ಲಿಂಗಾಯತ ಧರ್ಮ ಕಣ್ಣಿಗೆ ಕಾಣುವ ಜಗತ್ತು

Team Udayavani, Mar 6, 2017, 1:04 PM IST

ಹುಬ್ಬಳ್ಳಿ: ಲಿಂಗಾಯತ ಧರ್ಮ ಸರಳವಾಗಿದೆ ತಿಳಿಸಿದೆ. ಹಾಗೂ ಕನ್ನಡದಲ್ಲಿದೆ. ಇಲ್ಲದ ಜಗತ್ತಿನ ಬಗ್ಗೆ ಚಿಂತಿಸುವ ಬದಲು ಕಣ್ಣಿಗೆ ಕಾಣುವ ಜಗತ್ತಿನ್ನು ಪ್ರೀತಿಸುವ ಧರ್ಮ ಇದಾಗಿದೆ ಎಂದು ಗದುಗಿನ ತೋಂಟದಾರ್ಯ ಮಠದ ಡಾ| ಸಿದ್ದಲಿಂಗ ಸ್ವಾಮೀಜಿ ಹೇಳಿದರು. 

ಇಲ್ಲಿನ ಡಾ| ಡಿ.ಎಸ್‌. ಕರ್ಕಿ ಕನ್ನಡ ಭವನದಲ್ಲಿ ರವಿವಾರ ಆಯೋಜಿಸಿದ್ದ ಶಿವಶಿಂಪಿ ಸಮಾಜ ಕ್ಷೇಮಾಭಿವೃದ್ಧಿ ಸಂಘದ ಉದ್ಘಾಟನೆ ಹಾಗೂ ಪದಾಧಿಕಾರಿಗಳ ಅಧಿಕಾರ ಸ್ವೀಕಾರ ಸಮಾರಂಭದ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು. ಲಿಂಗಾಯತ ಧರ್ಮ ಸಾಮಾಜಿಕ ಧರ್ಮ ಹಿನ್ನೆಲೆ ಹೊಂದಿದೆ. 

ಬಸವಾದಿ ಶರಣರು ಕಾಣುವ ಜಗತ್ತನ್ನುಪ್ರೀತಿಸುವ ಮೂಲಕ ಕಾಯಕ, ದಾಸೋಹ, ಸರಳ ರೀತಿಯ ವಚನಗಳೊಂದಿಗೆ ಸಮಾಜ ತಿದ್ದುವ, ಜನರಲ್ಲಿ ಜಾಗೃತಿ ಮೂಡಿಸುವ ಕಾರ್ಯ ಮಾಡಿದರು ಎಂದರು. ವೇದಾಂತದಲ್ಲಿ ಪ್ರಖ್ಯಾತರಾದ ಶಂಕರಾಚಾರ್ಯ, ಮಧ್ವಾಚಾರ್ಯ, ರಾಮಾನುಜಾಚಾರ್ಯರ ತತ್ವಗಳು ಜನರ ಮನದಲ್ಲಿ ಹೆಚ್ಚು ಅನುಷ್ಠಾನಗೊಳ್ಳಲಿಲ್ಲ. 

ಆದರೆ, ಜನರ ವಾಸ್ತವಿಕ ಬದುಕಿಗೆ ಹತ್ತಿರವಾದ, ಸರಳ ಕನ್ನಡ ಭಾಷೆಯಲ್ಲಿ ಪ್ರತಿಯೊಬ್ಬರಿಗೂ ಅರ್ಥವಾಗುವ, ಉತ್ತಮ ಬದುಕನ್ನು ಕಟ್ಟಿಕೊಡುವ ವಚನಗಳು ಜನರ ಮನದಲ್ಲಿ ಪ್ರಭಾವ ಬೀರಿದವು. ಸಮಾಜದಲ್ಲಿಯೇ ದೇವರನ್ನು ಕಾಣಬೇಕು ಎಂಬುದು ಬಸವಣ್ಣವರ ಪ್ರತಿಪಾದನೆಯಾಗಿತ್ತು. ಅನೇಕ ಮಠಗಳ ಸ್ಥಾಪನೆಗೆ ಬಸವಪರಂಪರೆಯೇ ಕಾರಣವಾಗಿದೆ ಎಂದರು. 

ಪ್ರಜಾಪ್ರಭುತ್ವದಲ್ಲಿ ಸಂಘ-ಸಂಸ್ಥೆಗಳಿಗೆ ಹೆಚ್ಚು ಬಲವಿದೆ. ನಮ್ಮ ಜಾತಿಯನ್ನು ಪ್ರೀತಿಸುವ ಹಾಗೂ ಅನ್ಯ ಜಾತಿಗಳನ್ನು ಗೌರವಿಸುವುದೇ ನಿಜವಾದ ಜಾತ್ಯತೀತ ಅರ್ಥವಾಗಿದೆ. ಬೇಡವೆಂದರೂ ಇಂದು ಜಾತಿ ಅನಿವಾರ್ಯ ಎನ್ನುವಂತಾಗಿದೆ. ಶಿವಸಿಂಪಿ ಸಮಾಜ ಆತ್ಮಗೌರವ ಹಾಗೂ ಸ್ವಾಭಿಮಾನದ ಸಮಾಜವಾಗಿದೆ. 

ಸಮಾಜದವರು ಕೀಳರಿಮೆ ತೊರೆದು ಇನ್ನಷ್ಟು ಅಭಿವೃದ್ಧಿಗೆ ಮುಂದಾಗಬೇಕು ಎಂದರು. ಡಾ| ಶಿವಾನಂದ ಕುಬಸದ ಮಾತನಾಡಿ, ಸಮಾಜದ ಧ್ವನಿ ಸರಕಾರಗಳಿಗೆ ಮುಟ್ಟುವ ನಿಟ್ಟಿನಲ್ಲಿ ಸಂಘಟನೆ ಅನಿವಾರ್ಯವಾಗಿದೆ. ಶಿವಶಿಂಪಿ ಸಮಾಜದವರು ಕಾಯಕ ಜೀವಿಗಳು, ಇಂದು ಕುಲಕಸುಬು ಹೆಚ್ಚಿನ ಜನರಲ್ಲಿ ಉಳಿದಿಲ್ಲ. ಲಿಂಗಾಯತ ಧರ್ಮ ಎಂದರೆ ಒಂದು ಮಸಾಲೆ ಡಬ್ಬೆ ಇದ್ದಂತೆ. ಅದರಲ್ಲಿನ ವಿವಿಧ ಸಣ್ಣ- ಸಣ್ಣ ಬಟ್ಟಲುಗಳಲ್ಲಿ ಶಿವಸಿಂಪಿ ಸಮಾಜವೂ ಒಂದಾಗಿದೆ ಎಂದರು. 

ಶಿವಶಿಂಪಿ ಸಮಾಜ ಕ್ಷೇಮಾಭಿವೃದ್ಧಿ ಸಂಘದ ಅಧ್ಯಕ್ಷ ಗಂಗಾಧರ ಗಂಜಿ ಸಂಘದ ಕಾರ್ಯ ಚಟುವಟಿಕೆಗಳ ಕುರಿತು ವಿವರಿಸಿದರು. ಇದೇ ಸಂದರ್ಭದಲ್ಲಿ ಸಂಘದ ನೂತನ ಪದಾಧಿಕಾರಿಗಳಿಗೆ ಡಾ| ಸಿದ್ದಲಿಂಗ ತೋಂಟದಾರ್ಯ ಸ್ವಾಮೀಜಿ ಪ್ರತಿಜ್ಞಾ ವಿಧಿ ಬೋಧಿಸಿದರು. ಬಸವರಾಜ ಅಥಣಿ, ಎಚ್‌.ಅಶೋಕ ಇದ್ದರು.