ವಂಚನೆ ಪ್ರಕರಣ ಸಿಐಡಿಗೆ: ಲಾಡ್‌

Team Udayavani, Apr 21, 2017, 3:14 PM IST

ಕಲಘಟಗಿ: ಪಟ್ಟಣದಲ್ಲಿ ಖಾಸಗಿ ವ್ಯಕ್ತಿಗಳು ನಡೆಸಿದ ಕೋಟ್ಯಂತರ ರೂ.ಗಳ ವಂಚನೆ ಪ್ರಕರಣವನ್ನು ಸಿಐಡಿಗೆ ಒಪ್ಪಿಸಲಾಗುವುದು ಎಂದು ಕಾರ್ಮಿಕ ಸಚಿವ ಸಂತೋಷ ಲಾಡ್‌ ಭರವಸೆ ನೀಡಿದರು. ಇಲ್ಲಿನ ಸಚಿವರ ನಿವಾಸದಲ್ಲಿ ಗುರುವಾರ ಚನ್ನಮ್ಮನ ಕಿತ್ತೂರಿನ ಸಾರ್ವಜನಿಕರು ತಮಗಾದ ಸುಮಾರು 21 ಕೋಟಿ ರೂ.ಗಳ ವಂಚನೆ ಕುರಿತು ಗಮನ ಸೆಳೆದಾಗ ಮಾತನಾಡಿದರು.

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಧಿಕಾರಿಗಳ ಮಾರ್ಗದರ್ಶನದಲ್ಲಿ ತನಿಖಾ ತಂಡ ರಚಿಸಲಾಗಿದೆ. ಸಿಪಿಐ ಶ್ರೀನಿವಾಸ ಹಾಂಡ್‌ ನೇತೃತ್ವದಲ್ಲಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ದಿನದಿಂದ ದಿನಕ್ಕೆ ನೂರಾರು ಜನ ಅಮಾಯಕರ ಅಳಲನ್ನು ಕೇಳಿ ಬೇಸರವಾಗಿದ್ದು, ತನಿಖೆಯನ್ನು ಚುರುಕುಗೊಳಿಸುವುದಕ್ಕಾಗಿ ಸಿಐಡಿಗೆ ವಹಿಸಲು ಮುಖ್ಯಮಂತ್ರಿಗಳೊಂದಿಗೆ ಚರ್ಚಿಸಿದ್ದೇನೆ.

2-3 ದಿನಗಳಲ್ಲಿ ಸಿಐಡಿಗೆ ಒಪ್ಪಿಸಲಾಗುವುದು ಎಂದರು. ತನಿಖಾ ತಂಡವು ನಾಲ್ವರನ್ನು ಬಂಧಿಸಿ ನ್ಯಾಯಾಂಗ ವಶಕ್ಕೆ ಒಪ್ಪಿಸಿದೆ. ಅವರಿಗೆ ಜಾಮೀನು ದೊರಕಿಲ್ಲ. ತನಿಖೆ ಇನ್ನೂ ಚುರುಕುಗೊಳಿಸಿ, ಆರೋಪಿಗಳು ಎಲ್ಲೇ ಇದ್ದರೂ ಅವರನ್ನು ಶೀಘ್ರದಲ್ಲಿ ಕರೆ ತಂದು ಸೂಕ್ತ ಕಾನೂನು ಕ್ರಮ ಜರುಗಿಸಲಾಗುವುದು.

ಆದರೆ ಹಣ ವಂಚಿತರು ಆತ್ಮಬಲ ತುಂಬಿಕೊಳ್ಳಬೇಕು ಎಂದು ಮನವಿ ಮಾಡಿದರು. ಅಖೀಲ ಕರ್ನಾಟಕ ಬ್ರಾಹ್ಮಣ ಸಮಾಜದ ಉಪಾಧ್ಯಕ್ಷ ಹನಮಂತ ಕೊಟಬಾಗಿ, ಅಂಜುಮನ್‌ ಸಂಸ್ಥೆ ಅಧ್ಯಕ್ಷ ಇಸ್ಮಾಯಿಲ್‌ ತಮಟಗಾರ ಇದ್ದರು. ಕಿತ್ತೂರಿನಿಂದ ಆಗಮಿಸಿದ್ದ 200ಕ್ಕೂ ಹೆಚ್ಚು ಜನರು ಅಂದಾಜು 21 ಕೋಟಿ ರೂ. ಗಳ ವಂಚನೆಯಾಗಿರುವುದರ ಚೆಕ್‌ಗಳನ್ನು ತೋರಿಸಿದರು.