ಸರ್ವಋತುವಿಗೂ ಹುಬ್ಬಳಿ ಏರ್‌ಪೋರ್ಟ್‌ ಸಜ್ಜು

Team Udayavani, Dec 5, 2018, 4:50 PM IST

ಹುಬ್ಬಳ್ಳಿ: ವಿಮಾನಗಳು ದಟ್ಟ ಮಂಜು, ರಾತ್ರಿ ವೇಳೆ ಹಾಗೂ ಹವಾಮಾನ ವೈಪರೀತ್ಯ ಸೇರಿದಂತೆ ಎಲ್ಲ ಬಗೆಯ ಹವಾಮಾನ ಸಂದರ್ಭದಲ್ಲೂ ಸುಗಮವಾಗಿ ತಮ್ಮ ಕಾರ್ಯಾಚರಣೆ ನಡೆಸಲು ಅಗತ್ಯವಾದ ಇನ್‌ ಸ್ಟ್ರೆಮೆಂಟ್‌ ಲ್ಯಾಂಡಿಂಗ್‌ ಸಿಸ್ಟಮ್‌ (ಐಎಲ್‌ಎಸ್‌) ಅಳವಡಿಕೆ ಕಾರ್ಯ ನಗರದ ವಿಮಾನ ನಿಲ್ದಾಣದಲ್ಲಿ ಪ್ರಗತಿಯಲ್ಲಿದೆ.

ವಿದೇಶದಿಂದ ಐಎಲ್‌ಎಸ್‌ ಉಪಕರಣ ಈಗಾಗಲೇ ನಗರಕ್ಕೆ ಬಂದಿದ್ದು, ಅಳವಡಿಕೆ ಕಾರ್ಯ ನಡೆಯುತ್ತಿದೆ. ಐಎಲ್‌ ಎಸ್‌ ಸ್ಥಾಪನೆಗೆ ಅವಶ್ಯವಾದ ಸಿವಿಲ್‌ ಹಾಗೂ ಎಲೆಕ್ಟ್ರಿಕಲ್‌ ಕಾಮಗಾರಿ ಈಗಾಗಲೇ ಪರಿಪೂರ್ಣಗೊಂಡಿದೆ. ಇನ್ನು ಕೆಲವೇ ತಿಂಗಳಲ್ಲಿ ಐಎಲ್‌ಎಸ್‌ ಅನುಷ್ಠಾನ ಕಾಮಗಾರಿ ಪೂರ್ಣಗೊಳ್ಳಲಿದ್ದು, ನಂತರ ಎಲ್ಲ ಬಗೆಯ ಹವಾಮಾನ ಸಂದರ್ಭದಲ್ಲೂ ಹುಬ್ಬಳ್ಳಿಯಿಂದ ವಿಮಾನಗಳು ಹಾರಾಟ ನಡೆಸಬಹುದಾಗಿದೆ.

ವಿಮಾನ ನಿಲ್ದಾಣವನ್ನು ಅಂದಾಜು 141 ಕೋಟಿ ರೂ. ವೆಚ್ಚದಲ್ಲಿ ಅಂತಾರಾಷ್ಟ್ರೀಯ ಗುಣಮಟ್ಟದಂತೆ ಅಭಿವೃದ್ಧಿಪಡಿಸಲಾಗಿದೆ. ರನ್‌ ವೇ ವಿಸ್ತರಣೆ, ಆವರಣ ಗೋಡೆ ನಿರ್ಮಾಣ, ನೂತನ ಟರ್ಮಿನಲ್‌ ಕಟ್ಟಡ, ಹೊಸ ಎಟಿಸಿ ಟಾವರ್‌, ಪಾವರ್‌ ಹೌಸ್‌, ಅಗ್ನಿಶಾಮಕ ದಳದ ವಾಹನಗಳ ನಿಲುಗಡೆಗೆ ಅತ್ಯಾಧುನಿಕ ಸೌಲಭ್ಯಗಳನ್ನೊಳಗೊಂಡ ಕಟ್ಟಡ, ಭದ್ರತಾ ವೀಕ್ಷಕ ಟವರ್‌, ಸ್ಫೋಟಕ ಪತ್ತೆ ಉಪಕರಣ ಸೇರಿದಂತೆ ಹಲವಾರು ಸೌಲಭ್ಯಗಳಿರುವ ಕಟ್ಟಡಗಳನ್ನು ನಿರ್ಮಿಸಲಾಗಿದೆ. ಹಳೇ ಟರ್ಮಿನಲ್‌ ಕಟ್ಟಡವನ್ನು ಕಾರ್ಗೋ ವಿಮಾನ (ಸರಕು ಸಾಗಣೆ) ನಿಲ್ದಾಣವನ್ನಾಗಿ ಪರಿವರ್ತಿಸುವ ಕಾಮಗಾರಿ ಭರದಿಂದ ಸಾಗಿವೆ.

ಪ್ರಮುಖ ನಗರಗಳಿಗೆ ಹಾರಾಟ: ಹುಬ್ಬಳ್ಳಿ ವಿಮಾನ ನಿಲ್ದಾಣದಿಂದ ಈಗಾಗಲೇ ಏರ್‌ ಇಂಡಿಯಾ, ಸ್ಪೈಸ್ ಜೆಟ್‌, ಇಂಡಿಗೋ ಕಂಪನಿಗಳು ಮುಂಬಯಿ, ಬೆಂಗಳೂರು, ಹೈದರಾಬಾದ್‌, ಚೆನೈ, ಅಹ್ಮದಾಬಾದ್‌, ಕೊಚ್ಚಿ, ಗೋವಾಗೆ ಎಟಿಆರ್‌ ಒಳಗೊಂಡಂತೆ ಬೋಯಿಂಗ್‌ ವಿಮಾನಗಳ ವಿಮಾನಯಾನ ಸೇವೆ ಒದಗಿಸುತ್ತಿವೆ. ಜೊತೆಗೆ ಸಂಜಯ ಘೋಡಾವತ್‌ ಒಡೆತನದ ಸ್ಟಾರ್‌ ಏರ್‌ ಕಂಪನಿ ಕೂಡ ಉಡಾನ್‌ ಯೋಜನೆಯಡಿ ತಿರುಪತಿ ಸೇರಿದಂತೆ ಪುಣೆ, ಹಿಂಡೋನ್‌ (ದೆಹಲಿ), ಬೆಂಗಳೂರಿಗೆ ನೇರ ವಿಮಾನಯಾನ ಸೇವೆ ಒದಗಿಸಲು ಯೋಜಿಸಿದೆ. ತಿರುಪತಿಗೆ ತನ್ನ ವಿಮಾನಯಾನ ಸೇವೆ ಒದಗಿಸುವ ನಿಟ್ಟಿನಲ್ಲಿ ಬುಕ್ಕಿಂಗ್‌ ಕೂಡ ಆರಂಭಿಸಿದೆ. ಇನ್ನುಳಿದ ಪ್ರದೇಶಗಳಿಗೆ ವಿಮಾನಯಾನ ಆರಂಭಿಸಲು ನಾಗರಿಕ ವಿಮಾನಯಾನ ನಿರ್ದೇಶನಾಲಯ(ಡಿಜಿಸಿಎ)ದ ಅನುಮತಿ ನಿರೀಕ್ಷೆಯಲ್ಲಿದೆ.

ಪ್ರಯಾಣಿಕರ ಸಂಖ್ಯೆ ಹೆಚ್ಚಳ: ನಗರದಿಂದ ವಿವಿಧ ಕಂಪನಿಗಳ ವಿಮಾನಯಾನ ಸೇವೆಗೆ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ವಿಮಾನಯಾನಿಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಳವಾಗುತ್ತಿದೆ. ಅಕ್ಟೋಬರ್‌ ತಿಂಗಳೊಂದರಲ್ಲೇ 48 ಸಾವಿರ ಪ್ರಯಾಣಿಕರು ಹುಬ್ಬಳ್ಳಿಯಿಂದ ವಿವಿಧೆಡೆ ಪ್ರಯಾಣ ಮಾಡಿದ್ದಾರೆ. ನಗರದಿಂದ ಪ್ರತಿದಿನ 16 ವಿಮಾನಗಳು ಈಗ ಕಾರ್ಯಾಚರಣೆ ಮಾಡುತ್ತಿವೆ. ಐಎಲ್‌ಎಸ್‌ ಅಳವಡಿಕೆ ನಂತರ ವಿದೇಶಗಳಿಗೂ ವಿಮಾನಗಳು ಹಾರುವ ಆಶಾಭಾವ ಚಿಗುರೊಡೆದಿದೆ. 

ಹುಬ್ಬಳ್ಳಿ ವಿಮಾನ ನಿಲ್ದಾಣದಿಂದ ಸರ್ವಋತುಮಾನಗಳಲ್ಲೂ ವಿಮಾನಗಳು ಸುಗಮವಾಗಿ ಹಾರಾಟ ನಡೆಸುವಂತಾಗಲು ಐಎಲ್‌ಎಸ್‌ ಅಳವಡಿಕೆ ಕಾರ್ಯ ಪ್ರಗತಿಯಲ್ಲಿದೆ. ಕೆಲ ತಿಂಗಳಲ್ಲಿಯೇ ಇದರ ಅನುಷ್ಠಾನ ಪೂರ್ಣಗೊಳ್ಳಲಿದೆ.
.ಅಹಿಲ್ಯಾ ಕಾಕೋಡಿಕರ,
ಹುಬ್ಬಳ್ಳಿ ವಿಮಾನ ನಿಲ್ದಾಣದ ನಿರ್ದೇಶಕಿ 

ಶಿವಶಂಕರ ಕಂಠಿ