ಹುಬ್ಬಳ್ಳಿಯಿಂದ ಗೋವಾ-ಕೊಚ್ಚಿ  ವಿಮಾನಯಾನ ಶುಭಾರಂಭ

Team Udayavani, Jun 29, 2018, 4:40 PM IST

ಹುಬ್ಬಳ್ಳಿ: ಹುಬ್ಬಳ್ಳಿಯಿಂದ ಗೋವಾ ಹಾಗೂ ಕೊಚ್ಚಿಗೆ ಇಂಡಿಗೋ ವಿಮಾನಯಾನ ಸಂಚಾರ ಗುರುವಾರದಿಂದ ಆರಂಭಗೊಂಡಿತು. ಇಂಡಿಗೋ ಕಂಪನಿಯ ಎಟಿಆರ್‌ ವಿಮಾನ ಸಂಜೆ 4:00 ಗಂಟೆಗೆ ಕೊಚ್ಚಿಯಿಂದ ಹುಬ್ಬಳ್ಳಿಗೆ ಆಗಮಿಸಿತು. ಈ ಸಂದರ್ಭದಲ್ಲಿ ಅಗ್ನಿಶಾಮಕ ದಳದವರು ಜಲಫಿರಂಗಿ (ವಾಟರ್‌ ಸಲ್ಯೂಟ್‌) ಮೂಲಕ ವಿಮಾನವನ್ನು ಸ್ವಾಗತಿಸಿದರು. ಇಂಡಿಗೋ ಕಂಪನಿಯ ಸಿಬ್ಬಂದಿ ಕೊಚ್ಚಿಯಿಂದ ಆಗಮಿಸಿದ ಪ್ರಯಾಣಿಕರಿಗೆ ಹೂ-ಗು ಫಿರಂಗಿಚ್ಛ ನೀಡಿ ಬರಮಾಡಿಕೊಂಡರು. ಇದೇ ಸಂದರ್ಭದಲ್ಲಿ ನಿಲ್ದಾಣದಲ್ಲಿ ಮಗುವಿನಿಂದ ಕೇಕ್‌ ಕತ್ತರಿಸಲಾಯಿತು. ವಿಮಾನ ನಿಲ್ದಾಣದಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಸಂಸದ ಪ್ರಹ್ಲಾದ ಜೋಶಿ, ವಿಧಾನ ಪರಿಷತ್‌ ಹಂಗಾಮಿ ಸಭಾಪತಿ ಬಸವರಾಜ ಹೊರಟ್ಟಿ, ಕಂಪನಿಯ ವಿಮಾನಯಾನ ಸೇವೆ ಉದ್ಘಾಟಿಸಿದರು.

ಈ ಸಂದರ್ಭದಲ್ಲಿ ಮಾಜಿ ಮುಖ್ಯಮಂತ್ರಿ ಜಗದೀಶ ಶೆಟ್ಟರ, ಶಾಸಕರಾದ ಅರವಿಂದ ಬೆಲ್ಲದ, ಹಾಲಪ್ಪ ಆಚಾರಿ, ಹುಬ್ಬಳ್ಳಿ ವಿಮಾನ ನಿಲ್ದಾಣದ ನಿರ್ದೇಶಕಿ ಅಹಿಲ್ಯಾ ಕಾಕೋಡಿಕರ, ಜಿಲ್ಲಾಧಿಕಾರಿ ಡಾ| ಎಸ್‌. ಬಿ. ಬೊಮ್ಮನಹಳ್ಳಿ, ತಹಶೀಲ್ದಾರ್‌ ಶಶಿಧರ ಮಾಡ್ಯಾಳ, ಡಿಸಿಪಿ ಎಸ್‌.ಬಿ. ನೇಮಗೌಡ ಹಾಗೂ ಇಂಡಿಗೋ ಕಂಪನಿ ಉಪಾಧ್ಯಕ್ಷೆ, ಅಧಿಕಾರಿಗಳು ಹಾಗೂ ಸಿಬ್ಬಂದಿ ಇದ್ದರು. ಕಂಪನಿ ಆರಂಭಿಸಿದ ಮೊದಲ ದಿನದ ವಿಮಾನ ಸೇವೆಯಲ್ಲಿ ಗೋವಾಕ್ಕೆ ತೆರಳುತ್ತಿದ್ದ ಪ್ರಯಾಣಿಕರಿಗೆ ಕಂಪನಿಯವರು ಧಾರವಾಡ ಪೇಡೆಯ ಗಿಫ್ಟ್‌ ಹ್ಯಾಂಪರ್‌ ಕೊಟ್ಟು ಬೀಳ್ಕೊಟ್ಟರು.