ಹುಬ್ಬಳ್ಳಿಯಲ್ಲಿ ಹೂಡಿಕೆದಾರರ ಸಮಾವೇಶ

Team Udayavani, Sep 15, 2019, 10:33 AM IST

ಹುಬ್ಬಳ್ಳಿ: ಅಭಿವೃದ್ಧಿ ಸಂವಾದದಲ್ಲಿ ಪಾಲ್ಗೊಂಡಿದ್ದ ಉದ್ಯಮಿಗಳು, ಸಾರ್ವಜನಿಕರು.

ಹುಬ್ಬಳ್ಳಿ: ಅವಳಿನಗರದಲ್ಲಿ ಕೈಗಾರಿಕೆ ಅಭಿವೃದ್ಧಿ ನಿಟ್ಟಿನಲ್ಲಿ ಹುಬ್ಬಳ್ಳಿಯಲ್ಲಿ ಜಾಗತಿಕ ಹೂಡಿಕೆದಾರರ ಸಮಾವೇಶ ನಡೆಸಲು ರಾಜ್ಯದ ಬೃಹತ್‌ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಜಗದೀಶ ಶೆಟ್ಟರ ಅವರೊಂದಿಗೆ ಚರ್ಚಿಸಿ, ಸಮಾವೇಶ ಆಯೋಜನೆಗೆ ಯತ್ನಿಸುವೆ. ಅದೇ ರೀತಿ ಹುಬ್ಬಳ್ಳಿಗೆ ಉದ್ಯಮಿಗಳಾದ ಅದಾನಿ, ಅಂಬಾನಿ ಅವರನ್ನು ಕರೆತರಲು ಯತ್ನಿಸುವುದಾಗಿ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಹೇಳಿದರು.

ಟೈ ಹುಬ್ಬಳ್ಳಿ ಆಯೋಜಿಸಿದ್ದ ‘ಹು-ಧಾ ಅಭಿವೃದ್ಧಿ ನೋಟ’ ಸಂವಾದದಲ್ಲಿ ಉದ್ಯಮಿಗಳ ಪ್ರಶ್ನೆ ಹಾಗೂ ಸಲಹೆಗಳನ್ನು ಆಲಿಸಿ ಅವರು ಮಾತನಾಡಿದರು.

ಜಾಗತಿಕ ಹೂಡಿಕೆದಾರರ ಸಮಾವೇಶ ಕೇವಲ ಬೆಂಗಳೂರಿಗೆ ಸೀಮಿತವಾಗದೆ, ಹುಬ್ಬಳ್ಳಿ-ಧಾರವಾಡಕ್ಕೂ ಬರಲಿ ಎಂಬ ತಮ್ಮ ಅನಿಸಿಕೆ ಸೂಕ್ತವಾಗಿದೆ. ಇದಕ್ಕೆ ಪೂರಕವಾಗಿ ಸಚಿವ ಜಗದೀಶ ಶೆಟ್ಟರ ಜತೆ ಚರ್ಚಿಸುವೆ. 2-3 ತಿಂಗಳಲ್ಲಿ ಈ ಬಗ್ಗೆ ತೀರ್ಮಾನ ಕೈಗೊಳ್ಳಲಾಗುವುದು. ಕೈಗಾರಿಕೆ ಹೂಡಿಕೆಯಲ್ಲಿ ಕೆಲ ಬದಲಾವಣೆ ನಿಟ್ಟಿನಲ್ಲಿ ಸಚಿವ ಶೆಟ್ಟರ, ನಾನು ಹಾಗೂ ಸಂಬಂಧಿಸಿದ ಇಲಾಖೆಗಳ ಹಿರಿಯ ಅಧಿಕಾರಿಗಳೊಂದಿಗೆ 15-20 ದಿನಗಳಲ್ಲಿ ಸಭೆ ಮಾಡೋಣ ಎಂದರು.

ಹುಬ್ಬಳ್ಳಿ-ಧಾರವಾಡಕ್ಕೆ ಸಂಪರ್ಕ ಹಾಗೂ ಮೂಲಸೌಲಭ್ಯಗಳ ನಿಟ್ಟಿನಲ್ಲಿ ಹಲವು ಕ್ರಮ ಕೈಗೊಳ್ಳಲಾಗಿದೆ. ಹುಬ್ಬಳ್ಳಿ-ಚೆನ್ನೈ ನಡುವೆ ನೇರ ರೈಲು ಸಂಪರ್ಕಕ್ಕೆ ಚಾಲನೆ ನೀಡಲಾಗಿದೆ. ಹುಬ್ಬಳ್ಳಿ-ಮುಂಬಯಿ ನಡುವೆ ಪ್ರಸ್ತುತ ಐದು ದಿನ ವಿಮಾನಯಾನವನ್ನು ಏಳು ದಿನಕ್ಕೆ ವಿಸ್ತರಿಸಲಾಗುವುದು. ಇದಲ್ಲದೆ, ಹುಬ್ಬಳ್ಳಿ-ಬೆಂಗಳೂರು ನಡುವೆ ಬೆಳಗ್ಗೆ ಹಾಗೂ ರಾತ್ರಿ ಮತ್ತೂಂದು ವಿಮಾನಗಳು ಸಂಚಾರ ಆರಂಭಿಸಲಿವೆ ಎಂದು ಹೇಳಿದರು.

ಆಹಾರ ಸಂಸ್ಕರಣೆ ಉದ್ಯಮ, ಸಬ್ಸಿಡಿ ಇನ್ನಿತರ ಸಮಸ್ಯೆಗಳ ಕುರಿತಾಗಿ ಇಲ್ಲಿನ ಉದ್ಯಮಿಗಳ ನಿಯೋಗ ದೆಹಲಿಗೆ ಬಂದರೆ ಸಂಬಂಧಿಸಿದ ಸಚಿವರ ಬಳಿಗೆ ಕರೆದೊಯ್ದು ಸೌಲಭ್ಯಕ್ಕೆ ಯತ್ನಿಸಲಾಗುವುದು. ಅದೇ ರೀತಿ ಉದ್ಯಮ ಅಭಿವೃದ್ಧಿ ಇನ್ನಿತರ ವಿಷಯಗಳ ಕುರಿತಾಗಿ ಟೈ ನಿಯೋಗ ದೆಹಲಿಗೆ ಬಂದರೆ ಕೇಂದ್ರ ಸರಕಾರದಿಂದ ದೊರೆಯುವ ಸೌಲಭ್ಯ, ಯೋಜನೆಗಳ ಜಾರಿಗೆ ಯತ್ನಿಸುವೆ ಎಂದರು.

ಮುದ್ರಾ ಯೋಜನೆ ಸಮಸ್ಯೆಗಳ ಕುರಿತಾಗಿ ನಿರ್ದಿಷ್ಟ ಪ್ರಕರಣಗಳೊಂದಿಗೆ ಆಗಮಿಸಿದರೆ ಸಂಬಂಧಿಸಿದ ಬ್ಯಾಂಕ್‌ಗಳೊಂದಿಗೆ ಚರ್ಚಿಸುವುದಾಗಿ ಸಚಿವರು ಭರವಸೆ ನೀಡಿದರು.

ಟೈ ಹುಬ್ಬಳ್ಳಿ ಅಧ್ಯಕ್ಷ ಶಶಿಧರ ಶೆಟ್ಟರ ಪ್ರಾಸ್ತಾವಿಕ ಮಾತನಾಡಿ, ಅವಳಿನಗರ ಅಭಿವೃದ್ಧಿ ನಿಟ್ಟಿನಲ್ಲಿ ಇರಬಹುದಾದ ಅವಕಾಶಗಳ ಕುರಿತು ಹಲವು ಪ್ರಸ್ತಾವನೆಗಳ ಮಾಹಿತಿ ನೀಡಿದರು. ಅವಳಿನಗರಕ್ಕೆ ಬೃಹತ್‌ ಉದ್ಯಮ ತರುವುದು, ಹೂಡಿಕೆದಾರ ಸಮಾವೇಶ ಮೊದಲು ಉದ್ಯಮ ಬೇಡಿಕೆಗೆ ತಕ್ಕ ಸೌಲಭ್ಯ ತಯಾರಿ, ಸ್ಮಾರ್ಟ್‌ ಸಿಟಿ, ಮೂಲಸೌಲಭ್ಯ, ಬಿಆರ್‌ಟಿಎಸ್‌ ವಿಳಂಬ, ನಗರ ಯೋಜನೆ ನೀತಿಗಳು ಇನ್ನಿತರ ವಿಷಯಗಳ ಕುರಿತಾಗಿ ವಿವಿಧ ಉದ್ಯಮಿಗಳು ಅನಿಸಿಕೆ ವ್ಯಕ್ತಪಡಿಸಿದರು. ವಿಧಾನ ಪರಿಷತ್ತು ಸದಸ್ಯ ಪ್ರೊ| ಎಸ್‌.ವಿ. ಸಂಕನೂರು, ಕೆಎಲ್ಇ ನಿರ್ದೇಶಕ ಶಂಕರಣ್ಣ ಮುನವಳ್ಳಿ, ಟೈ ಹುಬ್ಬಳ್ಳಿ ಸದಸ್ಯರು, ಉದ್ಯಮಿಗಳು ಇದ್ದರು.

ತೃಪ್ತಿ ತಂದಿಲ್ಲ ‘ಸ್ಮಾರ್ಟ್‌ಸಿಟಿ’ ಅನುಷ್ಠಾನ:

ಸ್ಮಾರ್ಟ್‌ಸಿಟಿ ಯೋಜನೆ ಕೇಂದ್ರ ಸರಕಾರದ್ದಾದರೂ ಅನುಷ್ಠಾನ ರಾಜ್ಯ ಸರಕಾರದ್ದಾಗಿದೆ. ಇಲ್ಲಿವರೆಗಿನ ಯೋಜನೆ ಅನುಷ್ಠಾನ ನನಗೆ ತೃಪ್ತಿ ತಂದಿಲ್ಲ. ಈ ಹಿನ್ನೆಲೆಯಲ್ಲಿ ಪ್ರಗತಿ ಪರಿಶೀಲನೆಗೆ ಸೋಮವಾರ ಸಭೆ ಕರೆದಿದ್ದೇನೆ ಎಂದು ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಹೇಳಿದರು. ಸ್ಮಾರ್ಟ್‌ಸಿಟಿ ಯೋಜನೆ ಪಾಲ್ಗೊಳ್ಳುವಿಕೆಗೆ ತಮಗೆ ಆಹ್ವಾನ ಇಲ್ಲ ಎಂಬ ಹಲವರ ಅನಿಸಿಕೆಗೆ ಪ್ರತಿಕ್ರಿಯಿಸಿದ ಸಚಿವರು, ನನ್ನನ್ನೇ ಕರೆದಿಲ್ಲ ಎಂದರಲ್ಲದೆ ಸ್ಮಾರ್ಟ್‌ ಸಿಟಿ ಯೋಜನೆಯಲ್ಲಿ ಸ್ಥಳೀಯ ಆರ್ಕಿಟೆಕ್‌ ಅಸೋಸಿಯೇಶನ್‌ ಹಾಗೂ ಬಿಲ್ಡರ್‌ ಅಸೋಸಿಯೇಶನ್‌ ಪಾಲ್ಗೊಳ್ಳುವಿಕೆ ನಿಟ್ಟಿನಲ್ಲಿ ಅವರನ್ನು ಸಲಹಾ ಸಮಿತಿಯಲ್ಲಿ ಸೇರಿಸಿಕೊಳ್ಳಬಹುದು ಎಂದರು. ಈ ಬಗ್ಗೆ ಪರಿಶೀಲಿಸುವಂತೆ ಸ್ಮಾರ್ಟ್‌ ಸಿಟಿ ಯೋಜನೆ ವಿಶೇಷಾಧಿಕಾರಿ ಎಸ್‌.ಎಚ್. ನರೇಗಲ್ಲ ಅವರಿಗೆ ಸೂಚಿಸಿದರು. ನರೇಗಲ್ಲ ಅವರು ಸ್ಮಾರ್ಟ್‌ ಸಿಟಿ ಯೋಜನೆಯಲ್ಲಿ ಇಲ್ಲಿವರೆಗೆ ಆಗಿರುವ ಪ್ರಗತಿ ಕುರಿತಾಗಿ ವಿವರಿಸಿದರು.

ಅತಿಕ್ರಮಣ ಬಗ್ಗೆ ಮಾತಾಡಿದ್ರೆ ಕೋಮುವಾದಿ ಪಟ್ಟ!:

ಅವಳಿನಗರದಲ್ಲಿ ಬಿಆರ್‌ಟಿಎಸ್‌ ಯೋಜನೆ ವಿಳಂಬಕ್ಕೆ ಭೂ ಸ್ವಾಧೀನವೇ ಪ್ರಮುಖ ಸಮಸ್ಯೆಯಾಗಿದೆ. ಧಾರ್ಮಿಕ ಕೇಂದ್ರಗಳ ತೆರವು ಸವಾಲಾಗಿದೆ. ಯಾವುದೇ ಅತಿಕ್ರಮಣ ಇದ್ದರೂ ಅದನ್ನು ತೆರವುಗೊಳಿಸಲೇಬೇಕೆಂಬುದು ನನ್ನ ನಿಲುವು. ಈ ವಿಚಾರವಾಗಿ ಮಾತನಾಡಿದರೆ ನನಗೆ ಕೋಮುವಾದಿ ಪಟ್ಟ ಕಟ್ಟಲಾಗುತ್ತಿದೆ ಎಂದು ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಹೇಳಿದರು. ಪಿ.ಬಿ. ರಸ್ತೆ ಅಗಲೀಕರಣಕ್ಕೆ ಕೇಂದ್ರದಿಂದ ಹಣ ತಂದಿರುವೆ. ಆದರೆ ಅತಿಕ್ರಮಣ ತೆರವುಗೊಳಿಸದ್ದಕ್ಕಾಗಿ ಕಾಮಗಾರಿಯೇ ನಿಂತಿದೆ. ಯಾರೇ ಅತಿಕ್ರಮಣ ಮಾಡಿಕೊಂಡಿದ್ದರೂ ಅದು ತೆರವುಗೊಳಿಸಲೇಬೇಕು. ಅಂತಹ ಸಂದರ್ಭದಲ್ಲಿ ನೀವು ಸಹ ಧ್ವನಿ ಎತ್ತಬೇಕು ಎಂದರು. ಬಿಆರ್‌ಟಿಎಸ್‌ ಕಾಮಗಾರಿ ಬಹುತೇಕ ಪೂರ್ಣಗೊಂಡಿದ್ದು, ಬಾಕಿ ಇರುವ ಕಾಮಗಾರಿ ಶೀಘ್ರದಲ್ಲೇ ಪೂರ್ಣಗೊಳ್ಳಲಿದೆ ಎಂದು ತಿಳಿಸಿದರು. ಕಟ್ಟಡ ನಿರ್ಮಾಣ ನಿಯಮಗಳ ಬಗ್ಗೆ ನಿಮ್ಮ ಆಕ್ಷೇಪ ಕೇಳಿದ್ದೇನೆ. ಈ ಬಗ್ಗೆ ಸಂಬಂಧಿಸಿದ ಅಧಿಕಾರಿಗಳ ಜತೆ ಚರ್ಚಿಸೋಣ. ಆದರೆ, ಕೆಲವು ಬಿಲ್ಡರ್‌ಗಳು ಕೇವಲ 2-3 ಗುಂಟೆ ಜಾಗದಲ್ಲಿಯೇ ಅಪಾರ್ಟ್‌ಮೆಂಟ್ ನಿರ್ಮಾಣ ಮಾಡುತ್ತಾರೆ. ಅಲ್ಲಿ ವಾಹನ ನಿಲುಗಡೆಗೂ ಅವಕಾಶ ಇಲ್ಲವಾಗಿದೆ ಎಂದರು.