Hubli: ತೀವ್ರತೆ ಪಡೆದ ಬಂದ್; ಬಸ್-ಆಟೋ ಇಲ್ಲದೆ ಪರದಾಡಿದ ಜನತೆ

Team Udayavani, Jan 9, 2025, 2:10 PM IST

ಹುಬ್ಬಳ್ಳಿ: ದಲಿತ ಸಂಘಟನೆಗಳು‌ ಕರೆ ನೀಡಿದ ಬಂದ್ ಬೆಳಗ್ಗೆ 11 ಗಂಟೆ ನಂತರ ತೀವ್ರತೆ ಪಡೆಯಿತು. ಬಂದ್ ಕಾರಣದಿಂದ ಬಸ್, ಆಟೋಗಳ ಸಂಚಾರ ಇಲ್ಲದೆ ಜನ‌ ಪರದಾಡುವಂತಾಯಿತು. ಹೋರಾಟದ ಕೇಂದ್ರಬಿಂದು ರಾಣಿ ಚನ್ನಮ್ಮ ವೃತ್ತವಾಗಿತು.

ಗೋಕುಲರಸ್ತೆ ಬಸ್ ನಿಲ್ದಾಣ, ಹೊಸೂರು ಬಸ್ ನಿಲ್ದಾಣ, ನಗರ ಬಸ್ ನಿಲ್ದಾಣಗಳಲ್ಲಿ ಬಸ್ ಇಲ್ಲದೆ ಪ್ರಯಾಣಿಕರು‌ ಪರದಾಡುವಂತಾಯಿತು. ಆಟೋರಿಕ್ಷಾಗಳ ಸಂಚಾರ ಅತ್ಯಂತ ವಿರಳವಾಗಿತ್ತು. ಲಭ್ಯವಿದ್ದ ಕೆಲವು ಆಟೋರಿಕ್ಷಾಗಳು ಜನರಿಂದ ದುಪ್ಪಟ್ಟು, ಮೂರು ಪಟ್ಟುಹಣ ಪಡೆಯುತ್ತಿದ್ದು ಕಂಡು ಬಂದಿತು.

ಆಸ್ಪತ್ರೆಗೆ ಹೋಗಲು‌ ವಾಹನ ಇಲ್ಲದೆ ಪರದಾಡುತ್ತಿದ್ದ ರೋಗಿಗಳನ್ನು ಅಂಬ್ಯಲೆನ್ಸ್, ಪೊಲೀಸ್ ವಾಹನಗಳಲ್ಲಿಆಸ್ಪತ್ರೆಗೆ ಕಳುಹಿಸಲಾಯಿತು.

ದ್ವಿಚಕ್ರ ವಾಹನಗಳಲ್ಲಿ‌ ಪ್ರತಿಭಟನಾಕಾರರು ವಿವಿಧ ಕಡೆ ಗುಂಪು‌ ಗುಂಪಾಗಿ ಸಂಚರಿಸಿದರೆ, ಕೆಲ ಪ್ರತಿಭಟನಾಕಾರರು ಎತ್ತಿನ ಬಂಡಿಗಳಲ್ಲಿ ಮೆರವಣಿಗೆ ಮೂಲಕ‌ ಆಗಮಿಸಿದರು.

ಬಂದ್ ಗೆ ಬೆಂಬಲ ವ್ಯಕ್ತಪಡಿಸಿದ ಕಾಂಗ್ರೆಸ್ ಮುಖಂಡರು ಚನ್ನಮ್ಮ ವೃತ್ತಕ್ಕೆ ಆಗಮಿಸಿ ಕೇಂದ್ರ ಸಚಿವ ಅಮಿತ್ ಶಾ ವಿರುದ್ದ ವಾಗ್ದಾಳಿ ನಡೆಸಿದರು. ಅಮಿತ್ ಶಾ ಬಹಿರಂಗ ಕ್ಷಮೆಯಾಚಿಸಬೇಕು. ಪ್ರಧಾನಿ ಮೋದಿಯವರು ಶಾ ಅವರನ್ನು ಸಂಪುಟದಿಂದ ವಜಾಗೊಳಿಸಬೇಕು‌ ಎಂದು‌ ಒತ್ತಾಯಿಸಿದರು.