ಮಾಲ್‌ಗ‌ಳಲ್ಲಿ ಬಿಡಿ ಆಹಾರ ಪದಾರ್ಥಕ್ಕೆ ಹೆಚ್ಚಿದ ಬೇಡಿಕೆ

Team Udayavani, Jul 19, 2017, 12:05 PM IST

ಹುಬ್ಬಳ್ಳಿ: ವಿವಿಧ ಮಾಲ್‌ ಹಾಗೂ ಪ್ರಮುಖ ಕಿರಾಣಿ ಅಂಗಡಿಗಳಲ್ಲಿ ದೊರೆಯುವ ಬ್ರ್ಯಾಂಡೆಡ್‌ ಆಹಾರ ಧಾನ್ಯ ಇನ್ನಿತರ ವಸ್ತುಗಳ ಖರೀದಿಗೆ ಮೊದಲು ಜನರು ಹೆಚ್ಚು ಒಲವು ತೋರುತ್ತಿದ್ದರು. ಆದರೆ, ಜಿಎಸ್‌ಟಿ ಜಾರಿಯಾದಾಗಿನಿಂದ ಬ್ರ್ಯಾಂಡೆಡ್‌ ಗಳ ಮೋಹ ಕಡಿಮೆಯಾಗಿ, ಬಿಡಿಯಾಗಿ ದೊರೆಯುವ ಆಹಾರಧಾನ್ಯ ಹಾಗೂ ವಸ್ತುಗಳ ಬೇಡಿಕೆ ಹೆಚ್ಚುತ್ತಿರುವುದು ಕಂಡು ಬರತೊಡಗಿದೆ. 

ಬ್ರ್ಯಾಂಡೆಡ್‌ ಪದಾರ್ಥಗಳ ಮೇಲೆ ಜಿಎಸ್‌ಟಿ ಹೆಚ್ಚಿನ ತೆರಿಗೆ ಹಾಕಿದ್ದರಿಂದ ಮಧ್ಯಮ ವರ್ಗದವರಲ್ಲಿ ಅನೇಕರು ಮಾಲ್‌ ಗಳಿಗೆ ಹೋದರೂ ಬ್ರ್ಯಾಂಡೆಡ್‌ ಬದಲು ಬಿಡಿಯಾಗಿ ದೊರೆಯುವ ಪದಾರ್ಥಗಳನ್ನು ಖರೀದಿಸಲು ಒಲವು ತೋರುತ್ತಿದ್ದಾರೆ. ಬ್ರ್ಯಾಂಡ್‌ ಇರದ, ಪ್ಯಾಕ್‌ ಆಗಿರದ ಆಹಾರಧಾನ್ಯ ಹಾಗೂ ಪದಾರ್ಥಗಳಲ್ಲಿ ಕಲಬೆರಿಕೆ ಅಧಿಕವಾಗಿರುತ್ತದೆ ಎಂದು ಅನೇಕರು, ಇನ್ನು ಕೆಲವರು ಪ್ರತಿಷ್ಠೆಗಾಗಿ ಬ್ರ್ಯಾಂಡೆಡ್‌ ಪದಾರ್ಥಗಳನ್ನು ಖರೀದಿಸುತ್ತಿದ್ದರು.

ಬ್ರ್ಯಾಂಡೆಡ್‌ ಆಹಾರಧಾನ್ಯ ಹಾಗೂ ಪದಾರ್ಥಗಳ ಮೇಲೆ ಜಿಎಸ್‌ಟಿ ಹಾಕಿದ್ದರಿಂದ ಅನೇಕರು ಮತ್ತದೇ ಬ್ರ್ಯಾಂಡೇತರ ವಸ್ತುಗಳ ಖರೀದಿಗೆ ಮುಂದಾಗುತ್ತಿದ್ದಾರೆ. ರಿಲಾಯನ್ಸ್‌, ಮೋರ್‌, ಬಿಗ್‌ ಬಜಾರ್‌, ಸೆವನ್‌ ಡೇಸ್‌ ನಂತರ ಮಾಲ್‌ಗ‌ಳಲ್ಲಿ ಹಾಗೂ ಹೋಲ್‌ಸೇಲ್‌ ಅಂಗಡಿಗಳಲ್ಲಿ ಬ್ರ್ಯಾಂಡೆಡ್‌ ಆಹಾರ ಸಾಮಗ್ರಿ, ಪದಾರ್ಥಗಳ ಬದಲಾಗಿ ಬಿಡಿಯಾಗಿ ಸಿಗುವ ಪದಾರ್ಥಗಳಿಗೆ ಜನರು ಒಲವು ತೋರುತ್ತಿದ್ದಾರೆ. 

ಅಕ್ಕಿ, ಗೋಧಿ, ಜೋಳ, ರಾಗಿ, ಸಕ್ಕರೆ, ಬೇಳೆ ಕಾಳುಗಳು, ಶೇಂಗಾ, ಪುಟಾಣಿ, ಹಿಟ್ಟು ಸೇರಿದಂತೆ ಎಲ್ಲವನ್ನು ಬ್ರ್ಯಾಂಡೆಡ್‌ ಖರೀದಿಗಿಂತ ಬಿಡಿಯಾಗಿರುವ ಪದಾರ್ಥಗಳ ಖರೀದಿಗೆ ಮುಂದಾಗುತ್ತಿದ್ದಾರೆ. ಆದರೆ, ಕೆಲ ಸಿರಿವಂತರು ಮಾತ್ರ ಜಿಎಸ್‌ಟಿ ಬಗ್ಗೆ ಹೆಚ್ಚು ಗಮನ ನೀಡದೆ ಬ್ರ್ಯಾಂಡೆಡ್‌ ವಸ್ತುಗಳನ್ನೇ ಖರೀದಿಸುತ್ತಿದ್ದಾರೆ. 

ಅಡುಗೆ ಎಣ್ಣೆಯಲ್ಲೂ ಅನೇಕರು ಬ್ರ್ಯಾಂಡೆಡ್‌ ಬದಲಾಗಿ ಬ್ರ್ಯಾಂಡ್‌ ಇಲ್ಲದೆ ಮಾರಾಟವಾಗುವ ಎಣ್ಣೆಯನ್ನು ಖರೀದಿಸುತ್ತಿದ್ದಾರೆ. ಒಟ್ಟಾರೆಯಾಗಿ ಆಹಾರ ಪದಾರ್ಥಗಳ ಖರೀದಿಯಲ್ಲಿ ಜಿಎಸ್‌ಟಿ ಸದ್ಯಕ್ಕಂತೂ ತನ್ನದೇ ಪರಿಣಾಮ ಬೀರತೊಡಗಿದೆ. 

* ಬಸವರಾಜ ಹೂಗಾರ