ಗೋವಾ ಕನ್ನಡಿಗರ ಮೇಲೆ ದೌರ್ಜನ್ಯಕ್ಕೆ ಖಂಡನೆ

Team Udayavani, Oct 7, 2017, 1:17 PM IST

ಹುಬ್ಬಳ್ಳಿ: ಗೋವಾದಲ್ಲಿ ಕನ್ನಡಿಗರ ಮೇಲೆ ನಡೆಯುತ್ತಿರುವ ದೌರ್ಜನ್ಯ ಖಂಡಿಸಿ ವಿವಿಧ ಸಂಘಟನೆ ನೇತೃತ್ವದಲ್ಲಿ ಸಂಗೊಳ್ಳಿ ರಾಯಣ್ಣ ವೃತ್ತದಲ್ಲಿ ಶುಕ್ರವಾರ ಪ್ರತಿಭಟನೆ ನಡೆಸಿ ತಹಶೀಲ್ದಾರ್‌ಗೆ ಮನವಿ ಸಲ್ಲಿಸಲಾಯಿತು. 

ಗೋವಾದ ಬೈನಾ ಬೀಚ್‌ನಲ್ಲಿ ಕನ್ನಡಿಗರ ಮನೆ ಹಾಗೂ ಹಿಂದೂ ದೇವಾಲಯಗಳನ್ನು ಧ್ವಂಸ ಮಾಡಿದ ಮುಖ್ಯಮಂತ್ರಿ ಮನೋಹರ ಪರಿಕ್ಕರ ನೇತೃತ್ವದ ಬಿಜೆಪಿ ಸರ್ಕಾರದ ವಿರುದ್ಧ ಘೋಷಣೆ ಕೂಗಲಾಯಿತು. 

ಗೋವಾದಲ್ಲಿಂದು ನೂರಾರು ಕನ್ನಡಿಗರು ನಿರ್ಗತಿಕರಾಗಿದ್ದಾರೆ. ಗೋವಾದಲ್ಲಿ ಶೇ. 20ರಷ್ಟು ಜನರು ಕನ್ನಡಿಗರಾಗಿದ್ದು ಅವರನ್ನು ಗೋವಾ ಸರಕಾರ ಹೀನಾಯವಾಗಿ ಕಾಣುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು. 

ಕೆಪಿಸಿಸಿ ವೈದ್ಯಕೀಯ ಘಟಕದ ಉಪಾಧ್ಯಕ್ಷ  ಡಾ| ಮಹೇಶ ನಾಲವಾಡ, ಕಸಾಪ ಜಿಲ್ಲಾಧ್ಯಕ್ಷ ಡಾ| ಲಿಂಗರಾಜ ಅಂಗಡಿ, ವಿವಿಧ ಸಂಘಟನೆ ಮುಖಂಡರಾದ ಅಮೃತ ಇಜಾರಿ, ಮಹೇಶ ಪತ್ತಾರ, ಶೇಖರಯ್ಯ ಮಠಪತಿ, ಸಂಜು ದುಮ್ಮಕ್ಕನಾಳ, ಸೋಮಲಿಂಗ ಎಲಿಗಾರ, ವಿಕಾಸ ಸೊಪ್ಪಿನ, ಸುರೇಶ ಗೋಕಾಕ, ಗೋಪಾಲ ಪಾಟೀಲ ಇತರರಿದ್ದರು.