶೈವ ಎಂಬ ಪದ ಬಳಕೆ ಮಾಡಿ ಎರಡು ಬಾರಿ ಪ್ರಸ್ತಾವನೆ ಸಲ್ಲಿಸಿ ವಿಫಲವಾದ ಹಿನ್ನೆಲೆಯಲ್ಲಿ ಲಿಂಗಾಯತ ಧರ್ಮ ಎಂಬ ಹೆಸರಿನಲ್ಲಿ ಪ್ರಸ್ತಾವನೆ ಸಲ್ಲಿಸುವುದು ಸೂಕ್ತವೆಂದರು. ವಿವಿಧ ಜಿಲ್ಲೆಗಳಿಂದ ಆಗಮಿಸಿದ್ದ ಸಮಾಜದ ಮುಖಂಡರು ಅಭಿಪ್ರಾಯ ಹಂಚಿಕೊಂಡರು. 

ಮಾಜಿ ಶಾಸಕ ಎಂ.ಎಸ್‌. ಅಕ್ಕಿ, ಶಂಕರಣ್ಣ ಮುನವಳ್ಳಿ, ನೀಲಕಂಠ ಅಸೂಟಿ, ಗುರುರಾಜ ಹುಣಸಿಮರದ, ವಿ.ಎಸ್‌. ಪಾಟೀಲ, ಅಶೋಕ ಬೇವಿನಮರದ ಇತರರಿದ್ದರು. ಹೋರಾಟ ವೇದಿಕೆ ಸಂಚಾಲಕ ವಿಕಾಸ ಸೊಪ್ಪಿನ ಸ್ವಾಗತಿಸಿದರು. ಪಾಲಿಕೆ ಸದಸ್ಯ ರಾಜಣ್ಣ ಕೊರವಿ ವಂದಿಸಿದರು.