ಜಿಮ್‌ ಆರಂಭಕ್ಕೆ ಅನುಮತಿ ನೀಡಿ

Team Udayavani, Jun 27, 2020, 10:27 AM IST

ಹುಬ್ಬಳ್ಳಿ: ಸರಕಾರ ಎಲ್ಲಾ ಚಟುವಟಿಕೆಗಳಿಗೆ ಅವಕಾಶ ನೀಡಿ ಜಿಮ್‌ಗಳ ಆರಂಭಕ್ಕೆ ನಿರ್ಲಕ್ಷ್ಯ ತೋರುತ್ತಿರುವುದರಿಂದ ಜಿಮ್‌ ಮಾಲೀಕರು, ತರಬೇತುದಾರರು ಸಂಕಷ್ಟಕ್ಕೊಳಗಾಗಿದ್ದು, ಕೂಡಲೇ ಜಿಮ್‌ ಆರಂಭಿಸಲು ಸರಕಾರ ಅನುಮತಿ ನೀಡಬೇಕು ಎಂದು ಜಿಲ್ಲಾ ಜಿಮ್‌ ಮಾಲೀಕರು, ತರಬೇತುದಾರರು ಹಾಗೂ ಸದಸ್ಯರ ಸಂಘದ ಅಧ್ಯಕ್ಷ ಅನಿಲಕುಮಾರ ಪಾಟೀಲ ಒತ್ತಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಲಾಕ್‌ಡೌನ್‌ ಹಂತ ಹಂತವಾಗಿ ಸಡಿಲಿಕೆ ಮಾಡಿದ ನಂತರ ಬಹುತೇಕ ಚಟುವಟಿಕೆಗಳಿಗೆ ಅವಕಾಶ ನೀಡಲಾಗಿದೆ. ಪ್ರಮುಖವಾಗಿ ಸಾರಿಗೆ, ಹೋಟೆಲ್‌, ರೆಸ್ಟೋರೆಂಟ್‌, ವಿವಿಧ ಕ್ರೀಡೆ ತರಬೇತಿ ಸೇರಿದಂತೆ ಇನ್ನಿತರೆ ಕ್ಷೇತ್ರಗಳಿಗೆ ಅನುಮತಿ ನೀಡಲಾಗಿದೆ. ಆದರೆ ಆರೋಗ್ಯಕ್ಕೆ ಬೇಕಾದ ಜಿಮ್‌ ಚಟುವಟಿಕೆಗೆ ಅವಕಾಶ ನೀಡದಿರುವುದು ದೊಡ್ಡ ದುರಂತವಾಗಿದೆ.ರಾಜ್ಯ ಸರಕಾರ ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿ ಆದಷ್ಟು ಬೇಗ ಜಿಮ್‌ ಆರಂಭಿಸಲು ಅನುಮತಿ ನೀಡಬೇಕು ಎಂದು ಆಗ್ರಹಿಸಿದರು.

ಕಳೆದ ಮೂರುವರೆ ತಿಂಗಳಿನಿಂದ ಜಿಮ್‌ಗಳು ಸಂಪೂರ್ಣವಾಗಿ ಸ್ಥಗಿತಗೊಂಡಿದ್ದು, ಮಾಲೀಕರು, ತರಬೇತುದಾರರು ಆರ್ಥಿಕ ಸಮಸ್ಯೆಯಿಂದ ನರಳುವಂತಾಗಿದೆ. ಆಗಿರುವ ನಷ್ಟದಿಂದ ಕೆಲ ಜಿಮ್‌ ಗಳು ಪುನರಾರಂಭ ಆಗುವುದು ದುಸ್ಥರವಾಗಲಿದೆ. ಲಾಕ್‌ಡೌನ್‌ ಮುಂದುವರಿದರೆ ಬಹುತೇಕ ಜಿಮ್‌ಗಳು ಮುಚ್ಚಲಿವೆ. ಜಿಲ್ಲೆಯಲ್ಲಿ ಸುಮಾರು 350 ಜಿಮ್‌ಗಳಿದ್ದು, ಇದನ್ನೇ ನಂಬಿಕೊಂಡು ಬದುಕುತ್ತಿದ್ದ ತರಬೇತುದಾರರು, ಸ್ವಚ್ಛತಾ ಕೆಲಸಗಾರರು ಸೇರಿದಂತೆ ಸುಮಾರು 3500ಕ್ಕೂ ಹೆಚ್ಚು ಜನರು ಬೀದಿಗೆ ಬಿದ್ದಿದ್ದು, ಜಿಮ್‌ಗಳ ಆರಂಭಕ್ಕೆ ಸರಕಾರ ಅನುಮತಿ ನೀಡಿಕೆಗೆ ಮುಂದಾಗಬೇಕೆಂದು ಒತ್ತಾಯಿಸಿದರು.

ಸಂಘದ ಪ್ರಧಾನ ಕಾರ್ಯದರ್ಶಿ ವಿನೋದ ಜಾಧವ, ಮಹ್ಮದ್‌ ಸಲೀಂ, ಅನೀಸ್‌ ಅಹ್ಮದ್‌ ದಲಾಲ, ಲೇವಿನ್‌ ಕುಮಾರ ಇನ್ನಿತರರಿದ್ದರು.