ದೇಣಿಗೆ ಸ್ವೀಕೃತಿ ಕೇಂದ್ರಕ್ಕೆ ದಾನಿಗಳ ಕೊರತೆ

Team Udayavani, Apr 19, 2020, 5:31 PM IST

ಸಾಂದರ್ಭಿಕ ಚಿತ್ರ

ಹುಬ್ಬಳ್ಳಿ: ಜಿಲ್ಲಾಡಳಿತ ವಿದ್ಯಾನಗರ ಬನಶಂಕರಿ ಬಡಾವಣೆ ಸಿದ್ದೇಶ್ವರ ಪಾರ್ಕ್‌ ಈಶ್ವರ ಗುಡಿ ಬಳಿ ಇರುವ ಬಸವ ಭವನದಲ್ಲಿ ಆರಂಭಿಸಿರುವ ಆಹಾರ ಧಾನ್ಯಗಳ ಸ್ವೀಕೃತಿ ಕೇಂದ್ರಕ್ಕೆ ದಾನಿಗಳೇ ಬರುತ್ತಿಲ್ಲ. ಅದಲ್ಲದೇಬೆಳಿಗ್ಗೆ 10-ಮಧ್ಯಾಹ್ನ 1 ಗಂಟೆಯವರೆಗೆ ಮಾತ್ರ ಕೇಂದ್ರ ತೆರೆದಿರುತ್ತದೆ. ಅಲ್ಲಿಗೆತೆರಳಲು ಸರಿಯಾದ ಮಾರ್ಗ ಸೂಚಿಗಳೇ ಇಲ್ಲ. ಹೀಗಾಗಿ ನಗರದ ಮಧ್ಯಭಾಗ ಹಾಗೂ ವಿವಿಧ ಭಾಗಗಳಲ್ಲಿ ಕೇಂದ್ರಗಳನ್ನುಆರಂಭಿಸಿದರೆ ಸೂಕ್ತ ಎಂಬುದು ಹಲವರ ಅನಿಸಿಕೆ.

ಕಾರ್ಮಿಕರಿಗೆ, ಬಡವರಿಗೆ, ನಿರ್ಗತಿಕರಿಗೆ ವಿವಿಧ ದಾನಿಗಳು ನೇರವಾಗಿ ಹೋಗಿ ಊಟ, ಆಹಾರಧಾನ್ಯಗಳನ್ನು ಹಂಚುವುದರಿಂದ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವಿಕೆಗೆ ತೊಂದರೆ ಆಗಲಿದೆ ಎಂಬ ಉದ್ದೇಶದಿಂದ ಜಿಲ್ಲಾಡಳಿತ, ದೇಣಿಗೆ ಸಂಗ್ರಹ ಕೇಂದ್ರ ಆರಂಭಿಸಿತ್ತು. ಕೇಂದ್ರಕ್ಕೆ ದೇಣಿಗೆ ನೀಡಿದರೆ, ದಾನಿಗಳು ಸೂಚಿಸುವ ಪ್ರದೇಶ ಅಥವಾ ವ್ಯಕ್ತಿಗಳಿಗೆ ನೀಡಲಾಗುವುದೆಂದು ಜಿಲ್ಲಾಡಳಿತ ತಿಳಿಸಿತ್ತು. ಆದರೆ, ನಿರೀಕ್ಷಿತ ಪ್ರಮಾಣದಲ್ಲಿ ದೇಣಿಗೆ ಬರುತ್ತಿಲ್ಲ.

ಕಳೆದ 10 ದಿನಗಳಲ್ಲಿ 125ಕೆಜಿ ಅಕ್ಕಿ, 15 ಕೆಜಿ ತೊಗರಿ ಬೆಳೆ, 20 ಕೆಜಿ ಚಹಾ ಪುಡಿ, 10 ಕೆಜಿ ವೆಂಕಟೇಶ ರವಾ, 10 ಎಣ್ಣೆ ಪಾಕೀಟ್‌, 10 ಕೆಜಿ ಸಕ್ಕರೆ, 2 ಕೆಜಿ ಬೆಲ್ಲ, ಕಾರಪುಡಿ 200 ಗ್ರಾಂ 2 ಪಾಕೀಟ್‌, 10 ಪಾಕೀಟ್‌ ಚಹಾಪುಡಿ ಸಂಗ್ರಹವಾಗಿದೆ. ಅಕ್ಕಿ, ಖಾರಾ, ಉಪ್ಪು, ಎಣ್ಣೆ, ಚಹಾಪುಡಿ, ಸಕ್ಕರೆ, ಬೆಲ್ಲ ಸೇರಿ ಒಂದು ಕಿಟ್‌ ಸಿದ್ಧಪಡಿಸಬಹುದು. ಆದರೆ ಸ್ವೀಕೃತಿ ಕೇಂದ್ರದಲ್ಲಿ ಸಂಗ್ರಹವಾದ ದಾಸ್ತಾನು ನೋಡಿದರೆ ಒಂದು ಕಿಟ್‌ ಸಹ ಸಂಪೂರ್ಣ ಆಗಲ್ಲ.

ಚುನಾವಣೆ ವಾಸನೆ: ಈ ಹಿಂದೆ ಬಡಾವಣೆಗಳಲ್ಲಿ ಹಂಚುತ್ತಿದ್ದ ವಿವಿಧ ಯುವಕರ ತಂಡಗಳು ಇಂದು ಕಾಣುತ್ತಿಲ್ಲವಾಗಿವೆ. ಹು-ಧಾ ಮಹಾನಗರ ಪಾಲಿಕೆ ಚುನಾವಣೆ ದೃಷ್ಟಿಯಿಂದ ಕೆಲವರು ಪೈಪೋಟಿಗೆ ಬಿದ್ದವರಂತೆ ಹಂಚಿಕೆ ಮಾಡಿದರೆ ಎಂಬ ಅನುಮಾನ ಮೂಡಿಸುವಂತಿದೆ.

ದೂರವಾಯ್ತು ಕೇಂದ್ರ: ದೇಣಿಗೆ ಸ್ವೀಕೃತಿ ಕೇಂದ್ರ ದೂರವಾಗಿದೆ, ಯಾವುದೋ ಮೂಲೆಯಲ್ಲಿದೆ ಎಂಬ ಅನಿಸಿಕೆಗಳು ಕೇಳಿ ಬರುತ್ತಿವೆ. ಅದರ ಬದಲು ಜಿಲ್ಲಾಡಳಿತ ಪಾಲಿಕೆ ಮುಖ್ಯ ಕಚೇರಿಯ ಯಾವುದಾದರೂ ಒಂದು ಕೋಣೆ ಇಲ್ಲವೆ ಮಿನಿ ವಿಧಾನಸೌಧದ ಒಂದು ಕೋಣೆ ಬಳಸಿದರೆ ಅದು ಮಧ್ಯವರ್ತಿ ಸ್ಥಳವಾಗಲಿದೆ. ಅದೇ ರೀತಿ ಒಂದೇ ಕಡೆ ಮಾಡುವ ಬದಲು ಕೆಲ ಪ್ರದೇಶಗಳಲ್ಲಿ ಕೇಂದ್ರಗಳನ್ನು ಆರಂಭಿಸಿದರೆ, ದೇಣಿಗೆ ನೀಡುವವರಿಗೆ ಸುಲಭವಾಗಲಿದೆ. ಸಂಗ್ರಹ ಹೆಚ್ಚಲಿದೆ ಎಂಬ ಅಭಿಪ್ರಾಯವೂ ಇದೆ.

ಜಿಲ್ಲಾಡಳಿತದಿಂದ ತೆರೆದಿರುವ ಸ್ವೀಕೃತಿ ಕೇಂದ್ರಕ್ಕೆ ದಾನಿಗಳು ಬರದೇ ಇರುವುದು ಬೇಸರ ಮೂಡಿಸಿದೆ. ದಾನಿಗಳು ಸ್ವೀಕೃತಿ ಕೇಂದ್ರಕ್ಕೆ ಬರಲು ಸಮಸ್ಯೆ ಇದ್ದವರು ದೂ:0836-2358035, ಮೊ: 9945346340, 9535351887, 9484798367 ಈ ದೂರವಾಣಿ ಮೂಲಕ ಸಂಪರ್ಕಿಸಿದ್ದಲ್ಲಿ ನಮ್ಮವರೇ ಅವರ ಬಳಿ ಹೋಗಿ ವಸ್ತುಗಳನ್ನು ಸಂಗ್ರಹಿಸಿ ಅವಶ್ಯಕತೆ ಇರುವವರಿಗೆ ಅಥವಾ ಅವರು ಹೇಳಿದ ಸ್ಥಳಗಳಿಗೆ ವಿತರಿಸಲಾಗುತ್ತದೆ. -ಶಶಿಧರ ಮಾಡ್ಯಾಳ, ಶಹರ ತಹಶೀಲ್ದಾರ್‌

­-ಬಸವರಾಜ ಹೂಗಾರ